butterfly Surya

கிகுஜிரோ..

2010-11-28T23:40:00.000-08:00

தாய் தந்தையில்லாமல் தன் பாட்டியுடன் தனிமையில் வசிக்கிறான் சிறுவன் மாசோவ். தனிமை கொடுமை, அதிலும் இளம்பருவத்தில் பிஞ்சு மனசின் தனிமை உள்ளத்தை உருகவைக்கும் கொடுமை.

நமக்கெல்லாம் துவக்கப்பள்ளி பருவத்தில் கோடை விடுமுறை விட்டால் எங்கே போவோம்... ?? உறவினர் வீட்டிற்கு அல்லது பாட்டி வீட்டிற்கு சென்று குதித்து கும்மாளமிடுவோம்.

அதேபோல் பள்ளியின் இறுதி நாளன்று துள்ளி குதித்து வீடு வந்து சேருகிறான் மாசோவ். தனக்காக வைக்கப்பட்டிருக்கும் உணவை சாப்பிட்டு விட்டு கால்பந்தை தூக்கி கொண்டு மைதானத்தை நோக்கி ஒடுகிறான். ஆனால் பயிற்ச்சியாளரோ விடுமுறையில் பயிற்சி கிடையாதென்றும் எங்காவது சென்று விடுமுறையை கழிக்குமாறு சொல்லி விட்டு கிளம்புகிறார். விளையாட யார் துணையுமின்றி தன்னந்தனியே நிற்கிறான் மாசோவ்.

சோகமே உருவாகி வீட்டினுள் அடைந்து கிடக்கிறான். பாட்டி வேலை முடித்து வந்ததும் எங்கே போவது என்று கேட்கிறான். பாட்டியும் உன் தந்தை இறந்து விட்டார்,தாயும் தொலை தூரத்தில் உனக்காக கஷ்டப்பட்டு வேலை பார்க்கிறாள், உன்னை எங்கேயும் கூட்டிப்போக யாரும் இல்லை என்கிறாள்.

மனமுடைந்து போகிறான் மாசோவ். மறு நாள் பாட்டி வேலைக்கு கிளம்பியதும் சிறிது பணத்தையும், தாயின் போட்டோக்களையும் முகவரியையும் எடுத்து கொண்டு தனியே கிளம்புகிறான்.

மாசோவ் தனது தாயை தேடிக்கண்டுபிடிக்க தயாராகிறான். வழியில் உறவினரான ஒரு தம்பதியினரை சந்திகிறான். அவர்களும் அவனிடம் இதமாக பேசி அவன் பயணத்தை அறிந்து கொண்டு அந்த பெண்மணி தனது கணவரையும் அனுப்பி வைக்கிறாள். அவர் பெயர் கிகுஜிரோ. கிகுஜிரோவோ சற்று போக்கிரி என்றும் மறை கழண்டு போனவர் என்றும் அனைவராலும் பாராட்டப்படுபவர்.

வேறும் யாரும் இல்லாத நிலையில் மாசோவும் கிகுஜிரோவின் துணையோடு எங்கோ தொலை தூரத்தில் இருக்கும் தாயை கண்டுபிடிக்க பயணமாகிறான். இந்த நீண்ட பயணத்தில் இருவருக்குள்ளும் இது நாள் வரை ஒளிந்துகிடந்த உணர்வுகளை வெளிப்படுத்துவதே இந்த ஜப்பானிய திரைப்படம்.

ஆரம்பத்திலேயே பணம் முழுவதையும் சைக்கிள் பந்தயத்தில் இழந்து விட்டு கையில் சல்லி காசில்லாமல் பயணத்தை தொடங்குகின்றனர் இருவரும்.

இந்த பயணத்தில் மகிழ்ச்சி, இன்பம், விளையாட்டு, நகைச்சுவை, சிறு சிறு ஆனந்தம், நடுநடுவே ஏமாற்றம் என ஆர்ப்பாட்டமில்லாத ஆனால் அதே நேரத்தில் சுவாரசியமாக கதையை நகர்த்தியுள்ளார் இயக்குநர்.

நீண்ட பயணத்திற்கு பிறகு விலாசத்தை அடைகின்றனர். வீட்டை நோக்கி நடக்கிறார் கிகுஜிரோ. அதிர்ச்சியாக அந்த விலாசத்திலுள்ள அம்மாவிற்கு வேறோரு குடும்பம் உள்ளது. இதை எப்படி அவன் ஜீரணிக்கப்போகிறான் என்று அவர் தவிக்கும் போது மாசோ அழுது கொண்டு இருக்கிறான்.

உண்மை நிலை அறிந்தால் அவன் துடித்து போவான் என்று நினைத்து அந்த விலாசத்தில் வேறு யாரோ இருக்கிறார்கள் என்று சொல்லி சமாளிக்கிறார் கிகுஜிரோ. மாசோவின் அழுகை நின்றபாடில்லை. அவனை எப்படியாவது தேற்ற எண்ணி ஒரு பொம்மை மணியை கொடுத்து உங்கம்மா நீ வந்தா உன்கிட்ட கொடுக்க சொல்லி கொடுத்துட்டு போயிருக்காங்க.. உனக்கு கவலை வந்தால் இந்த மணியை அடித்தால் தேவதை வந்து உனக்கு உதவும் என்று சொல்லி ஒரு வழியாக அவனை தேற்றுகிறார்.

மீண்டும் ஊருக்கு செல்ல ஆயத்தமாகி நட்க்க தொடங்குகிறார்கள். வழியில் அந்த பிஞ்சு மனதின் ஏமாற்றத்தை எண்ணி மாசோவை மகிழவைக்க பல உத்திகளை கையாள்கிறார். பெரிய இலைகளை வெயிலுக்கு குடையாக சட்டையில் சொருகியபடி நடப்பதும், சோளத்தோட்டத்தில் புகுந்து சோளங்களை உண்டு பசியாறுவதும் ஊர் சுற்றி திரியும் எழுத்தாளரை சந்திப்பதும் மகிழ்ச்சியும் நெகிழ்ச்சியுமான காட்சிகள்.

வரும் போது சந்தித்த பல வித மனிதர்களை மீண்டும் திரும்பி செல்லும் போது ஏதேச்சையாக சந்திப்பதும் அனைவரும் அவர்களுக்கு உதவுவதும் ஜப்பானின் ஒரு சாராரது வாழ்க்கை முறையை சமூகப் பார்வையுடன் பதிவு செய்துள்ளார் இயக்குநரும் கிகுஜிரோகவாக நடித்தவருமான டகேஷி கிட்டானோ.

குழந்தைகளின் தனிமை உலகத்தையும் நகர வாழ்க்கையில் அவர்கள் தொலைத்த கேளிக்கை விளையாட்டுகளையும் ஒவ்வொரு காட்சியிலும் அத்தனை தெளிவாக பதிய வைத்த ஒரு மிகச்சிறந்த திரைப்படம். என்னதான் நகைச்சுவையுடன் பதிய வைத்தாலும் அதுனுள் இழையோடியிருக்கும் சோகம் நம்மை கலங்க வைக்கிறது.

ஒவ்வொர் காட்சியும் குழந்தைக் கதைகளில் வருவது போல் ஒரு சிறு தலைப்புடன் தொடங்குவது புதுமையானதும் தனித்துவம் வாய்ந்ததாகும். குளோசப் ஷாட்டுகளை போன்றே லாங் ஷாட்டுகளிலும் கதாபாத்திரங்களின் உணர்வுகளை துல்லியமாக வெளிப்படுத்தி அசர வைக்கிறார் இயக்குநர்.

இறுதி காட்சிகளில் வசனங்கள் பேசாது இசையின் மூலமே படத்தை பேசவைப்பது அத்தனை அருமை.

ஒரு சிறுவனுக்கும் இரண்டாவது பாலக மனதில் இருக்கும் வயோதிகருக்கும் இடையேயான நட்பையும் ஆழ்ந்த அன்பையும் இதைவிட ஆழமாக சொல்ல இயலுமா..?? தெரியவில்லை..

உடனே பார்க்க டிரைலர் இங்கே

1999ல் வெளியாகி கேன்ஸ் உலக திரப்ப்பட விழாவில் தங்கப்பனை விருதுக்கு பரிந்துரைக்கப்பட்டதுடன் உலக அரங்கில் பல விருதுகளை வாரிக் குவித்த திரைப்படம். சினிமா ரசிகர்கள் அனைவரும் பார்க்க வேண்டிய அதிஉன்னத திரைப்படம்.

டிஸ்கி: சென்ற வருடம் எழுதிய பதிவின் மீள்பதிவு.

நேற்று நந்தலாலா பார்த்தேன். கிகுஜிரோ பார்க்காதவர்கள் கண்டிப்பாக “நந்தலாலா” பாருங்கள். நேரம் கிடைப்பின் பதிவிடுகிறேன்.

உலக சினிமா: The Reader

2010-11-05T14:34:00.001-07:00

இந்த திரைப்படம் கண்டிப்பாக குழந்தைகளுக்கு ஏற்றதல்ல. குடும்பத்துடன் காண இயலாது.

இத்திரைப்படம் 1990களில் ஜெர்மனியில் Bernhard Schlink எழுதிய The Reader என்ற நாவலை தழுவி எடுக்கப்பட்ட திரைப்படம். ஆங்கிலத்தில் 2008 ல் வெளியானது.

Michael Berg புகழ்பெற்ற வழக்கறிஞர். குறிப்பாக போர் குற்றங்களின் பின்னணியில் உள்ள வழக்குகளில் நன்கு அனுபவம் பெற்றவர். ஆனால் அவரது இளமை பருவத்தில் ஏற்பட்ட இனம் புரியாத காதல் வாழ்க்கையை சித்தரிக்கிறது.

தனது வீட்டின் வழியே முன்னேறி செல்லும் டிராம் வண்டியை பார்த்து கொண்டிருக்கும் போது கதை பின்னோக்கி நகருகிறது.

இனி பின்னோக்கி:

15வயதான மைக்கேல் பள்ளியிலிருந்து ஒரு நாள் பாதியில் வீடு திரும்புகிறான். அவனுக்கு உடல் நலமில்லை. நடக்கவும் முடியவில்லை. தட்டு தடுமாறி வரும் போது மயக்கமாக ஒரு வீட்டின் முன் அமர்ந்து கொள்கிறான். டிராம் கண்டக்டராக வேலை முடித்து தனது வீடு தேடி வரும் ஹென்னா அவனை தேற்றுகிறாள். அவனை உபசரித்து வீடு வரை துணைக்கு வந்து விட்டு விட்டு போகிறாள். மைக்கேல் மருத்துவ சிகிச்சையில் அவனுக்கு கடுமையான ஜீரம் என்றும் மூன்று மாத கட்டாய ஒய்வு வேண்டும் என்றும் மருத்துவர் கூறி விட்டு செல்கிறார். வீடு, தனிமை, மருத்துவம் என்று மூன்று மாத இடைவெளிக்கு பிறகு மைக்கேல் தேறி பள்ளி செல்கிறான்.

தன்னை உபசரித்த ஹென்னாவை ஒரு நாள் சந்தித்து நன்றி சொல்ல வருகிறான். ஹென்னா அவனை விட வயதில் ஏறக்குறைய இரண்டு மடங்கு மூத்தவள். அவனின் நன்றி உணர்விற்கு மகிழ்ச்சியடைகிறாள். மைக்கேலும் விடை பெற்று செல்கிறாள். ஏனோ மைக்கேலுக்கு அவளை மீண்டும் காண வேண்டும் போலிருக்கிறது. ஒரிரு நாட்கள் அவளை சந்திக்கிறான். அவளும் அவன் மீது அளவற்ற அன்பு கொள்கிறாள். அன்பு அதீத காதலாகவும் மாறுகிறது. இனம் புரியாத ஈர்ப்புடன் பள்ளி முடிந்ததும் ஹென்னாவை காண ஒடோடி வருகிறான்.

இருவரும் விவரிக்க முடியாத அளவில் காமத்தில் ஈடுபடுகின்றனர். அதில் ஈடுபடும் பொதெல்லாம் அவனது படிப்பு பற்றி கேட்கிறாள் ஹென்னா. அவன் ஜெர்மனி,ஸ்பானிஷ், லத்தீன் படிப்பதாக கூறுகிறான் மைக்கேல். அதிலுள்ள இலக்கியத்தையெல்லாம படித்து காட்ட சொல்கிறாள். மைக்கேலும் ஒவ்வொரு நாளும் பல இலக்கியங்களையும், கவிதைகளையும் கதைகளையும் படித்து காட்டுகிறான். அவற்றையெல்லாம் கேட்டு அளவற்ற மகிழ்ச்சியும் சோகமும் கொள்கிறாள். ஒவ்வொரு இலக்கிய வார்த்தைகளையும் உள்வாங்கி கொள்கிறாள். சந்திப்பும், இலக்கிய படிப்பும் அதீத காமமுமாக நாட்கள் கடக்கின்றன.

ஒரு நாள் ஹென்னாவிற்கு பதவி உயர்வு கிடைத்து அவளை அலுவலக பணிக்கு மாற்றுவதாக உயரதிகாரி கூறுகிறாள். ஹென்னா திடிரென்று வீட்டை காலி செய்து விட்டு போய் விடுகிறாள். அவளை காணாத மைக்கேல் சொல்ல முடியாத வேதனையில் தவிக்கிறான். பள்ளி படிப்பு முடிந்து சட்ட கல்லூரியில் சேருகிறான். குற்றவியல் சட்டங்களில் ஆர்வம் ஏற்பட்டு அதில் மேல் படிப்பும் படிக்கிறான் மைக்கேல். பிராக்டிகல் அறிவு இருக்க வேண்டும் என்று கோர்ட் நடைமுறைகளை காண கல்லூரி பேராசிரியர் ஒரு நாள் ஏற்பாடு செய்கிறார்.

வழக்குகளை காண நீதிமன்றம் சென்ற மைக்கேல், அன்றைய வழக்கில் குற்றவாளி கூண்டில் ஹென்னா இருப்பதை கண்டு அதிர்ச்சியும் வேதனையும் அடைகிறான். 1944ல் யூத அகதிகள் முகாமில் முன்னூறு யூத பெண்கள் சர்ச்சில் எரித்து கொல்லப்பட்ட வழக்கில் ஹென்னா முதன்மை குற்றவாளியாக சேர்க்கப்ப்ட்டு இருக்கிறாள். ஹென்னாவுடன் அங்கு பணியில் இருந்த சில பெண்களும் வழக்கில் இருந்தனர். ஆனால் அனைத்து பெண்களும் ஹென்னா அதற்கு முழுக்காரணம் என்றும் அவள் தான் தீயிட்டு கொளுத்த குறிப்பெழுதியதாக குற்றம் சுமத்துகின்றனர். பல வருடங்களுக்கு முன் எழுதிய குறிப்புகள காணமல் போய் விட்டதால் ஹென்னாவின் கையழுத்தை பரிசோதிக்க சொல்கிறார் நீதிபதி. ஹென்னா எதையும் எழுதாமல் குற்றத்தை ஒப்பு கொள்வதாக கூறுகிறாள்.

ஹென்னாவிற்கு ஆயுள் தண்டனையும் மற்ற பெண்களுக்கு நான்கு ஆண்டுகள் கடுங்காவல் தண்டனையும் வழங்கி தீர்ப்பளிக்கிறார் நீதிபதி. வேதனையுடன் வீடு திரும்புகிறான் மைக்கேல். வருடங்கள் கடக்க மைக்கேலுக்கு திருமணமாகி பெண் குழந்தையும் பிறக்கிறது. மனைவியுடன் மனவேற்றுமையால் விவாகரத்தும் முடிந்து விட மகளுடன் தனியே வசிக்கிறான் மைக்கேல்.

ஹென்னாவுடன் வாசித்து மகிழ்ந்த அதே பழைய இலக்கியங்களை தானே மீண்டும் வாசித்து டேப்ரிகார்டரில் பதிவு செய்து சிறைச்சாலையில் உள்ள ஹென்னாவிற்கு அனுப்பி வைக்கிறான் மைக்கேல். ஹென்னாவும் அளவற்ற மகிழ்ச்சியுடன் அனைத்தையும் தினமும் கேட்கிறாள். மைக்கேல் அனுப்பும் கேசட்டுகளை கேட்டு குழந்தை போல சிறிய சிறிய கடிதங்களை மைக்க்கேலுக்கு அனுப்புகிறாள் ஹென்னா. ஆனால் மைக்கேல் பதில் எழுதுவதோ நேரில் சென்று ஹென்னாவை சந்திப்பதோ இல்லை.ஆனால் ஹென்னாவுடன் பழைய நினைவுகளை அவளுக்கு வாசித்து காண்பித்த புத்தகங்களை போல புரட்டி பார்க்கிறான் மைக்கேல்.

சில மாதங்கள் கழித்து சிறைச்சாலையிலிருந்து மைக்கேலுக்கு தொலைபேசி அழைப்பு வருகிறது. இன்னும் சில நாட்களில் நன்நடத்தை காரணமாக ஹென்னா விடுதலை அடையபோகிறாள் என்றும் அவள் வெளியில் தங்க ஏதாவது ஏற்பாடு செய்யவும் என்று சிறைச்சாலை அதிகாரி கூறுகிறாள். பல வருடங்கள் கழித்து ஹென்னாவை மீண்டும் சிறைச்சாலையில் சந்திக்கிறான் மைக்கேல். தலை நரைத்து,நடை தளர்ந்து, உடல் நலிந்து காணப்படுகிறாள் ஹென்னா. "Have you spent much time thinking about the past?" என்று கேட்கிறான் மைக்கேல். அதற்கு "It doesn't matter what I think. It doesn't matter what I feel. The dead are still dead" என்று பதிலுரைக்கிறாள் ஹென்னா. அடுத்த வாரம் அவள் விடுதலையானதும் தொலை தூரத்தில் அவள் தங்க ஒரு சிறிய இடமும் அவனுக்கு தெரிந்த நண்பரிடம் சிறிய வேலையும் ஏற்பாடு செய்திருப்பதாய் கூறுகிறான் மைக்கேல். பதில் ஏதும் கூறாமல் அமைதியாய் இருக்கிறாள் ஹென்னா.

அடுத்த வாரம் அவள் விடுதலையாகும் நாளில் பூங்கொத்துடன் அவளை காண வருகிறான் மைக்கேல். ஆனால் ஹென்னா சில நாட்களுக்கு முன்பே தற்கொலை செய்து கொண்டுவிட்டதாக அறிந்து அதிர்ச்சி கொள்கிறான் மைக்கேல்.

மைக்கேலுக்காக அவள் சிறிய குறிப்பெழுதி இருப்பதாக சிறைச்சாலை அதிகாரி கூறுகிறாள். அதில் தனக்கு பல வருடங்கள் எழுத படிக்க தெரியாதென்றும் அதனாலேயே மைக்கேலை இலக்கியங்களை வாசிக்க கேட்டு மகிழ்ச்சியடைந்ததாகவும் பின்னர் சிறை வாழ்க்கையில் மட்டுமே எழுத படிக்க கற்று கொண்டதாகவும் எழுதி இருப்பதை படித்ததும் மைக்கேல் சொல்ல முடியாத வேதனையடைகிறான். அது மட்டுமல்லாது இத்தனை வருட சிறை வாழ்க்கை வேலையில் கிடைத்த தொகையெல்லாம் சேமித்து ஒரு சிறு தேநீர் டப்பாவில் சேர்த்து வைத்திருப்பதையும் அதை சர்ச் எரிப்பில் இறக்காமல் உயிர் பிழைத்த இலியானா என்ற பெண்ணிடம் அளித்து விடுவதாக எழுதி இருக்கிறாள். இலியானா தற்போது அமெரிக்காவில் வாழ்வதை அறிந்த மைக்கேல் அமெரிக்காவில் அவளை சந்தித்து நடந்த அனைத்தையும் கூறுகிறான். அந்த தொகையை படிப்பறிவில்லாத யூத மக்களின் கல்வி செலவுக்காக பயன்படுத்த வும் யோசனை கூறுகிறான். இலியானாவும் சம்மதித்து ஹென்னா பெயரில் ஒரு அறக்கட்டளை துவங்கி அப்படியே செய்வதாய் உறுதியளிக்கிறாள். அந்த தேநீர் டப்பாவை மட்டும் தன் தாயின் நினைவாக பாதுகாக்க விரும்புவதாய் கூறுகிறாள் இலியானா.

எப்போதும் ஆச்சரியங்களை விரும்புவதாக கூறும் தனது ஆறு வயது மகள் ஜீலியாவுடன் ஹென்னாவின் கல்லறைக்கு சென்று நினைவஞ்சலி செலுத்தி விட்டு ஆச்சரியங்கள் நிரம்பிய ஹென்னாவின் வாழ்க்கையை அவளுக்கு சொல்ல ஆரம்பிப்பதாய் திரைப்படம் நிறைவு பெறுகிறது.

இத்திரைப்படத்தை இயக்கியிருப்பவர் Stephen Daldry என்ற ஹாலிவுட் இயக்குநர். பல சர்வேத விருதுகளை வென்றவர். மூன்று முறை ஆஸ்கர் விருதுக்கு பரிந்துரைக்கப்பட்டவர். மிக சிக்கலான கதையை திறமையாக கையாண்டு அருமையாக இயக்கியிருக்கிறார்.

மைக்கேலாக நடித்திருப்பது Ralph Fiennes. நடிப்பில் முதிர்ச்சியும் அனுபவமும் பெற்றவராக அமைதியாக நடிப்பை வெளிப்படுத்தியிருக்கிறார்.

ஹென்னாவாக நடித்திருப்பது பிரபல ஹாலிவுட் நடிகை Kate Winslet. நடு வயதில் காதலிலும் காமத்திலும் துள்ளும் இளமையுடனும் அதே நேரத்தில் வயதான வேடத்தில் அமைதியிடனும் நடிப்பின் உணர்ச்சி குவியல் என்றால் மிகையில்லை. இத்திரைப்படத்தில் நடித்ததற்காக பல சர்வதேச விருதுகளுடன் ஆஸ்கர் விருதினையும் பெற்றிருக்கிறார்.

சிறந்த திரைக்கதை, இயக்கம், நடிப்பு, ஒளிப்பதிவு என்று இருபதுக்கும் மேற்பட்ட சர்வதேச விருதுகளை வாரி குவித்த திரைப்படம் The Reader

சந்தர்ப்பம் கிடைத்தால் அவசியம பாருங்கள்.

உடனே பார்க்க டிரைலர் இங்கே

டிஸ்கி: உலக சினிமா பதிவுகள் தொடரும்.

ஜெயா டிவியில்...

2010-07-26T11:32:00.000-07:00

பதிவுலக நண்பர்களுக்கு வணக்கம்.

ஜீலை 29ம் தேதி வியாழக்கிழமை 8 மணிக்கு ஜெயா டிவியின் ”காலை மலர்” நிகழ்ச்சியில் சிறப்பு விருந்தினராக என்னுடைய உலக சினிமா பற்றிய உரையாடல் ஒளிப்பரப்பாகிறது. நண்பர்களுடன் பகிர்வதில் அளவற்ற மகிழ்ச்சி. நிகழ்ச்சியை பார்த்து நிறை / குறை சொல்லவும்.

தவிர்க்கவே முடியாத சில பல காரணங்களால் உலக சினிமா பதிவுகளை இட இயலவில்லை. Very very sorry... இனி தொடர்ந்து எழுதுவேன். உங்கள் அனைவரின் அன்புக்கும் நன்றி.

டிஸ்கி: அடிக்காத குறையாய் திட்டி தீர்த்த பதிவர் மயில் ராவணனுக்கு நெஞ்சார்ந்த நன்றிகள்.

சில்ரன் ஆஃப் ஹெவன் இயக்குநர் மஜித் மஜிதி

2010-03-23T02:38:00.000-07:00

சினிமா என்றாலே நாலு பாட்டு ஐஞ்சு ஃபைட்டு என்று நம்பிக்கொண்டிருக்கிறான் தமிழ் ரசிகன். விஜய், அஜித், நமீதா, நயன்தாரா தாண்டி அவன் சிந்திப்பதே இல்லை.

ஆனால், இதையெல்லாம் தாண்டி உலக சினிமா என்கிற ஒன்று இருக்கிறது. அது என்ன உலக சினிமா..? ஹாலிவுட், பாலிவுட், கோலிவுட், (அப்படி சொன்னால் நம்ம கமலுக்கு கோவம் வரும். வேறு என்ன சொல்ல..?) ஏன் டோலிவுட் கூட இருக்கிறது. ஆனால், எந்தத் திரைப்படமும் உலக தரம் என்கிற அளவுகோலை வைத்துக்கொண்டு எடுக்கப்படுவதில்லை.

திரைப்படம் உருவாக்கும் கதைகள், சூழல், பாத்திரங்கள், நடிப்பு முதலியவற்றால் மட்டுமே அது உலகத் தரத்தை அடைகிறது. சுருங்கச சொன்னால், உலக மக்கள் அனைவராலும் விரும்பி பார்க்கும்படியும் பாராட்டும்படியும் அமைந்தால் அது உலக சினிமா ஆகிறது.

உலக சினிமாவில், குறிப்பாக மூன்றாம் உலக நாடுகள் பெற்ற வெற்றிகளிலேயே மிகவும் பிரபலமானது ஈரானிய திரைப்படங்கள்தான். கடுமையான தணிக்கை முறைக்கு பிறகு வெளிவரும் சூழலில், இது எப்படி சாத்தியமாகிறது?

வாழ்வை மிக நெருக்கமாக காட்டுவதாலும் அதன் அசல் (அஜித்தின் அசல் அல்ல) தன்மையோடு பேசுவதாலும், ஹீரோ வில்லன் என்கிற எத்தகைய லோக்கல் பார்முலாக்களும் இல்லாது காதல், நேசம், அன்பு, பாசம் அனைத்தையம் யாதார்த்தமாக சித்தரிப்பதால் இது சாத்தியப்படுகிறது. அது மட்டுமல்லாது பாரசீக மஸ்னவி, கஜல் போன்ற இசை மரபின் வழமையிலும் திரைப்படங்கள் வெளியாகி ஒரு கவிதையாய் மலர்ந்து மகிழ்ச்சியூட்டுகின்றன.

அப்படி உலகத் தரத்தில் தனது படைப்புகளை அளிப்பவர்தான் ஈரானிய இயக்குநர் மஜித் மஜிதி. 1959, ஏப்ரல் 17-ல் இரானில் பிறந்து வறுமையில் வாடியவர். 12 வயதில் தெருதெருவாக இனிப்பு மற்றும் ஜஸ் விற்றும் பள்ளிப் படிப்பை மேற்கொள்ள முடியாமல் பிறகு டெஹ்ரானில் உள்ள நாடக கல்லூரியில் சேர்ந்தார்.

1978,- 79-ல் நடந்த இஸ்லாமியப் புரட்சிக்குப் பின் திரைப்படங்களில் நடிக்க ஆர்வம் கொண்டார். சிறு சிறு வேடங்களில் நடிக்கத் தொடங்கினார். என்றாலும் இயக்குநராக வேண்டும் என்பதே இவரது பேரார்வமாக இருந்தது.

1992-ல் தனது முதல் திரைப்படமான Badak-ஐ திரைக்கதை எழுதி இயக்கினார்.

1996-ல் வெளிவந்தது Pedar(Father). நாம் எல்லோரும் நம் குடும்பத்தோடு மகிழ்ச்சியுடன் வாழும் இந்த வேளையில் எத்துனையோ பேர் இந்த பிரபஞ்சத்தின் ஒவ்வொரு மூலையிலும் இல்லாத அல்லது இழந்துவிட்ட தங்களின் உறவுக்காக ஏங்கிக்கொண்டுதான் இருப்பார்கள். அப்படி தந்தையின் பிரிவால் துடிக்கும் ஒரு சிறுவனின் கதைதான் இந்தத் திரைப்படம்.

'Children of Heaven' பல்வேறு உலகத் திரைப்பட அரங்கில் விருதுகளை வாரிக்குவித்த படம். கோயிலில் அல்லது திருமண மண்டபத்தில் தொலைத்துவிடுவோமோ என்று நாம் கழற்ற யோசிக்கும் ஒரு 'காலணி(ஷூ)'தான் திரைப்படத்தின் கதாநாயகன். உலகம் முழுவதும் உள்ள ரசிகர்களை ஈரானிய சினிமாவின் பக்கம் ஈர்த்த இப்படம், அண்ணன் தங்கையான ஒரு சிறுவனையும், சிறுமியையும் பற்றிக் கூறுகிறது. குழந்தைகள் ஒரு விஷயத்தை எத்தனை நேர்மையாக, அதே நேரம் எவ்வளவு தீவிரத்துடன் அணுகிறார்கள் என்பதை கலையமைதி கெடாமல் சொல்கிறது. 1997-ம் வருடம் 'மான்டர் உலகத் திரைப்பட விழா'வில் நான்கு விருதுகளைப் பெற்றதுடன் ஆஸ்கருக்கு பரிந்துரைக்கப்பட்ட முதல் இரானிய திரைப்படமும் இதுவே.

1999-ல் வெளிவந்த The Colour of Paradise திரைப்படம், அப்பாவின் இரண்டாவது திருமண ஆசையால் அலைக்கழிக்கப்படும் பார்வையற்ற சிறுவன் மொஹமதுவைப் பற்றியது. இந்தப் படத்தில் மகன் கண் பார்வையில்லாதது ஒரு ஊனமென்றால், தந்தையும் மன ஊனம் கொண்டவர் என்பதை சொல்லாமல் சொல்கிறார் இயக்குநர். இதுவும் பல விருதுகளை பெற்றது. அந்த ஆண்டு வெளிவந்த பத்துத் திரைப்படங்களில் சிறந்த ஒன்றாக டைம் பத்திரிகை இப்படத்தை தேர்வு செய்திருந்தது.

Baran (Rain) என்கிற படம் 2001-ம் ஆண்டு வெளியானது. இது பதின்ம வயதில் இருக்கும் லத்தீப் என்கிற இளைஞனின் கதை. அகதியாக இருக்கும் குடும்பதிலிருந்து வறுமை காரணமாக ஆண் வேடமிட்டு வரும் பாரன் என்ற பெண்ணை சந்திக்கிறான். அவனுடைய காதல், மழைபோல அந்த வாலிபனின் மனதில் பெய்துவிட்டு செல்வதாக அற்புதமாகக் காட்டியிருப்பார் மஜித் மஜிதி. அந்த இளம் பெண்ணின் முகத்தை திரைப்படம் முடியும்வரை காட்டாமல் அவள் விட்டுச் சென்ற காலடிச் சுவட்டை மழை நனைப்பதோடு படம் நிறைவடைகிறது. ஸ்கீரின் சர்வதேச விருதுடன் 13 உலக விருதுகளை வென்றது இப்படம்.

The Willow Tree (2005) ஒரு கண் பார்வையற்ற பேராசிரியர் யூசுப். மற்ற எல்லோரையும்போல தனக்கும் கண் பார்வை வேண்டும். இந்த உலகத்தைப் பார்க்க வேண்டும். தனக்கு பிரியமான மனிதர்களை நோக்க வேண்டும் என்ற உந்துதல் அவருக்குள் எழுகிறது. ஆனால், பார்வை கிடைத்ததும் அவர் அடையும் மன வேதனைகளையும் ஏமாற்றத்தையும் சித்தரிக்கும் அதி உன்னதமான திரைப்படம் வில்லோ ட்ரீ. டோரண்டோ திரைப்படவிழாவில் விருது பெற்றதுடன் பல உலக விருதுகளை அள்ளியது.

Song of Sparrows (2008) தெஹ்ரைனிலுள்ள தீக்கோழி பண்ணையில் பணிபுரிகிறான் கறீம். வறுமையான குடும்ப சூழ்நிலையில் குழந்தைகளை பாதுகாக்க அவன் படும் அல்லல்கள், தாயன்புக்குச் சற்றும் குறைந்ததல்ல என்று புரிய வைக்கிறது இப்படம். இதில் தந்தையின் அன்பு, பாசம், பிரியம் ஆகியவற்றை அற்புதமாகக் காட்டியிருப்பார் மஜித். பெர்லின் திரைப்படவிழா விருதுடன் இப்படமும் பல விருதுகளை அள்ளியது.

இவை தவிர எண்ணற்ற குறும்படங்களையும் ஆவணபடங்களையும் எடுத்துள்ளார் மஜித் மஜிதி.

2008ல் நடந்த சீன ஒலிம்பிக்ஸ்ஸில் பெய்ஜிங் பற்றிய குறும்படம் தயாரிப்பதற்காக சீன அரசாங்கம் இவருடன் சேர்த்து 5 மிகச்சிறந்த இயக்குநர்களை தேர்வு செய்தது.உலகத்தின் பல விருதுகளை பெற்றதுடன் சென்ற வருடம் Starz Denver சர்வதேச திரைப்படவிழாவில் வாழ் நாள் சாதனையாளர் விருதையும் பெற்றுள்ளார். இவரது கலைப்பயணம் தொடர்கிறது.

உலகின் எல்லா இயக்குநர்களுக்கும் எது பிரச்சினையோ, அதுதான் இவருக்கும் இருக்கிறது. ஒரு திரைப்படம் வெற்றியடையுமா? அல்லது தோல்வியடையுமா என்று எவருக்கும் தெரியாது. ஒரு தயாரிப்பாளனை திருப்திபடுத்துவதான் முதல் வேலை என்கிறார் மஜித். இருந்தாலும், பல திரைப்படங்கள் உங்களை மகிழ்வித்து நாற்காலியோடு உட்காரவும் விசிலடிக்கவும் வைக்கிறது. ஆனால், தியேட்டரை விட்டு வெளியேறும்போது ஏமாற்றப்பட்டது மெள்ள மெள்ள தெரிய வரும்.

ஒரு நல்ல படம் வாழ்க்கையில் நெருக்கத்தை ஏற்படுத்தவதாக இருக்க வேணடுமே தவிர பார்வையாளனை ஒரு பிணைக்கைதியாக பிடித்து வைத்திருக்கக் கூடாது. வாழ்வின் உண்மையைக் கண்டடையும் பயணமாக அது தொடங்கவேண்டும். ஒரு திரைப்படம் என்பது கலையாக, அன்பாக, நேசமாக, காதலாக யதார்தத்தின் ஒரு பதிவாக வெளிப்பட்டால் மட்டுமே அது உலக சினிமாவாக போற்றப்படுகிறது.

டிஸ்கி: சூரிய கதிர் (ஜன 16-31) இதழில் வெளியான கட்டுரை.

Rooster's Breakfast

2010-02-26T01:27:00.000-08:00

ஜிரோ (அவன் பெயரே அதுதான்) வளர்ந்து வரும் ஒரு கார் மெக்கானிக். முதலாளிக்கு விசுவாசமான ஊழியன். ஆனால் முதலாளிக்கோ ஏகப்பட்ட கடன் பிரச்சனைகள். மெக்கானிக் ஷெட்டை இழுத்து மூடி விட நினைக்கிறார். பல வருடமாக தன்னிடம் வேலை செய்யும் ஜிரோவை என்ன செய்வது..?? வெளியூரில் வசிக்கும் தனது நீண்ட நாள் நண்பரும் தொழிலில் மூத்தவருமான கஜா விடம் அனுப்பி வைக்கிறார்.

ஜிரோவும் வேறு வழியில்லாது தொலை தூர பயணத்துக்கு ஆயத்தமாகி கஜா இருக்கும் ஊருக்கு வந்தடைகிறான். கஜாவும் நண்பரின் சிபாரிசிற்கு இணங்கி ஜிரோவை வேலையில் சேர்த்து கொள்கிறார். ஆனால் கஜா பழைய முதலாளி போல கருமமே கண்ணாயினாரல்ல. நல்ல சொகுசு பார்ட்டி. தனிக்கட்டை வேறு. சதா தண்ணி, சீட்டு என்று கொண்டாங்களுடன் கொஞ்சம் வேலையும் செய்வார்.

அந்த ஊரில் கைதேர்ந்த மெக்கானிக்கான கஜாவை விட்டால் வேறு ஆள் கிடையாது. நண்பர்கள் கூட்டம் அதிகம் இருப்பதாலும் வாடிக்கையாளர்களுக்கு பஞ்சமில்லை.

ஷெட்டின் மாடியிலேயே அவனுக்கு தங்குமிடம் ஒதுக்க படுகிறது. ஆனால் ஜிரோவிற்கு தொழில் மேல் பக்தி. எப்போதும் தான் உண்டு தன் வேலை உண்டு என்று இருக்கிறான். கஜாவை குருவாக ஏற்று கொண்டு தொழிலை நன்கு கற்க வேண்டும் என்று பேராவல்.

ஆனால் மாஸ்டர் கஜவோ முதலில் பெண்களை வசியபடுத்தும் கலையையே கற்று கொள்ள வேண்டுமென்கிறார். இல்லாவிட்டால் வாழ்க்கை சுவாரசியமாக இருக்காது என்று தினமும் அட்வைஸ் வேறு. வேலை கற்று கொள்வதற்காக வந்த இடத்தில் இது என்னடா வம்பா இருக்கே என்று தயங்கி தயங்கி அவர் சொல்லும் ஆலோசனகளே கேட்ட படியே இருக்கிறான்.

கஜாவின் நண்பர் லிபேக். வெளியூரில் சூதாட்ட கிளப்பும் நவீன பாரும் வைத்து இருக்கிறார். கையில் நல்ல சில்லறை. மனைவி பிரான்ஜாவை கண்டு கொள்வதேயில்லை. அடிக்கடி இருவருக்கும் சண்டை வேறு. அன்புக்காக ஏங்கி கிடக்கிறாள் பிரான்ஜா.

பிரான்ஜாவின் கார் அடிக்கடி விபத்தில் சிக்க கஜாவின் ஷெட்டுக்கு வருகிறது. அதை பழுது பார்க்கும் வேலை ஜிரோவிற்கு. இந்த சூழ்நிலையில் ஜிரோவும் பிரான் ஜாவும் நெருங்கி பழகுகிறார்கள். தனது குரு கஜா சொல்லி கொடுத்த ஐடியாக்கள் எல்லாம் ஒர்க் அவுட் ஆகிறது. பிரான்ஜாவும் ஜிரோவின் அன்பில் அடைக்கலமாகிறாள். அடிக்கடி சந்திப்பும் நிகழ்கிறது.

குரோசிய நாட்டு பாப் பாடகி செவரினாவின் தீவிர ரசிகர் கஜா. ஏன்..? பக்தர் என்றே சொல்லலாம். கஜாவிற்கோ நீண்ட நாள் கனவு ஒன்று உண்டு. அதாவது செவரினாவின் இசை கச்சேரியை நேரில் காண வேண்டுமென்பதே. அவளது போஸ்டருக்கு சூடம் கொளுத்தாத குறையாய் தினமும் ஒர்க் ஷாப்பில் வைத்து பூஜித்து வருகிறார்.

கஜாவின் எண்ணப்படியே செவரினாவின் இசை கச்சேரி உள்ளூரில் நடக்க இருப்பதாய் செய்தி வரவே துள்ளி குதிக்கிறார்.கஜா.

இதையறிந்த லிபேக் செரினாவின் மானேஜர் தன் நண்பன் என்றும் எப்படியாவது டிக்கெட் தருவதாய் உறுதியளிக்கிறான். அதை தவிர செரினாவுடன் ஒரு இரவு விருந்துக்கும் ஏற்பாடு செய்வதாய் உறுதியளிக்கிறான். ஆனால் அதற்கெல்லாம் பிரதிபலனாய் தனது பழைய காரை பத்து பைசா செலவில்லாது புதிய காராக மாற்றி தரவேண்டும் என்பதே நிபந்தனை.

டீலா.. ?? நோ டீலா ..?? என்கிறான் லிபேக்.

ஏற்கனவே பல முறை ரிப்பேர் செயததற்கு பணம் பாக்கி என்று கோபித்து கொள்கிறார் கஜா. கணக்கு எப்ப்பவோ சரியாகி விட்டது என்கிறான் லிபேக். இருவருக்கும் சண்டை முற்றவே நண்பர்கள் தலையிட்டு பஞ்சாயத்து செய்கின்றனர்.

பல நாள் கனவை கைவிட முடியாமல் உள்ளுக்குள் புகைந்து கொண்டே
டீல் என்று ஒப்பு கொண்டு அந்த நாளுக்காக காத்திருக்கிறார் கஜா.

காரை பழுது பார்க்கும் பணியும் தொடங்கி விட்டது. அதற்காக லிபேக்கின் மனைவி பிரான்ஜாவும் அடிக்கடி ஒர்க் ஷாப்பிற்கு வருகிறாள். மாடியிலே தனியறையில் இருவரும் பொழுதை கழிக்கினறனர். இந்த விஷயம் அரசல் புரசலாக கஜாவிற்கு தெரிய வருகிறது. லிபேக்கின் மீதுள்ள கடுப்பால் கண்டும் காணாமல் இருக்கிறார்.

ஆனால் லிபேக்கால் ஜிரோவிற்கு ஆபத்து வரலாம் என்று எச்சரிக்கிறார். முன் பாதுகாப்புக்காக ஒரு துப்பாக்கியையும் அவனிடம் தருகிறார். முதலில் கொஞ்சம் மிரண்டு போகிறான் ஜிரோ. எதற்கும் ஜாக்கிரதையாய் இரு என்று அறிவுரை கூறுகிறார்.

பயத்திலும் ஜிரோ பிரான்ஜா காதல் தொடர்கிறது.

இசைகச்சேரி நடைபெறும் நாளும் வருகிறது. டிப்டாபாக உடையணிந்து நண்பர்களுடன் ஆவலுடன் கச்சேரிக்கு செல்கிறார் கஜா. அளவில்லா மகிழ்ச்சியுடன் தனது கனவு தேவதையை நேரில் கண்டு இசை கச்சேரியை மெய்மறந்து ரசிக்கவும் செய்கிறார்.

மறுநாள் இரவு கஜாவின் ஒர்க் ஷாப்பிற்கே செரினா வர இருப்பதாகவும் அவருடன் டின்னர் முடித்து அவருடன் தங்க இருப்பதாய் கூறவே ஆனந்த கூத்தாடுகிறார் கஜா.

நம்ம ஊரில் ஆயுத பூஜைக்கு அலங்கரிப்பது போல ஒர்க் ஷாப்பை அலங்கரிக்கிறார். எல்லா வித ஏற்பாடுகளையும் கண்ணும் கருத்துமாய் செய்து விட்டு இரவு முழுவதும் காத்திருக்கிறார் கஜா.

காத்திருந்து காத்திருந்து காலங்கள் போனதடின்னு பாடாத குறை தான். விடியற்காலை ஒரு கார் வந்து நிற்கிறது. அதிலிருந்து இறங்குகிறாள் ஒரு பெண். அது செவரினா தானா ? கஜாவால் நம்ப முடியவில்லை. . பாதி தூக்கத்திலிருக்கிறார் கஜா. ஆனாலும் தனது கனவு தேவதை வந்ததையெண்ணி உற்சாகத்தில் குதிக்கிறார்.

இருவருக்கும் இனிய இரவாகிறது. பெரு மகிழ்ச்சியில் அமைதியாய் காலையில் காத்திருக்கிறார்.

ஜிரோவை காணவில்லை. விடிந்ததும் வருகிறான். நடந்ததையெல்லாம பெருத்த மகிழ்ச்சியுடன் அவனிடம் கூறுகிறார். I had Rooster's breakfast என்று கூறி அதன் அர்த்ததையும் வெட்கத்துடன் கூறுகிறார் கஜா.

எதற்கும் பதிலோ ஆமோதிப்பா இல்லாமல் மெளனமாய் அமர்ந்திருக்கிறான் ஜிரோ. மெளனத்தின் அர்த்தம் புரியாமல் இரவு எங்கு போனான்.. ஏன் வரவில்லை என்று அவனை கேள்விகளால் துளைத்து எடுக்கிறார் கஜா. நீண்ட நேர மொளனத்திற்கு பிறகு கஜா ஏமாற்றப்பட்ட விஷயத்தை போட்டு உடைக்கிறான் ஜிரோ.

இரவு அவன் பிரான்ஜாவுடன் இருந்ததாகவும் இங்கு வந்தது செவரினாவே இல்லை என்றும் அவளை போலவே தோற்றமளிக்கும் வேறு ஒரு மாடல் அழகி என்றும் கூறுகிறான். இதையெல்லாம் கூறியது பிரான்ஜா என்றும் கூறுகிறான்.

மனம் உடைந்து போய் தனியே அமர்ந்து கொள்கிறார். அந்த நேரம் பார்த்து லிபேக் அங்கு வருகிறான். வந்ததும் ஜிரோவின் கையில் கட்டியிருக்கும் செயினை காண்கிறான். அது பிரான்ஜாவுடையது. அவனுக்கு அனைத்தும் புரிந்து விட்டது.. ஆனால் அது தெரியாமல் லிபேக்கிற்கு சிகரெட்டை நீட்டுகிறான் ஜிரோ.

ஆத்திரத்துடன் லிபேக் ஜிரோவை தாக்க முற்படுகையில் உள்ளேயிருந்து வந்த கஜா லிபேக்கை சுட்டு தள்ளுகிறார் கஜா. அதிர்சியும் வேதனயுடன் கண நேரத்தில் நடந்ததை புரிந்து கொள்ளவும் முடியாமல் திகைத்து போகிறான் ஜிரோ.

கஜா கைதாகி சிறையில் இருக்க பிரான்ஜாவுடன் அவளது மகனையும் சேர்த்து கொண்டு செவ்வனே ஷெட்டை நிர்வகிக்கிறான் ஜிரோ.

ஒரு நாள் சிறையில் சென்று கஜாவை பார்க்கிறான். கஜா தனக்கு பிடித்த ஒயினையும் பழங்களையும் அடுத்த முறை வரும் போது வாங்கி வர சொல்கிறார். தான் மகிழ்ச்சியாய் இருப்பதாய் வெளியில் வரும் வரை ஷெட்டை கவனத்துடன் பார்த்து கொள்ள அறிவுரை கூறுகிறார் கஜா.

இன்னும் அவரை புரிந்து கொள்ள முடியாதவனாய் கஜாவை வியந்து எண்ணியபடியே ஊரை நோக்கி பயணிக்கிறான் ஜிரோ.

கஜாவாக நடித்த Vlado Novak. நடிப்பு மிக மிக யதார்த்தம். நடிப்பு கலையை முறையாக பயின்றவர். மிக்சிறந்த நாடக நடிகர். நூற்றுக்கும் மேற்பட்ட நாடகங்களிலும் தொலைகாட்சி தொடர்களிலும் நடித்தவர். பல வித உணர்ச்சிகளை அத்தனை இயல்புடன் நடித்திருப்பதை எத்தனை பாராட்டினாலும் தகும்.

ஸ்லோவினிய நாட்டு திரைப்படமான இந்த திரைப்படம் வெளிவந்தது 2007.

இந்த நாடு யூகோஸ்லோவியாவிலிருந்து 1992 தான் பிரிந்து தனிநாடாகியது. இந்த நாட்டின் மிகப்பெரிய ஹிட் படங்களுள் ஒன்று. ஐந்து சர்வதேச விருதுகளையும் வென்றுள்ளது.

இத்திரைப்பத்தை இயக்கியிருப்பவர் Marko Naberšnik. 1996முதல் குறும்படங்களை இயக்கி வருபவர். திரைப்பட இயக்கத்தை முறையாக பயின்றவர். 2000ம் ஆண்டு இவர் இயக்கிய With Love என்ற குறும்படம் பல விருதுகளை வென்றது. இவர் இயக்கிய முதல் முழூ நீள திரைப்படம் இது.

சந்தர்ப்பம் கிடைத்தால் கண்டிப்பாக பாருங்கள்.

வழக்கப்படி பார்க்க டிரைலர் இங்கே

The Pope's Toilet

2010-02-20T12:59:00.000-08:00

பீட்டோ தன் மனைவியுடனும் ஒரே செல்ல மகளுடனும் லத்தீன் அமெரிக்க நாடான உருகுவே நாட்டில் உள்ள மெலோ என்ற சிறிய ஊரில் வசித்து வருபவன். மெலோ பிரேசில் நாட்டின் எல்லையை ஒட்டியுள்ளதால் சைக்கிளில் கூட சென்று வரலாம்.

விவசாய நாடான உருகுவேயில் வெளி நாட்டு பொருட்கள் விற்பனை செய்ய தடை செய்யப்பட்டுள்ளது. போதிய படிப்பும் சொந்தமாக நிலமும் இல்லாத பீட்டோவிற்கு வெளிநாட்டு பொருட்களை சைக்கிள் மூலம் கடத்தி வருவதே வேலை. பெருமளவு பொருட்கள் பிரேசில் நாட்டிலிருந்து கடத்தி வரப்படுகிறது. தினசரி வியாபாரிகளுக்கு தேவையான பொருட்களை தினமும் 60 கி.மீ தூரத்திலிருந்து சைக்கிளில் கொண்டு வர வேண்டும். சாலை வழியாக வர இய்லாது. எல்லையோரத்தில் இராணுவ சோதனை முகாமும் சுங்கச்சாவடியும் உண்டு. வயல் வெளி மூலம் தான் ஊரை சுற்றி 60 கிலோ மீட்டர்களை ஒவ்வொரு முறையும் சைக்கிள் மிதித்து கடக்க வேண்டும். தினசரி குறைந்த பட்சம் இரண்டு மூன்று டிரிப் அடித்தால் தான் சாப்பாட்டுக்கே வழி. வறுமை வேறு.

பீட்டோவின் மகளான சில்வியாவிற்கு தன் தந்தையின் தொழில் அறவே பிடிக்கவில்லை. ஆனால் எப்போதும் தந்தையின் மீது கோவம் கொண்டு இருக்கிறாள். அவளுக்கு நன்கு படித்து நியூஸ் ரிப்போர்ட்டராக வர வேண்டும் என்பதே ஆசையும் கனவுமாக இருக்கிறது. சதா கையில் கிடைத்த பொருட்களை வைத்து கொண்டு மைக்கில் பேசுவது போல பேசி கொண்டே இருக்கிறார்கள். தன் வருமானத்தில் அவ்வளவு படிக்க வைக்க இயலாதென்று அடிக்கடி பீட்டோ கூறவே சில்வியாவிற்கு தந்தை மீது தீராக்கோபம்.

ஒரு நாள் திடீரென்று ஒரு மகிழ்ச்சியான செய்தி வருகிறது. அதாவது புனித போப்பாண்டவர் இவர்கள் ஊருக்கு வரப்போவதாக வானொலியிலும் தொலைகாட்சிகளும் செய்தி வரவே மக்கள் மகிழ்ந்து போகிறார்கள். ஊடகங்களுக்கு இந்த ஒரு செய்தி போதாதா..? தினம் தினம் 24 மணி நேரமும் இதை பெற்றி செய்தி குறிப்புகளும், நடக்கப்போவது என்ன..?? சிறப்பு பார்வைகள் என்று சகட்டு மேனிக்கு நிகழ்சிகளை நடத்துகின்றனர்.

அது தவிர போப்பின் வருகையால் முப்பது முதல் நாப்பதாயிரம் வரை பெருமளவு பக்தர்களும் மெலோ நகரக்கு வரப்போவதாக அறிவிக்கின்றனர். ஊர் மக்களின் சந்தோஷ மிகுதியால் இந்த சந்தர்பத்தை எப்படியாவது பயன் படுத்தி நாலு காசு பார்த்து விட வேண்டும் என்பதில் குறியாக உள்ளனர். ஒவ்வொரு வீட்டிலும் ஐடியாக்கள் குவிகின்றது.

வரப்போகும் ஆயிரமாயிரம் மக்களுக்கு என்னென்ன தேவை என்று பட்டியிலிட்டு அவரவர் ஆயுத்தமாகின்றனர். தேநீர் க்டை, பிஸ்கெட் தயாரிப்பு, பலூன் விற்பனை, பேட்ஜிகள், உருவப்படங்கள், நினைவு பொருட்கள், போப்பின் போஸ்டர்கள் என தயாரிப்பு வேலைகளில் ஈடுபட பீட்டோவிற்கு ஒரு யோசனையும் உதிக்கவில்லை.

பீட்டோவின் வீட்டில் சரியான கழிவறை வசதியில்லை. ஊரில் வசிக்கும் மக்களுக்கே சரியான வசதியில்லாத போது போப்பின் வருகையை ஒட்டி வரப்போகும் 30 ஆயிரம் பேருக்கு எப்படி வச்தி கிடைக்கும் என்று நினைக்கிறான். அதனால் ஒரு கழிவறை கட்டி அதன் மூலம் சம்பாதிக்கலாம் என்று திட்டம் போடுகிறான். இது தான் மிக்ப்பெரிய ஐடியாவாகவும் பண்ம் கொட்ட போகிறது என்று மனைவியிடமும் கூறுகிறான். முதலில் சந்தேகத்துடன் நடக்குமா..?? என்கிறாள். ஆனால் பீட்டோவின் பேச்சிலும் நம்பிக்கையிலும் மயங்கி அவளும் சம்மதிக்கிறாள்.

ஆனால் கழிவறை கட்ட காசு வேண்டுமே. இன்னும் பல டிரிப்களை அடிக்க ஒப்பு கொள்கிறான். ஓய்வு ஒழிச்சல் இல்லாமல் உழைத்து சிறிது பணமும் சேர்க்கிறான். இதற்கிடையே ஒரு நாள் சுங்கச்சாவடி சோதனையில் மாட்டி கொள்கிறான். சாவடியில் மொத்த பொருட்களையும் இழக்கிறான். தொடர்ந்து டிரிப் அடிப்பதால் இவன் மீது ஒரு கண் வைக்குமாறு உயர் அதிகாரி உத்தரவிடுகிறார். வெறுப்பிலும் விரக்தியிலும் நண்பர்களுடன் சேர்ந்து கொண்டு மது அருந்தி கலாட்டா செய்கிறான். இதை அறிந்த வியாபாரிகள் அவனுக்கு டிரிப் தர விரும்பவில்லை.

ஒவ்வொரு வீட்டிலும் ஏற்பாடுகள் நடந்து கொண்டிருக்க கழிவறையை கட்ட எப்படியாவது தொடங்க வேண்டும் என்று பீட்டோவிற்கு படபடப்பு அதிகமாகிறது. மற்றொரு சுங்கசாவடி அதிகாரி பீட்டோவிற்கு உதவ முயலுவதாகவும் ஆனால் அவருக்காக சில பொருட்களை கடத்தி வரவேண்டும் என்று யோசனை சொல்கிறான் நண்பன் ஒருவன். எப்படியாவது வேலை கிடைத்தால் சரி என்று சம்மதிக்கிறான் பீட்டோ. சிறிது முன் பணமும் கடனாக அளிக்கவே மகிழ்ச்சியுடன் கழிவறை கட்டட வேலைகள் ஆரம்பிக்கிறான். அக்கம் பக்கத்து வீட்டிலுள்ளவர்களும் பீட்டோவிற்கு கட்டட வேலையில் உதவுகின்றனர்.

நாளக்கு நாள் ஊடகங்கள் செய்திகளை அள்ளி கொட்டி கொண்டேயிருக்கின்றன. வீதி வீதியாக மக்களிடமும் வியாபாரிகளிடமும் என்ன பொருட்கள் விற்க போகிறார்கள் என்று கேட்டு பேட்டிகளை ஒளிப்ரப்ப மெலோ நகர மக்களின் மகிழ்ச்சிக்கு அள்வேயில்லை. வங்கியிலும் செல்வந்தர்களிடமும் அதிக வட்டிக்கு பணம் வாங்கி பொருட்களை மற்ற ஊர்களிலிருந்து வாங்கி குவிக்கின்றனர்.

போப்பின் வருகையின் நாள் நெருங்க நெருங்க ஊரே ஆரவாரமாயிருக்கிறது. பீட்டோவின் கழிவறை கட்டும் பணியும் வெகு வேகமாக நடக்கிறது. முக்கால் வாசி வேலை முடிந்து விட்ட நிலையில் கதவு மட்டுமே பொருத்த வேண்டும். ஆனால் கையில் காசில்லை. இன்னும் பல டிரிப்களை அடித்த வண்ணம் இருக்கிறான்.

சுங்கச்சாவடி அதிகாரியிடம் கடன் பெற்றதும் அவருக்காக கடத்தல் செய்வதும் மகள் சில்வியாவிற்கு தெரிந்து விடுகிறது. ஏற்கனவே தந்தையின் மீது இருக்கும் கோபம் அதிகரிக்க வீட்டில் வந்து தாயிடம் முறையிடுகிறார்கள். இனி பீட்டோவிடம் பேசுவதில்லை என்று இருவரும் அவனை புறக்கணிக்கின்றனர். உங்களுக்காக இத்தனை கஷ்டங்களையும் படுவதாக நொந்து கொள்கிறான் பீட்டோ. தன் குடும்ப நிலையையும் வறுமையும் தன் அருமை மகளின் நிராகரிப்பும் பீட்டோவிற்கு அதிக மன வேதனையளிக்கிறது. கழிவறை கட்ட அவனிடம் கடன் வாங்கியிருக்கிறேன். அதன் அடைத்தவுடன் அவனிடம் போக மாட்டேன் என்கிறான் பீட்டோ.

அதை எப்படி அடைப்பது என்று வேதனையுடன் கேட்கவே மகளின் கல்லூரி படிப்புக்காக தான் நெடுநாளாக சேமித்து வைத்திருந்த மொத்த பணத்தையும் கொண்டு வந்து கொடுக்கிறாள் மனைவி. அதில் சிறிது பணத்தை கடனுக்காக அடைத்து விட்டு மீத் பணத்தில் கழிவறைக்கு கதவு வாங்குகிறான். போப்பின் வருகையால் இன்னும் கூட்டம் அதிகரிக்க கூடும் என்றும் பக்தர்களின் வருகை ஐம்பதாயிரத்தை கூட தாண்டலாம் என்று ஊடகங்கள் ஆருடம் சொல்கின்றன.

கழிவறை உபயோகிக்க வரும் கூட்டத்தை எப்படி வரவேற்பது, அவர்களிடம் எப்படி பேசுவது, பணத்தை வசூல் செய்வது என்று மனைவிக்கும் மகளுக்கும் வகுப்புகள் எடுத்து ஒத்திகை பார்க்கிறான் பீட்டோ. இன்னும் சில டிரிப்புகள் மட்டுமே அடித்து விட்டால் நல்ல தொகை கிடைத்து விடும் ஆனால் தொடர்ந்து சைக்கிள் ஒட்டுவதால் பீட்டோவின் முழங்கால் பாதிக்க ப்டுகிறது. வலியும் அதிகரிக்கிறது. பெரிய துணி ஒன்றை கட்டி கொண்டு சில டிரிப்களை முடிக்க ஆயத்தமாகிறான்.

நாளை போப் வரும் நாள் என்று அறிவிப்பு வந்தாயிற்று. கழிவறைக்கு வேண்டிய பீங்கானை இன்னும் பொருத்தவில்லை. அதை வாங்க சைக்கிளில் பறக்கிறான். கையில் இருந்த காசையெல்லாம் செலுத்தி வாங்கியும் விடுகிறான். சைக்கிளில் கட்டி கொண்டு வழியில் திரும்பும் போது சுங்க அதிகாரி தம்மிடம் பெற்ற கடனை திருப்பி செலுத்த நிர்பந்திக்கிறார். இனி அவருக்கு வேலை செய்ய போவதில்லை என்று அறிந்ததும் ஆத்திரம் கொண்டு பீட்டோவை கடுமையான தாக்குவதுடன் சைக்கிளையும் அபகரித்து செல்கிறார்.

போப் வந்தாயிற்று என்று தொலைகாட்சிகளில் நேரடி ஒளிப்பரப்பும் தொடங்கியாயிற்று. செய்வதறியாது பீட்டோ கழிவறை பீங்கானுடன் வீடு நோக்கி ஒடுகிறான். இதை டிவியில் பார்த்த மகள் சில்வியாவின் கண் கலங்குகிறாள்.ஆனால் ஊருக்குள் வந்ததும் கூட்டமே காணவில்லை. மிக குறைந்த அளவே பக்தர்கள் வந்துள்ளனர். ஊடகங்கள் மட்டுமே நிரம்பி வழிகின்றன. வந்த பக்தர்களும் கூட போப்பின் பேச்சை மட்டும் கேட்டு விட்டு கிளம்ப தயாராகின்றனர்.

ஊர் மக்கள் அனைவரும் நொடித்து போகின்றனர். வந்த விலைக்கு தின் பண்டங்களை கூவி கூவி விற்க தொடங்குகின்றனர். பாதி கூட விற்பனையாகவில்லை. அனைத்து பொருட்களும் வீணாகின்றன. பீட்டோவின் கழிவறையை எட்டி பார்க்க கூட எவருமில்லை.

போப்பும் கிளம்பி போய் விடுகிறார். அனைத்து தின் பண்டங்களும் நாய்களுக்கும் பன்றிகளுக்கும் உணவாகிறது. மிச்சமிருந்த தின் பண்டங்களை தின்ன கூட அந்த சிறிய ஊரில் மிருகங்கள் இல்லை. ஊரே கடனாளியாகி சொல்ல முடியாத வேதனையில் துடிக்க அவர்க்ள் வாழ்வே போப்பின் வருகையால் வீழ்ந்து போனதாக நினைக்கின்றனர்.

ஊடகங்களின் அதீத கற்பனையும் விளம்பரமும் ஒரு ஊரின் வாழ்வாதாரத்தையே சூறையாடி விட்டது. பொறுப்பு வாய்ந்த ஊடகங்களின் பொறுப்பற்ற விளம்பர மோகத்தால் தமது வாழ்நாள் முழுவதும் உழைத்து வட்டி கட்ட வேண்டிய நிலைமைக்கு ஆளாகின்றனர். இதற்கு யார் பொறுப்பாக முடியும் என்ற கேள்வியோடு திரைப்படம் முடிகிறது.

2007ல் வெளியான இந்த லத்தீன் அமெரிக்க சினிமா 1998ல் போப்பின் பயணத்தின் பின்னணையில் ஏற்பட்ட சில உண்மை சம்பவங்களால் உருவானது. இத்திரைப்படத்தை César Charlone & Enrique Fernández இருவர் இணைந்து எழுதி இயக்கியுள்ளனர்.

இருவரில் Cesar மிகச்சிறந்த ஒளிபபதிவாளர். ஆஸ்கருக்கு பரிந்துரைக்கப்பட்டவர். ஒளிப்பதிவில் பல சர்வதேச விருதுகளை பெற்றவர் என்று திரைப்படம் பார்ப்பவர்களுக்கு சொல்ல தேவையில்லை. அத்தனை ரம்மிய்மான ஒளிப்பதிவுகள். பல காட்சிகள் இயற்கை ஒளியிலேயே படமாக்கப்பட்டுள்ளன. மலைகளும், ஓடைகளும் இயற்கை காட்சிகளை தன் காமிராவால் கண் முன்னே நிறுத்துகிறார். பீட்டோ ஒவ்வொரு முறையும் சைக்கிளில் செல்லும் போது அமைக்கப்பட்ட காட்சியமைப்புகளை விவரிக்க வார்த்தைகளில்லை.

திரைப்ப்டத்த்தில் நடிப்பும் பாத்திரங்களின் படைப்பும் அனைத்தும் யதார்த்தமாக சொல்வதுடன் தமது நோக்களிலிருந்து மாறாமல் திரைக்கதையை அமைத்துள்ளார்கள் ஆசிரியர்கள். ஒவ்வொரு பாத்திர படைப்பும் தமது மன்சாட்சியை பிரதிபலிப்பதாயும் பீட்டோவும் மகளின் பாத்திர படைப்புகள் மூலம் வெளியாகிறது. குறைந்த வசனங்களுடன் கவித்துவமான காட்சிகளை கொண்ட லத்தீன் அமெரிக்க திரைப்படங்களுக்கு இந்த திரைப்படம் ஒரு மிகச்சிறந்த உதாரணம்.

மகள் தன் மீது கோவம் கொண்டாலும் மகளின் மீதான அன்பும் மனைவியின் மீதான காதலும் பீட்டோவிற்கு இம்மியளவும் குறையாது மகளின் விருப்பபடி கடைசியில் அவன் இனி வேறு வேலை பார்ப்பதாக கூறும் காட்சி நெகிழ்வை தருகிறது.

பிரேசில்,மெக்ஸிகோ,கேன்ஸ் என்று பத்திற்கும் உலக பட விழாக்களில் பங்கு பெற்று பரிசை தட்டி சென்றுள்ளது என்றாலும் சர்ச்சைக்குரிய பெயர் என்று குறிப்ப்டபட்டு ஆஸ்கார் பட்டியலில் இடம் பெறாமல் போனது வருத்தமான செய்தியுமாகும்.

சந்தர்ப்பம் கிடைத்தால் கண்டிப்பாக பாருங்கள்.

உடனே பார்க்க டிரைலர் இங்கே

Maria Full Of Grace {Spanish}

2010-02-17T10:27:00.000-08:00

வர்ணிக்க முடியாத அழகுடன் பதினேழு வயது நிரம்பிய மரியா கொலம்பியாவில் வசித்து வருபவள். வயதான தாயும் மரியாவின் சகோதரியும் குழந்தையுடன் வீட்டிலிருக்க குடும்ப ஏழ்மை காரணமாக ரோஜாக்களை ஏற்றுமதி செய்யும் நிறுவனத்தில் வேலை செய்து குடும்பத்தை காப்பாற்றுகிறாள் மரியா. சகோதரிக்கு குழந்தை பிறந்ததும் அவளை விட்டு விட்டு ஒடி விட்டான் அவளது கணவன். குடும்பச்சுமை முழுவதும் மரியா மீது விழுகிறது.

பதின்ம வயதினளானதால் மரியாவிற்கு ஒரு காதலனும் உண்டு. அவனுடன் நெருங்கியும் பழக ஆரம்பிக்க கர்பவதியாகிறாள். அதனால் வேலையில் சரியாக ஈடுபட முடியவில்லை. முதலாளியிடம் கோவித்து கொண்டு வேலையை விட்டு விடுகிறாள்.

அம்மாவிற்கும் அக்காவிற்கும் மரியா மீது அளவற்ற கோபம். வீட்டு சூழ்நிலையை புரிந்து கொள்ளவில்லை என்று திட்டி தீர்க்கிறார்கள். தன் காதலையும் கர்ப்பத்தையும் சொல்ல முடியாது தவிக்கிறாள் மரியா. வேறு வேலைக்கு எவ்வளவோ முயற்சி செய்தும் எதுவும் கிடைத்தபாடில்லை. காதலனோ பயந்து போகிறான். அவளை திருமணம் செய்யவும் தயங்குகிறான். காதலனுடன் சண்டையிட்டு பிரிந்தும் விடுகிறாள்.

செய்வதறியாது தவிக்கும் வேளையில் காதலனின் நண்பன் ஒருவன் ஒரு வேலை இருப்பதாகவும் ஆனால் அதற்கு நல்ல பணம் கிடைக்கும் என்று கூறுகிறான். சரி என்கிறாள். ஆனால் போதை மருந்தை அமெரிக்காவிற்கு கடத்தும் படு பயங்கரமான வேலை என்று முதலில் அறியாது அப்பாவியாக ஒப்பு கொள்கிறாள் மரியா. அதுவும் எப்படி..? பவுடர்களை ரப்பரில் அடைத்த மாத்திரைகளாக முழுங்க வேண்டும் என்பதே ஏற்பாடு. அதிக ரிஸ்கானதும் கொஞ்சம் தவறினால் உயிருக்கே உலையாகும் என்று அறிந்ததும் முதலில் சற்று பயந்தும் குழம்பியும் போகிறாள்.

குடும்பத்தில் வறுமை..வேலை இல்லை..காதலில் தோல்வி..திருமணமாகவில்லை.. வயிற்றில் குழந்தை.. இவைகளை விட ஒரு பெண்ணுக்கு வேறு என்ன கொடுமைகள் வேண்டும்...???

எந்த ரிஸ்க்கும் எடுக்க தயாராகிவிட்டாள் மரியா.

பெரிய திராட்சை பழங்களை பல்லில் படாமல் விழுங்கும்படி ரோஸி என்ற பெண் மரியாவிற்கு பயிற்சி அளிக்கிறாள். ரோஸி பல முறை போதை மருந்து கடத்தலில் ஈடுபட்டவள். அவளது சகோதரி அமெரிக்காவில் வசிப்பவள். அவளை காணும் ஆசையில் ஒரு முறை செல்ல முயற்சி செய்து பின் தன் குற்ற உணர்சியால் சகோதரியை காணாமலே பல முறை சென்றும் வந்து விட்டவள்.

மரியாவுடன் ரோஜா ஏற்றுமதி கம்பெனியில் வேலை பார்த்த பிளான்கா {Blanca} என்ற பெண்ணும் இதே தொழிலில் இறங்க முடிவெடுத்து மரியாவுடன் பயணமாக நினைக்கி. மரியாவிற்கு அவள் வருவது மிகவும் ஆபத்தானது என்று எவ்வளவோ எடுத்து கூறுகிறாள். ஆனால் பிளான்காவோ பணத்திற்கு ஆசைப்பட்டு வந்தே தீருவேன் என்று அடம் பிடிக்கிறாள்.

மரியா இந்த போதை கடத்தலில் அமெரிக்காவின் விமான நிலையத்தில் பிடிபட்டாளா? அவளுடன் கூட வந்த பெண்களுக்கு ஏற்பட்ட நிலை என்ன..? வாழ்வா சாவா என்பதே சொல்ல முடியாத சோகங்களுடன் கூடிய சன்பென்ஸ் நிறைந்த மீதிக்கதை.

விசா, டிக்கெட், தங்குமிடம், பார்க்க வேண்டிய நபர்கள், செய்ய வேண்டிய விஷயங்கள் அனைத்தும் ரெடி என்று ஆர்டர் வருகிறது.

அமெரிக்காவில் காரியதரிசி வேலை கிடைத்து விட்டதாக வீட்டில் கூறி விட்டு 62 மாத்திரைகளை விழுங்கிய படி முதன் முறையாக அமெரிக்காவிற்கு பயணமாகிறாள் மரியா. அவளுக்கு பயிற்சி அளித்த ரோஸியுடனும் பிளான்காவுடனும் விமானத்தில் தயங்கியபடியே பயணமாகிறாள். இவர்கள் மூவர் தவிர இன்னொரு பெண்ணும் அதே விமானத்தில் வருவதாக மரியாவிடம் கூறுகிறாள் பிளான்கா.

விமானத்தில் ரோஸிக்கு உடல் நிலை பாதிக்க படுகிறது. படபடப்பும் அதிகமாகிறது.ஆனால் ஒருவரோடு ஒருவர் பேசி கொள்ள முடியாமல் மூவரும் தவித்து போகின்றனர். இந்த படபடப்பில் தங்க வேண்டிய ஹோட்டலின் முகவரியை தொலைத்து விடுகிறாள் மரியா. ரோஸி ஆவணங்களில் தன் சகோதரியின் முகவரியை குறிப்பிடும் படி கூற விசா பேப்பர்களை மரியா சமர்பிக்கிறாள்.

விமானம் அமெரிக்காவை அடைந்தும் விடுகிறது.விமான நிலையத்தில் அவரவர் பெட்டிகளுக்காக காத்திருக்கும் வேளையில்..

மரியாவை மட்டும் தனியாக இடை மறித்து பெண் காவலர் துணையுடன் ஒரு தனி அறைக்கு அழைத்து செல்கிறார் உயர் போலிஸ் அதிகாரி....

அழைத்து செல்லப்பட்ட மரியாவை பெண் போலிஸ் பரிசோதிக்கிறார். அமெரிக்காவிற்குள் போதை மருந்துகளை கடத்தி வருவது மிகப்பெரிய குற்றம் என்றும் உடலில் ஏதேனும் கடத்தி வந்திருக்கிறாயா..? என்றும் கேள்வி கேட்கிறார்.எதுவும் இல்லை என்று அழுத்தமாக மறுக்கிறாள் மரியா. ஆனால் அவர்களுக்கோ சந்தேகம் தீர்ந்தபாடில்லை.

மரியாவை எக்ஸ்ரே பரிசோதனைக்குள்ளாக்க முடிவு செய்து அவளிடம் ஒப்புதலும் வாங்குகின்றனர். ஆனால் மரியா கர்ப்பமுற்றிருப்பதாக அறிந்ததும் எக்ஸ்ரே பரிசோதனை செய்ய இயலாது என்று கூறி அவளை விடுவிக்கின்றனர். ஆனால் மரியா, ரோஸி, பிளான்கா தவிர விமானத்தில் பயணித்த மற்றொரு பெண் போலிஸில் மாட்டி கொள்கிறாள். அவளை விலங்கிட்டு அழைத்து சென்று விடுகின்றனர். மரியாவை விடுவிதத்து குறித்து அவளுக்கு மகிழ்ச்சி என்றாலும் அந்த பெண்ணை கைவிலங்கிட்டு அழைத்து சென்றது மரியாவை சற்று உலுக்கிவிடுகிறது. பயமும் அதிர்ச்சியும் இருந்தாலும் எதையும் காட்டி கொள்ளாதவளாய் விமான நிலையத்தை விட்டு வெளியேறுகிறாள்.

மரியா, ரோஸி, மற்றும் பிளான்காவிற்காக காத்திருந்த கடத்தல்காரர்கள் இருவர் விமான நிலையத்தில் இருந்து அவர்களை வேகமாக அழைத்து செல்கின்றனர். ரோஸி வயிற்று வலியால் துடிக்கிறாள். மூவரையும் ஒரு ஹோட்டலில் தங்க வைக்கின்றனர். மரியா, பிளான்காவின் உடல்களிலிருந்து கழிவு மூலம் போதை பொருட்கள் அடைக்கப்பட்ட மாத்திரைகள் எடுக்கப்ப்டுகிறது. ரோஸிக்கு மருத்துவம் பார்க்க வேண்டும் என்று மரியா கடத்தல் காரர்களிடம் முறையிடுகிறாள். அவர்கள் எதையும் சட்டை செய்யாமல் அவளை தூங்கும்படி நிர்பந்திக்கின்றனர்.

களைப்பிலும் பயத்திலும் உறங்கி போகிறாள் மரியா. நடுஇரவில் கண் விழித்து பார்க்கையில் ரோஸியை கடத்தல் காரர்கள் தூக்கி செல்கின்றனர். ரோஸி இறந்து விட்டிருக்கலாம் என்று மரியா அஞ்சுகிறாள். தங்களையும் கொலை செய்து விடுவார்களோ என்று பயந்து போய் மரியாவும் பிளான்காவும் போதை மாத்திரைகளை அள்ளி பையில் போட்டபடி ஓட துவங்குகின்றனர்.

எப்படியோ இருவரும் சேர்ந்து ரோஸியின் சகோதரியின் வீட்டையும் கண்டு பிடிக்கின்றனர். பிளான்கா மரியா செய்தது தவறு என்று சண்டையிடுகிறாள். கடத்தலுக்கு உண்டான பணத்தை கூட பெறாமல் வந்து விட்டோமே என்று கடிந்து கொள்கிறாள். ரோஸியின் சகோதரி வீட்டிற்கும் வர மறுக்கிறாள். உன்னால் தொந்தரவு தான் என்று பிளான்காவை நொந்து விட்டு மரியா மட்டும் ரோஸியின் சகோதரி வீட்டிற்கு சென்று அறிமுகம் செய்து கொள்கிறாள்.

தான் வேலை தேடி அமெரிக்கா வந்ததாகவும் ரோஸிதான் அவளை அனுப்பி வைத்ததாகவும் கூறுகிறாள். தன் தங்கை மீதுள்ள் பாசத்தால் மரியாவிற்கு வேலை ஏற்பாடு செய்வதாகவும் அதுவரை இங்கேயே தங்கி கொள்ளலாம் என்று ரோஸியின் சகோதரியும் அவளது கணவனும் கூறவே மரியா அவர்களுடன் தங்குகிறாள். தனியே செய்வதறியாது தவித்த பிளான்காவும் பின்னர் அங்கேயே அடைக்கலமாகிறாள்.

இருவருக்கும் வேலை ஏற்பாடு செய்வதாய் சொன்ன ரோஸியின் சகோதரி அவர்களை வேலை வாங்கி தரும் ஏஜெண்டிடம் அழைத்து சென்று விட்டு விட்டு சென்று விடுகிறாள். பிளான்காவின் பையிலிருந்த போதை மருந்துகளை அவன் கவனித்து விடுகிறான். அது தவிர நகரில் நடந்த ஒரு முக்கியமான செய்தியையும் சொல்கிறார். போதை மருந்துகளை வயிற்றில் சுமந்து வந்த ஒரு பெண் இறந்து விட்டதாகவும் அவளின் வயிற்றை கிழித்து போதை மருந்துகளை எடுத்து கொண்டு அவளது பிணம் வீச்ப்பட்டதாகவும் தெரிவிக்கவே இருவரும் சில நிமிடம் உறைந்து போகின்றனர்.

ஏஜெண்ட் சந்தேகத்தின் பேரில் இருவரிடமும் கேள்விகள் கேட்கவே அங்கிருந்து வெளியேறுகின்றனர். கடத்தல் காரர்களுக்கு போன் செய்து ரோஸியை பற்றி விசாரிக்கின்றனர். அது மட்டுமில்லாது தங்களுக்கு சேர வேண்டிய பணத்தை கொடுத்தால் போதை மருந்துகளை ஒப்ப்படைப்பதாகவும் கூறவே சில நிமிடங்களில் பணத்துடன் வந்து சேர்கின்றனர் கடத்தல்காரர்கள்.

அவர்களிடம் போதை மருந்துகளை கொடுத்து சண்டையிட்டு பணத்தை பெறுகின்றனர் மரியாவும் பிளான்காவும். ரோஸியை பற்றி விசாரிக்கவே அவள் இறந்து விட்டாள் என்று அசட்டையாக சொல்லி விட்டு செல்லவே மீண்டும் ஏஜெண்டிடம் ஒடிப்போய் அனைத்து விபரங்களையும் சொல்கின்றனர். அவர் பதைத்து போகிறார். இருவருக்கும் ஏதாவது வேலை வாங்கி தருவதாக கூறி இந்த விஷயமெல்லாம் ரோஸியின் சகோதரிக்கு தெரியுமா என்று கேட்கவே இருவரும் மவுனமாகின்றனர்.

மரியாவிற்கு உடல் நிலை பாதிக்கிறது. தனியாக மருத்துவமனைக்கு சென்று பரிசோதிக்கிறாள். அவள் குழந்தை ஒரளவு வளந்து விட்டதால் வாராவாரம் பரிசோதனை செய்ய வேண்டும் என்று சீட்டு எழுதி கொடுக்கிறார் மருத்துவர். ஸ்கேன் செய்த குழந்தையின் படத்தையும் அளிக்கிறாள். நீண்ட நாள் கழித்து அனைத்து துயரங்களையும் மறந்தவளாய் புன் முறுவல் பூக்கிறாள் மரியா.

வீட்டை அடைந்ததும் ரோஸியின் சகோதரியிடம் நடந்தவற்றை சொல்ல நேரம் கிடைக்காது தவிக்கிறாள் மரியா. அதற்குள் ஏஜெண்ட் போன் செய்து அனைத்து விபரங்களையும் தெரிவிக்கவே இருவரையும் அடித்து துரத்தாதக் குறையாய் வீட்டை விட்டு வெளியேற சொல்கிறாள் ரோஸியின் சகோதரி. வாழ்க்கையே வெறுத்து போனவர்களாய் இருவரும் வெளியேறுகின்றனர். மீண்டும் திரும்ப ஊர் போய் சேரலாம் என்றும் முடிவெடுத்து டிக்கெட்டும் பதிவு செய்கின்றனர்.

ரோஸியின் உடல் அவளது சகோதரியிடம் ஒப்படைக்கப்பட்டது அறிந்து அவளுக்கு இறுதி மரியாதை செய்ய வருகிறாள் மரியா. அவளது உடலை காண முடியாது அழுகையும் துக்கமும் மரியாவை வாட்டி எடுக்கிறது. ரோஸியின் சகோதரியிடம் சிறிது பணத்தை அளித்து விட்டு விடை பெற்று செல்கிறாள் மரியா.

மரியாவும் பிளான்காவும் விமான நிலையம் அடைகின்றனர். போகிற வழி முழுவதும் தன் கருவில் உள்ள குழந்தையின் ஸ்கேன் செய்த படத்தை பார்த்தபடியே செல்கிறாள் மரியா. தன் குடும்ப நிலை குறித்த வருத்தங்களும் பிறக்க போகும் குழந்தை குறித்த சந்தோஷங்களும் அவளின் மனதில் நிழலாடுகின்றன.

டிக்கெட் பரிசோதனைகள் முடிந்து விமானத்திற்குள் ஏற முற்படுகையில் பிளான்கா முதலில் செல்ல மரியா பின் நோக்கி நகர்ந்து விமானை நிலையத்தை விட்டு வெளியே செல்லுவதாய் நடக்க காட்சிகள் உறைந்து திரைப்படம் முடிகிறது.திரைப்படம் முடிந்ததும் ஏதோ இனம் புரியாத ஒரு சோகம் நம்மையும் ஆட்டுவிக்கிறது.

மரியாவாக நடித்திருப்பது Catalina Sandino Moreno. இவரது அழகையும் இயல்பான நடிப்பையும் பாராட்ட வார்த்தைகளில்லை.

கொலம்பியாவில் பிறந்த இவர் விளம்பர துறையை விருப்ப பாடமாக பயின்று பின்னர் நடிப்பின் மீது ஏற்பட்ட காதலால் நியூயார்க் நகரத்துக்கு இடம் பெயர்ந்தவர். 2004ல் இந்த திரைப்படதிற்காக இயக்குநர் பல புது முகங்களை தேடிய போது 900க்கும் மேற்பட்ட புது முகங்களில் முதலாவதாக தேர்வு பெற்றவர். இயக்குநரின் தேர்வு எவ்வளவு சிறந்தது என்று இத்திரைப்படம் பார்த்ததும் அறிய முடிகிறது. இந்த திரைப்படத்தில் நடித்ததற்காக ஆஸ்கார் விருதுக்கும் பரிந்துரைக்கப்பட்டிருக்கிறார்.

இந்த அருமையான திரைப்படத்தின் இயக்குநர் Joshua Marston. அமெரிக்காவில் பிறந்து சிகாகோ பல்கலைகழகத்தில் அரசியல் வரலாறு பட்டபடிப்பு படித்து பத்திரிகை நிருபராக வாழ்க்கையை துவங்கியவர். இவரும் சினிமாவின் மீது ஏற்பட்ட அதீத காதலால் மீண்டும் கலை இலக்கியம் பயின்று சிறந்த திரைப்படத்தை இயக்க வேண்டும் என்று உறுதியுடன் முயன்று இந்த திரைப்படத்தை எழுதியும் இயக்கியும் வெற்றி பெற்றுள்ளார்.

2004ல் உருவான இந்த ஸ்பானிஷ் திரைப்படம் HBO நிறுவனத்தின் தயாரிப்பாகும். இந்த திரைப்படத்திற்கான திரைக்கதையை உருவாக பல போதை மருந்து கடத்தல் குற்றவாளிகளிடம் பேசி அவர்களது அனுபவங்களை அறிந்து கொண்டு இயக்கியுள்ளார்.

வாழ்க்கையின் கன பரிமாணத்தை அதன் அழுத்தம் குறையாமல் சுவாரசியமாகவும் எளிமையாகவும் படைத்திருப்பது ஒரு அதி உன்னத அனுபவமாய் அமைந்த திரைப்படம். மரியாவின் ஆசைகளும் நிராசைகளும் ஏக்கமும் சந்தோஷங்களும் துக்கமும் ஒரு அற்புத பாத்திர படைப்பாய் மிளிர்கிறது.

பெர்லின், சூடான் என்று பல உலக திரைப்பட விழாக்களில் பரிசை அள்ளியதுடன் 30க்கும் மேற்பட்ட உலக விருதுகளை வாரி குவித்துள்ளது.

உலக சினிமா விரும்பிகள் கண்டிப்பாக பார்க்க வேண்டிய திரைப்படம்.

சந்தர்ப்பம் கிடைத்தால் நிச்சயம் பாருங்கள்.

உடனே பார்க்க டிரைலர் இங்கே

Lila Says...

2010-02-09T10:57:00.000-08:00

Love is the answer, but while you are waiting for the answer, sex raises some pretty good questions.

சிமோ தொலை தூர அரபு தேசமொன்றில் தன் தாயோடு வசித்து வருபவன். வேலையுமில்லை. மேலே படிக்க வசதியுமில்லை. ஆனால் நல்ல எழுத்து வளம் உள்ளவன். பெரிய எழுத்தாளனாக வரவேண்டும் என்று கொஞ்சம் ஆவல் உண்டு.ஆனால் சகவாச தோஷத்தால் ஊர் சுற்றி திரிகிறான். சதா நண்பர்களுடன் சேர்ந்து கொண்டு ஊர் சுற்றுவதும் வெட்டி பேச்சும் சிமோவின் அம்மாவுக்கு பிடிக்கவில்லை.

சிமோவின் டீச்சர் பாரிஸீல் எழுத்தாளர்கள் இணைந்து ஒரு பயிற்சி பட்டறை நடத்துவதாகவும் அதற்கு தன்னால் ஏற்பாடு செய்ய முடியும் என்று வீடு தேடி வந்து கூறுகிறாள். அந்த பயிற்சி கிடைத்தால் சிமோ நிச்சயம் நல்ல எழுத்தாளனாக முடியும் என்று தான் நம்புவதாக கூறுகிறாள். ஆனால் பயிற்சியில் சேர சிமோ ஒரு நல்ல சிறுகதையை எழுதி கொடுக்க வேண்டும் என்று அதை அனுப்பி வைத்து அவள் ஆவன செய்வதாகவும் கூறுகிறாள்.

ஆனால் சிமோவின் தாயிடம் அதிகம் பணமில்லை. சிமோவவை அனுப்பி வைக்கவும் மற்ற செலவுக்கும் தனக்கு வசதியில்லை என்று கூறுகிறாள். தன் முனைப்பும் நாட்டமும் இல்லாமல் நண்பர்களுடன் கும்மாளமிடுவதிலேயே காலத்தை கழிக்கிறான் சிமோ. நண்பர்களில் மெளலத் முக்கியமானவன். நல்ல பணக்காரன். சிமோவிற்கு அவனே சதா செலவு செய்கிறான்.

அந்த ஊருக்கு மேற்கத்திய தேசத்திலிருந்து தனது அத்தையுடன் வந்து சேருகிறாள் லைலா. இளமையும் அழகும் கொண்ட தேவதையாக இருக்கிறாள்.

அவள் தெருவில் வலம் வரும் போதெல்லாம் இளைஞர்கள் ஒருமாதிரியாகத்தான் பார்க்கிறார்க்ள். ஏனென்றால் முந்தைய நாட்களில் அவளது அத்தையின் தொழில் அப்படி என்று கிசு கிசுக்கிறார்கள். இவளும் அப்படிதான் என்றும் எண்ணுகின்றனர்.

ஒரு நாள் சிமோ தனிமையில் பூங்கா ஒன்றில் அமர்ந்திருக்கும் போது அங்கே வருகிறாள் லைலா. அவனிடம் பேசவும் செய்கிறார்கள். பூங்கா ஊஞ்சலில் ஆடும் போது அவள் அழகை ரசிக்கவும் அதற்கு காசு கொடுக்கவும் வேண்டுமென்கிறாள். சிமோ சம்மதிக்கிறான்.

சிறிது நேரம் உரையாடிவிட்டு பட்டாம்பூச்சியாய் பறக்கிறாள். காமம் பற்றி லைலா அதிகம் பேசுகிறாள். பல வித உணர்ச்சிகளை குறிப்பிட்டு தனது முந்தைய அனுபவங்களையெல்லாம் சொல்லவே குழம்பி போகிறான். சிமோ. ஆனாலும் அவள் நினைவுகள் அவனை சுற்றிய வண்ணமே இருக்கிறது.

நண்பர்களிடம் அதிக நேரம் செலவிட முடியாது தவிக்கிறான். ஆனால் நண்பர்களோ அவளை அடைந்தே தீர வேண்டும் என்று சபதம் செய்கின்றனர்.

அதிலும் சிமோவின் நண்பன் மெளலத்திற்கு அவள் மீதுள்ள அதீத இச்சை அதிகரித்து கொண்டேயிருக்கிறது. அவள் தெருவில் வரும் போதெல்லாம் லைலாவை சீண்டி கொண்டே இருக்கிறான். பல வித கொச்சை கேள்விகளையும் தைரியமாக கேட்டு கொண்டேயிருக்கிறான். கூடவே இருக்கும் சிமோவிற்கு இது கொஞ்சமும் பிடிக்கவில்லை. லைலா வெறுப்பாக விலகி ஒடுகிறாள். அவளை சீண்டுவதை சிமோ துளியும் விரும்புவதில்லை. அவள் மீது அவனுக்கு அன்பே அதிகமாகிறது. சிமோவிற்கும் மெளலத்திற்கும் மோதல் முற்றுகிறது. நண்பர்களை சந்திப்பதையும் தவிர்க்கிறான்.

சிமோவும் லைலாவும் அடிக்கடி சந்திக்கின்ற்னர். சந்திக்கும் போதெல்லாம் லைலா காமம் பற்றியே அதிகம் பேசுகிறாள். அதெல்லாம் உண்மையா இருக்குமோ என்று சிமோ அஞ்சுகிறான். சிமோ லைலாவை காதலிப்பதாக எண்ணி தாய் சிமோவை கண்டிக்கிறாள். அது மாதிரி பெண் உனக்கு தேவையா..?? அவளை சந்திக்க வேண்டாமென்றும் வேலைக்கு போகவும் வற்புறுத்தி இனி தன்னால் ஒரு பைசா கூட கொடுக்க் இயலாதென்றும் கூறுகிறாள். நண்பர்களிடம் பழகுவதை நிறுத்தியதாலும் தாயிடம் காசு கேட்க மனமில்லாததாலும் ரத்த தானம் செய்து செலவிற்கு பணத்தை ஏற்பாடு செய்கிறான்.

ஒவ்வொரு வார விடுமுறையிலும் ஒரு கார் வந்து லைலாவை ஏற்றி செல்கிறது. அதை மறைந்திருந்து பார்க்கிறான் சிமோ. அவன் குழப்பமும் கவலையும் அதிகரிக்கிறது. அவளிடம் தொடர்ந்து பழகுவதா வேண்டாமா என்று சிமோவின் மனம் துடிக்கிறது.

இதற்கிடையே ஒரு நாள் சிமோவும் லைலாவும் பேசுவதை ஒட்டு கேட்கிறான் மெளலத். அவளது பேச்சு அவள் அப்படி பட்ட பெண் தான் என்று உறுதியாகிவிட்டதாகவும் ஆனால் சிமோ மட்டும் அவளை அடைந்து விட்டதாகவும் நண்பர்களிடம் கூறுகிறான்.

சிமோ லைலா சந்திப்பில் ஒரு நாள் எப்போதும் காமம் பற்றி தான் பேசுவியா என்று லைலாவை கோபித்து கொள்கிறான் சிமோ. அழுத படியே வீடு நோக்கி ஒடுகிறாள் லைலா. அவளை சந்திப்பதையும் தவிர்க்கிறான்.

அன்று இரவு நண்பர்க்ள் வழக்கமாக சந்திக்கும் கிளப்புக்கு செல்கிறான். அடித்து நொறுக்கப்பட்ட கிளப் அலங்கோலமாக காட்சியளிக்கிறது. ஆனால் நண்பர்கள் எவருமில்லை. கிளப் முதலாளி மெளலத்தும் மற்ற நண்பர்க்ளும் நன்றாக குடித்து விட்டு லைலா வீட்டிற்கு செல்ல முயன்றதாகவும் அதை தடுத்ததால் இப்படி அடித்து நொறுக்கி தன்னையும் தாக்கியதாகவும் கூறுகிறான்.

பதைத்து போய் லைலா வீடு நோக்கி ஒடுகிறான் சிமோ. சிமோவின் நண்பர்கள் லைலாவின் அத்தையை கட்டி போட்டு விட்டு அடுத்த கட்டத்திற்கு ஆயுத்தமாகும் வேளையில் லைலாவை காப்பாற்ற போராடுகிறான் சிமோ.

அதற்குள் போலிஸ் வந்து விடவே அனைவரையும் கைது செய்து சிறையில் அடைத்து விடுகின்றனர். சிமோ தான் மட்டும் காப்பாற்ற வந்ததாக கதறுகிறான். ஆனால் போலீஸ் நம்ப மறுக்கிறது.

ஒரு சில நாட்கள் சிறையிலிருந்ததும் சிமோ மட்டும் குற்றவாளியல்ல என்று அறியப்பட்டு விடுதலையாகிறான். லைலாவை காண ஓடுகிறான். ஆனால் வீடு காலி செய்ய பட்டதாகவும் அவள் அத்தையுடன் இரண்டு நாட்கள் முன் போலந்து நாட்டிற்கு சென்று விட்டதாகவும் அறிகிறான். சொல்ல முடியாத வேதனையில் தவிக்கிறான் சிமோ.

வீட்டில் கிடந்தை பழைய குறிப்பேடுகளில் லைலா அவனிடம் சொல்லியதெல்லாம் வெறும் போலிப்புனைவுகள் என்று அறிகிறான். அவனை சீண்டி விளையாடவே அவ்வாறெல்லாம் செய்த்தாக குறிப்பெழுதியிருக்கிறாள் லைலா. அது மட்டுமல்லாது வார விடுமுறையில் பக்கத்து ஊரில் ஒரு குழந்தையையும் பார்த்து கொள்ள (baby sitting) வேலைக்கு அவள் சென்றதாக விஷயம் கேள்வி படுகிறான். சிமோவிற்கு வேதனையும் அழுகையும் அதிகரிக்கிறது.

லைலாவின் இருப்பிடம் பற்றி அறிய போலீஸ்காரரின் உதவியை நாடுகிறான். கடுமையாக முடியாது என்று முதலில் மறுத்தாலும் சிமோவின் வருத்தம் அவரை சற்று உருக வைக்கிறது. அட்ரெஸ் எல்லாம் கொடுக்க மாட்டேன். வேண்டுமென்றால் போன் செய்து தருகிறேன். லைலா விரும்பினால் அவளே உனக்கு முகவரி கொடுக்கட்டும் என்கிறார். அது போதும் என்று மகிழ்ச்சியோடு சம்மதிக்கிறான் சிமோ.

சிமோவால் லைலாவிடம் பேச முடியவில்லை. அவனது மனவெழுச்சி ஒன்று அதிக சந்தோஷமாகவும் அதே நேரம் துக்கமாகவும் இருக்கிறது.

I love you so much என்று முதல் முறையாக தன் காதலை சொல்கிறான் சிமோ. I know என்று ஆமோதிக்கிறாள் லைலா. போலிஸ்காரருக்கு நன்றி தெரிவித்து விட்டு செல்கிறான்.

லைலாவை பினனணியாக கொண்டு ஒரு அற்புத சிறுகதையை இரண்டே நாட்களில் எழுதி டீச்சரிடம் கொண்டு போய் மகிழ்ச்சியுடன் கொடுக்கிறான் சிமோ. டீச்சரும் அனைத்து ஏற்பாடுகளையும் செய்து பயிற்ச்சி பட்டறையிடமிருந்து ஸ்காலர்ஷிப் ஒப்புதல் கடிதத்தையும் கொண்டு வந்து கொடுக்கிறாள்.

பாரிஸிக்கு பயணமாகவும் வேளையில் பயிற்ச்சி முடிந்ததும் லைலாவை சந்திக்க போவதாக தாயிடம் கூறுகிறான். தாயும் சம்மதித்து ஆசியோடு அனுப்பி வைக்கிறாள்.

லைலாவால் தான் தன் வாழ்க்கை மாறியதாகவும் அவளை பற்றியே எண்ணி கொண்டு பயணிக்கிறான். லைலாவும் சிமோவால் தன் வாழ்க்கையும் மாறியதாக எண்ணி சிமோவிற்காக காத்திருக்கிறாள்.

2004ல் சிமோ என்ற பெயரில் பிரெஞ்சு நாவலாக எழுதிய Ziad Doueiri என்பவரே இத்திரைப்படத்தையும் எழுதி இயக்கியிருக்கிறார்.

அன்பாக பழக முயன்றது இயற்கைதான். ஆனால் தேவையில்லாத பொய்கள் ஏற்படுத்தும் சிக்கல்களை கொண்டு கதையை நகர்த்தியுள்ளார் இயக்குநர். வயதின் ஏக்கத்தால் காமம் பற்றி லைலா நிறைய பேசினாலும் அது ஆபாசமாக தெரியவில்லை. ஒரே வயதுடைய சிமோவிற்கும் குழப்பங்கள் வருவதும் தவிர்க முடியாததுதான்.

லைலாவாக நடிக்கும் Vahina Giocante கொள்ளை அழகு. அவளது வயதுகேற்ற இயல்பான ஆசைகள், இச்சைகள், கனவுகள் இவையே திரைப்படத்டை முன் நகர்த்துகினறன.பெரும்பாலும் குளாசப் ஷாட்டுகளால் இருவரின் நடிப்பையும் இயல்பாக சித்தரிக்கிறார் இயக்குநர். கதையின் நேர்த்தியாலும் காதல் பருவ வயதினாலும் சிமோ லைலா நடிப்பு அருமையாக மிளிர்கிறது. அதனால் தான் இருவருக்கும் சிறந்த நடிப்பிற்கான விருதுகளையும் பெற்று தந்துள்ளது.

பிரெஞ்சு சினிமாக்கள் எப்போதும் உலகெங்கிலும் ஒரு புதிய அலையை ஏற்படுத்தி கொண்டேயிருக்கிறது. இந்த திரைப்படமும் மான்ஸ், சூடான் திரைப்பட விழாக்களில் பங்கு பெற்றதுடன் பல பரிசுகளையும் வென்றுள்ளது.

சிமோவும் லைலாவும் ஒருவர் மீது ஒருவர் அதீத அன்பு செலுத்தினாலும் கடைசி வரை இருவரும் காதலை சொல்வதில்லை. இதுவும் பார்த்து மகிழ ஒரு வித்தியாசமான காதல் கதைதான்.

Lila Says = Erotic but not vulgar

சந்தர்ப்பம் கிடைத்தால் கண்டிப்பாக பாருங்கள்.

உடனே பார்க்க வழக்கப்படி டிரைலர்

தமது முதல் காதலை யாராலும் மறக்க இயலாது. மனதின் ஆழத்தில் எங்காவது யாருக்கும் தெரியாமல் ஒளிந்து கொண்டு உட்கிரக்கவும் முடியாமல் வெளியில் சொல்லவும் முடியாமல் நிழலாடி கொண்டுதானிருக்கும். அப்படிப்பட்ட பழைய நினைவுகளை கிளறி விட லைலாவின் காதல் கதை ஒரு காதலர் தின ஸ்பெஷல் என்று நான் சொல்லணுமா..?? நீங்க பின்னூட்டத்தில் சொல்லுங்க.

Viva Cuba

2010-01-05T13:53:00.001-08:00

அப்பாவும் அம்மாவும்
தராத அரவணைப்பை
பொம்மைக்கு தந்தபடி
உறங்கிக்கொண்டிருந்தது குழந்தை.
கனவில் தோன்றிய கடவுள்கள்
அச்சிறு குழந்தையின் அரவணைப்பை
வரமாய் கேட்டனர்.
வரிசையில் நின்றிருந்த
கடவுள்களுக்கு உறக்கப்புன்னகையை
தந்துவிட்டு பொம்மையை
இறுக்கி அணைத்துக்கொண்டதது.
பொம்மையாதலின் வழிமுறைகள்
அறியாமல் விழித்தபடிநின்றனர்
கடவுள்கள்.

-நிலாரசிகன்.

குழந்தைகளின் உலகம் பரந்து விரிந்து கிடக்கிறது. அது தனித்துவமானது. எல்லையற்ற பாதையில் முடிவில்லாத பயணமாய் செல்ல அவர்களை தூண்டுகிறது. நட்பும் சந்தோஷமும் மட்டுமே அவர்களின் ஆசை, விருப்பம் மகிழ்ச்சி.

அப்படி எல்லையில்லா பேரானந்தத்தை விரும்பிய இரண்டு பாலினம் புரியாத பால்ய நட்பு சிறார்களின் கதையே விவா கியூபா என்றும் ஸ்பானிஷ் திரைப்படம்.

மாலு உயர்குடியில் பிற்ந்த செல்வந்தரான சிறுமி. அவளது தந்தையோ அவளது குடும்பத்தை விட்டு விலகி வெகுதூரம் வாழ்ந்து வருபவன். தாயுடனும் தனது முதிர்ந்த பாட்டியுடன் வசித்து வருகிறாள்.

மாலுவுக்கு சம வயதுடைய ஜார்ஜி எதிர் வீட்டில் பெற்றோருடன் வசிக்கும் சிறுவன். கம்யூனிச சித்தாந்த கொள்கைகளுடைய குடும்பத்தில் பிறந்தவன்.

இருவரும் ஒரே பள்ளியில் படிக்கும் இணை பிரியா நண்பர்கள். துள்ளி திரிவதும் சிறு சிறு சண்டைகளுடன் சதா விளையாடி மகிழ்வதும் ஒருவருக்கொருவர் உதவி செய்வதுமாய் பொழுதுகள் போகின்றது. இது இரு வீட்டாருக்கும் பிடிப்பதில்லை. மாலுவை அவள் தாய் ஆண்பிள்ளைகளுடன் விளையாடுவது தவறென்றும் பெண் குழந்தைகள் வீட்டின் உள்ளேயே தான் விளையாட வேண்டும் என்றும் நச்சரித்து கொண்டே இருக்கிறாள். இதனால் மாலுவுக்கோ தாயின் மீது அளவற்ற கோவம். ஆனால் அவளின் ஒரே ஆறுதல் வயதான பாட்டி மட்டுமே.

இதே நிலைதான் ஜார்ஜிக்கும். ஜார்ஜியின் தந்தை மாலுவினுடனான நட்பை துண்டிக்க வேண்டுமென்றும் சக ஆண் நண்பர்களுடன் விளையாட அறிவுறுத்துகிறார். அப்பாவை கண்டாலே அவனுக்கு வேப்பங்காயாய் கசக்கிறது. மாலு & ஜார்ஜியாவின் நட்பால் இரு குடும்பமும் இந்தியா பாகிஸ்தானாய் முறைத்து கொள்கிறது.

நிலைமை இப்படி இருக்க மாலுவின் தாய் வேறொருவனை மணமுடிக்க எண்ணுகிறாள். ஜெர்மனியில் வசிக்கும் அவனிடம் சேர்ந்து வாழ விருப்பமும் தெரிவிக்கிறாள். இதற்காக சட்டப்படி மாலுவின் தந்தைக்கு அவர் கையெழுத்திட வேண்டி ஒப்புதல் படிவத்தையும் அனுப்பி வைக்கிறாள். மனமுடைந்து போகிறாள் மாலு.

ஒரு புதிய வாழ்க்கை வருகிறதென்றும் ஜெர்மனியில் சுகமாய் வாழலாம் என்று மாலுவை தேற்றுகிறாள் தாய். சோகத்திலும் சோகமாய் பாட்டியும் திடிரென்று மரணித்து விட சொல்லமுடியாத வேதனையுடன் இருக்கிறாள் மாலு. விளையாடவோ பாடத்திலோ விருப்பமின்றி இருப்பதை பார்த்து ஜார்ஜியாவும் மிகவும் வருத்தப்படுகிறான்.

தாயின் விருப்பத்தையும் இடம் பெயர்வது பற்றியும் மற்றும் அனைத்து விபரங்களையும் நண்பன் ஜார்ஜியாவிடம் அழுதபடியே சொல்கிறாள். தற்போதைய பள்ளி கூடத்தையோ ஜார்ஜியாவையோ பிரிய ஒரு போதும் இயலாது என்றும் வருந்துகிறாள். அவளை தேற்றுகிறான் ஜார்ஜியோ.

இதற்கு ஒரே வழி மாலுவின் தந்தையை சந்தித்து அவரை அந்த ஒப்புதல் படிவத்தில் கையெழுத்திடாமல் செய்தால் மட்டுமே அனைத்து பிரச்சினைகளையும் என்றும் இருவரும் தனியே கிளம்பி போய் அவரை சந்திக்கலாம் என்று முடிவும் செய்கின்றனர்.

இரவோடு இரவாக வேண்டிய துணிகளையும், ஊருக்கு செல்ல வரைப்படம் சேர்த்து வைத்த உண்டியலையும் எடுத்து கொண்டு பள்ளி செல்வது போல காலையில் கிளம்பி இருவரும் உற்சாகமாகவும் அதீத சந்தோஷத்துடனும் பயணத்தை தொடங்குகின்றனர்.

படகில் ஆரம்பித்த பயணம் கார், மோட்டர் சைக்கிள், மாட்டுவண்டி, இரயில் என்று சகலவித பாதைகளிலும் பயணிக்கிறது.

பசியும் சோர்வும் வாட்டுகிறது. தொலை தூர கிராமத்தில் பார்வையிழந்த பெண்ணொருத்தியின் வீட்டிலிருந்து ரொட்டியையும் பாலையும் திருட முற்பட அவள் நாயின் துணையோடு இருவரையும் விரட்டி பிடிக்க செய்வதறியாது திகைக்கின்றனர். அங்கிருந்து தப்பித்து ஒட இரவில் காட்டில் பேய் நடமாட்டம் இருப்பதாக வழி போக்கன் சொன்னதை நம்பி பயந்து ஜார்ஜியாவிற்கு கடுமையான காய்ச்சல்.

டாக்டரிடம் சென்று காண்பிக்க ஊர் மக்கள் உதவினாலும் ஊசிக்கு பயந்து ஜார்ஜியா ஒடுவதும் நகைச்சுவையாய் காட்சிகள்.

இதனிடையே இரு வீட்டாரும் போலிஸில் புகார் கொடுக்க இரு குடும்பமும் ஒத்துழைத்தால் மட்டுமே குழந்தைகளை மீட்க முடியும் என்கிறார் அதிகாரி. சண்டையிட்டு கொண்டிருந்த இருவரின் குடும்பம் சிறிது சிறிதாய் நட்பாகி ஒருவருகொருவர் ஆறுதலாய் இருந்து வர குழந்தைகள் இருவரும் ஒரு பக்கம் போலிஸ் துரத்திலில் இருந்தும் மறைந்து மறைந்து ஒடுவதும் பல புதிய மனிதர்களை சந்திப்பதுடன் ஒவ்வொரு சந்திப்பும் அவர்களுக்க் பல வித அனுபவத்தையும் புத்துணர்வையும் அளிக்கிறது.

ஒரிடத்தில் தவறுதலாய் விட்டு சென்ற ஜார்ஜியாவின் கைப்பையை வைத்து போலிஸ் அவர்களின் இருப்பிடம் தெரிவிக்க இரு குடும்பமும் குழந்தைகளை தேடி புறப்படுகின்றனர்.

கடைசியில் மலை குகைகளை ஆராய்ச்சி செய்யும் ஒருவனின் துணையோடு மாலுவின் தந்தையிருக்குமிடத்தை சென்றடைந்து விடுகின்றனர் மாலுவும் ஜார்ஜியாவும்.

அதற்கு முன் அங்கு வந்த் சேர்ந்த மாலுவின் தாயும் ஜார்ஜியாவின் பெற்றோர்களும் குழந்தைகளை கண்ட அனைவரும் முதலில் சந்தோஷத்திலும் பரவசத்தில் திளைத்தாலும் சிறிது நேரத்தில் யார் மீது குற்றம் என்று சண்டை பிடிக்க தொடங்கியவுடன் அருகே இருக்கும் கடற்கரையை பார்த்ததும் எதையும் பொருட்படுத்தாது அளவில்லா ஆனந்தத்துடன் விளையாட செல்கின்றனர் மாலுவும் ஜார்ஜியாவும்.

தூரத்தில் பெற்றோர்கள் சண்டையிட மணலில் குழந்தைகள் விளையாட அற்புத காட்சியாய் திரைப்படம் நிறைவு பெறுகிறது.

2005ல் வெளியான இத்திரைப்படம் பல சர்வதேச விழாக்களில் பங்கு பெற்றதுடன் 34 உலக விருதுகளை வாரி குவித்துள்ளது. 2005 கேன்ஸ் குழந்தைகள் சர்வதேச விழாவில் முதன் முதலில் பரிசு பெற்ற கியூபா திரைப்படம் என்ற பெருமையும் பெற்றது. இயல்பான நடிப்பும் அருமையான ஒளிபதிவும் கூடுதல் சிறப்பு.

வானொலியில் காணாமல் போனவர்களின் பற்றிய அறிவிப்பை கேட்டவுடன் ஜார்ஜியா பெண் வேடமிட்டு திரிவதும், வழி நெடுகிலும் ஒருவருக்கு ஒருவர் மாற்றி மாற்றி பொய்யுரைப்பதும் பிறகு மாட்டி கொண்டு முழிப்பதும் சிறு சிறு சண்டையிடுவதும் மீண்டும் நட்பாவதும் இயல்பான நகைச்சுவையுடன் நெகிழ வைக்கும் காட்சிகள்.

இத்திரைப்பட்த்தை எழுதி இயக்கியிருப்பவர் கியூபா திரைப்பட துறையில் மிகவும் போற்றதக்க Juan Carlos Cremata. கியூபா இனத்தவரான இவர் குழந்தைகளுக்கான தொலைகாட்சி நிகழ்ச்சிகளை பல ஆண்டுகள் இயக்கிய அனுபவம் பெற்றவர். இயக்குநர் மற்றும் எடிட்டிங் பயிற்ச்சி பள்ளியில் ஆசிரியராகவும் இருந்து பல மாணவர்களுக்கு பயிற்ச்சியும் அளித்துள்ளார்.

2001ல் இவரது முதல் திரைப்படம் Nada Mas வெளிவந்தது. தொடர்ந்து அற்புதமான திரைப்படங்களை இயக்கியும் பரிசுகளையும் வென்று வருகிறார். விமான பணியாளராக பணியாற்றிய இவரது தந்தை
1976 ம் ஆண்டு உலகையே உலுக்கிய கியூபா விமான வெடிகுண்டு விபத்தில் பலியானவர் என்ற சோகமும் உண்டு.

யாருக்கும் கிடைக்காத அதிர்ஷ்டம் தனக்கு கிடைத்ததாக Juan Carlos Cremata சொல்வது Viva Cuba திரைப்படத்தின் துணையியக்குனர் இவரது அம்மாவே என்பது தான்.

குழந்தைகளை பற்றிய இத்திரைப்படம் பார்பவர் அனைவருக்கும் தமது பாலர் பருவத்தை கிளர செய்யும் என்பதில் ஐயமில்லை. குழந்தைகளுடனும் குடுமபத்துடனும் பார்க்க வேண்டிய சிறந்த திரைப்படம்.

வழக்கப்படி உடனே பார்க்க டிரைலர் இங்கே

குழந்தைகள் குறித்த எந்தவித சிந்தனையில்லாமல் சென்னை போன்ற பெரு நகரங்களில் அவசர உலகம் ஒடிக்கொண்டு இருக்கிறது. பெரிய பெரிய புத்தகப்பைக்களுக்குள் அவர்கள் நசுங்கி கிடப்பதும் சதாராணமான நிகழ்வுகள். இன்று ஞாயிற்று கிழமைகளில் கூட தெருக்களில் விளையாடும் பிள்ளைகளை பார்க்க முடிவதில்லை.

நமது சிறு வயதில் நூற்றுகணக்கான விளையாட்டுகளில் உலகம் விரிந்து கிடந்ததை நினைத்து சந்தோஷப்படும் வேளையில் “தொலைக்காட்சி” பூதம் அந்த விளையாட்டுகளையெல்லாம் விழுங்கி விட்டதை நினைத்து வேதனை படாமல் இருக்க முடிவதில்லை.

Deck The Halls { Christmas Special }

2009-12-23T10:12:00.000-08:00

Deck The Halls (மீள் பதிவு)

கிறிஸ்மஸ் பண்டிகையை வித்தியாசமாக கொண்டாடுவதில் போட்டியும் பொறாமையும் கொண்ட இரு அண்டை வீட்டுகாரர்களின் பூசல்தான் நகைச்வை கலந்த குடுமப திரைப்படம் தான் Deck The Halls

100% பொழுது போக்கு மற்றும் நகைச்சுவைக்கு உத்திரவாதம்.

Steve தன் குடும்பத்தினருடன் கிறிஸ்மஸ் பண்டிகையை உற்சாகமாக கொண்டாட ஆயத்தமாகிறன். அப்போதுதான் அவன் பக்கத்துவீட்டிற்கு குடி வருகிறார்கள் Buddy Hall & family.

Buddy Hall ஒரு கார் விற்பனையாளன். மிக குறைந்த வருமானம். அவன் மனைவியோ எப்போதும் பணத்திற்காக அவனை நச்சரிக்கிறாள். அவனோ தான் எதாவது சாகசம் செய்து பெரிய புகழ் பெறவேண்டும் என நினைக்கிறான். அதனால் கிறிஸ்மஸ் பண்டிகையின் போது விளக்குகளால் வீட்டை அலங்கரித்து அது வானுலகத்திலிருந்து பார்த்தாலும் தெரியும் படி செய்ய பல முயற்சிகளை மேற் கொள்கிறான்.

ஆனால் பல ஆண்டுகளாய் வாழும் அவர்கள் குடியிருப்பு பகுதியில் Steve குடும்பமே கிறிஸ்மஸ் பண்டிகையை விமர்சனையாக கொண்டாடி புகழ் பெற்று வருகின்றனர். இந்த தருணத்தில் புதிதாக குடி வந்த Buddy யின் முயற்சிகளை கெடுக்க Steve செய்யும் குளறுபடிகளும் அதை Buddy எப்படி முறியடிக்கிறான் என்பதே மீதிக்கதை.

என்னதான் அவர்கள் இருவர்ம் போட்டி பொறாமையுடன் இருந்தாலும் குழந்தைகளும் இரு மனைவிகளும் இதை விரும்புவதில்லை. அவர்க்ள் ஒரே குடும்ப்மாக இருக்க வேண்டும் என எவ்வளவோ முயற்ச்சிகின்றனர்.

ஆனால் Buddy ,Steve இருவரும் அவர்களின் பேச்சை கேட்க மறுப்பதால் இரு மனைவிகளும் குழந்தைகளுடன் வீட்டை விட்டு வெளியேறி கிறிஸ்மஸ் பண்டிகையை விடுதியில் கொண்டாட போவதாய் சொல்லி விட்டு போய் விடுகின்றன்ர்.

இறுதியில் Buddy Hall தான் நினைத்ததை நிறைவேற்றி எல்லோரும் ஒன்று சேர்ந்து கிறிஸ்மஸ் பண்டிகையை கொண்டாட சுபம்.

குறிப்பாக கிறிஸ்மஸ் பாடல்கள் குறும்பாடல்களாக வந்து போவது இனிமை.நவம்பர் 2006ல் வெளிவந்த திரைப்படம். அந்த வருடத்தில் இந்த கிறிஸ்மஸ் பாடல்கள் மிக பிரபலம். நிஜமாகவே எவ்வளவு உவகையுடன் உற்சாகத்துடன் அமெரிக்கர்கள் அந்த ஆண்டு கிறிஸ்மஸ் கொண்டாடி இருப்பார்கள் என நினைக்கவே மிகுந்த மகிழ்ச்சியாக இருக்கிறது.

குட்டையான உருவமும், குறுகுறுத்த கண்களும் வித்தியாசமான குரலும் கொண்ட Buddy Hall பாத்திரத்தில் நடித்து கலக்கியிருப்பவர் Danny De Vitto. அத்தனை இயல்பான நடிப்பும் நகைச்சுவையும் சூப்பர்.

64 வயதான DANNY DeVITO அமெரிக்காவில் முறைப்படநடிப்பு கலையை பயின்றவர். மிக பிரபலான பல தொலைகாட்சி தொடர்களில் நடித்து மக்களுடன் ஒன்றாக கலந்தவர். 1978 முதல் Danny De Vitto பல அவார்டுகளை அள்ளி குவித்தவர். 2001 ல் ஆஸ்கர் அவார்டுக்கும் பரிந்துரைக்கப்பட்டவர்.

ஒரு சமயத்தில் மோசமான நடிகர் என்று விமர்சிக்கபட்டாலும் தொலைகாட்சியிலும் திரைப்படங்களிலும் 40 வருடங்களாக தொடர்ந்து நடித்து வரும் அமெரிக்க மக்களுக்கு நிஜமாகவே இவர் அண்டை வீட்டுகாரர் போல தானாம். குழந்தைகளுக்கும் குடும்பத்திற்கும் ஏற்ற நல்ல நகைச்சுவை திரைப்படம்.

சந்தர்பம் கிடைத்தால் நிச்சயம் பாருங்கள்.

உடனே பார்க்க டிரைலர் இங்கே

அனைவருக்கும் இனிய கிறிஸ்துமஸ் நல்வாழ்த்துகள்

செக்ஸ் & லூசியா

2009-12-13T23:35:00.000-08:00

Sex and Lucia { Spanish }

இது 2001ம் ஆண்டு வெளியான் ஒரு ஸ்பானிஷ் மொழி திரைப்படம். சென்சார் இல்லாத திரைப்படம் என்று முதலில் எச்சரிக்கிறேன். ஏன் என்று கடைசியில் டிஸ்கியில் சொல்கிறேன்.

குழந்தைகளுடன் கண்டிப்பாக பார்க்க இயலாது.

லூசியா ஸ்பெயினில் ஒரு சிறிய ஹோட்டலில் பணி புரிகிறாள். திடீரென்று தொலை பேசி அழைப்பு. அவளது காதலனும் எழுத்தாளருமான லோரென்ஸோ கூப்பிடுகிறான். அவனுடன் சரியாக பேச மறுக்கிறாள். தொலைபேசியையும் துண்டிக்கிறாள்.

வீடு சென்று பார்த்தால் அவனை காணவில்லை. தன்னை தேட வேண்டாம் என சீட்டு எழுதி வைத்து விட்டு எங்கோ சென்று விடுவதாய் சொல்லியிருகிறான். போலிஸிடமிருந்து போன்... அவளது காதலன் லோரென்ஸோ கார் விபத்தில் இறந்திருக்ககூடும் என்ற செய்தியும் வரவே நிலை குலைந்து போகிறாள் லூசியா.

அவனை இழந்த துக்கத்துடன் அவன் வெகு நாட்களுக்கு முன்பு அவன் எழுதிய நாவல் உருவாக காரணமாக கூறிய அந்த தீவிற்கு பயணமாகிறாள். இயற்கை எழில் நிறைந்த அதிக மனித நடமாட்டம் இல்லாத தீவில் ஒருவனை சந்திக்கிறாள். அங்கு சில நாள் தங்கும்படியும் அவளுக்கு வேண்டிய உதவிகள் செய்வதாய் கூறுகிறான் அவன்.

தங்கவும் சம்மதிக்கிறாள். அவனிடம் லோரென்ஸோவை சந்தித்த முதல் தருணமும் அவனிடம் பழகிய நாட்களில் காமக்கூடலில் திளைத்த இரவுகளும் காட்சிகளாய் மன திரையில் ஒட அனைத்தையும் கூறுகிறாள்.

காட்சிகள் பின்னோக்கி பயணிக்கிறது.

அதே தீவில் லோரென்ஸோ ஒரு பெயர் தெரியாத பெண்ணுடன் ஆறு வருடங்களுக்கு உறவு கொண்டுள்ளான். அவளும் கர்ப்பமாகி ஒரு பெண் குழந்தையை பெற்றெடுத்து வளர்ந்து வருவதாய் லோரென்ஸோவின் நண்பன் கூறுகிறான்.

அந்த குழந்தையை வளர்க்க ஒரு பணிப்பெண்ணை நியமிக்கிறாள். அவளை ஒரு நாள் எதேச்சையாக பூங்காவில் சந்திக்கிறான் லோரென்ஸோ. அந்த பணிப்பெண் லோரென்ஸோவை விரும்புகிறாள். அவனுடன் உறவு கொள்ளவும் துடிக்கிறாள். தனது மகளை வளர்த்து வரும் பணிப்பெண் என்று தெரியாமலே அவளை நிராகரிக்கிறான் லோரென்ஸோ.

பின்னர் ஒரு நாள் லோரென்ஸோ உயிரோடு இருப்பதாக நண்பன் மூலம் லூசியாவிற்கு மகிழ்ச்சியான செய்தி வருகிறது. லூசியா லோரென்ஸோ இணைந்தார்களா..? அந்த பெண்ணும் சிறுமியும் என்ன ஆனார்கள் என்பதே மீதிக்கதை.

இயற்கை எழில் கொஞ்சும் கடற்கரை, வெண்மேகங்கள், குளிர்ச்சியான நிலவொளி அந்த இனிமையான தருணங்களில் உடல் காமத்தின் சுழல்வெளி அது உருவாக்கும் சூறாவளி என்று ஒன்று கொன்று தொடர்பில்லாமல் ஆரம்பித்து ஒவ்வொரு கதையும் ஒவ்வொரு இடத்தில் கோர்த்து ஒரு அற்புத திரைக்கதை வடிவமைத்து இயக்கியிருக்கிறார் Julio Medem

இயல்பான விருப்பங்களில் தொடங்கி காமத்தில் அரங்கேற்றினாலும் முடிவில் உடலை கடந்து ஒரு காதல் கதையாய் முடித்திருப்பது மிகவும் அருமை.

காமத்தின் நுட்பங்கள் பற்றியும் அதை தூண்டவும் தணிக்கவும் லூசியா செய்யும் காட்சிகள் வார்த்தைகளில் அடங்காதவை. உடலை பற்றிய ஒரு புது அர்த்ததை தனது பாத்திர படைப்பான லூசியா மூலம் சொல்கிறார் இயக்குநர் Julio Medem.

ஸ்பானிஷ் திரைபடங்களில் மிக முக்கியமான இயக்குநர் Julio Medem. சிறு வயது முதல் திரைப்ப்டத்தின் தீராக்காதல் கொண்டவர். பள்ளி பருவத்திலேயே தனது தந்தையிடம் பரிசாக மூவிங் கேமிரா வேண்டும் என்று நச்சரித்து குறும்படங்களை எடுத்தவர். இதுவரை பல திரைப்படங்களுக்கு உலக அளவில் பல விருதுகளை வென்றவர். இவரது முந்தைய படமான LOVERS OF THE ARCTIC CIRCLE மிகவும் முக்கியமன திரைப்ப்டம்.

இந்த படம் திரைப்டத்திற்காக ஒரு படப்பிடிப்பில் சென்ற தீவில் தான் Sex and Lucia திரைக்கதை அவருடைய மனதில் உருவானதாம்.பின்னர் 18 மாதங்களில் 8 திரைக்கதைகளை எழுதி முடிவில் இந்த நாஸ்டால்ஜிக் வகை திரைக்கதையே பொருந்தும் என்று தீர்மானித்தாராம். நடிக்க பல பேரை பார்த்தும் எவரும் அவர் மனதிற்கு பொருந்தாமல் கடைசியில் லூசியா பாத்திரத்திற்கு Paz Vega வை தீர்மானித்திருக்கிறார்.

Paz Vega ஸ்பானிஷ் தொலைக்காட்சி சீரியல் நடிகை. ஆனால் நடிப்பை முறைப்படி நடிப்பு பள்ளியில் பயின்றவர். பல தொலைகாட்சி தொடர்களில் நடித்து அனுபவம் பெற்றவர். இத்திரைப்பட அனுபவம் பற்றி "What I liked the most about Lucia how pretty, positive and courageous she was. I would like to have some of that" என்று சொல்கிறார். இத்திரைபடத்திற்காக சிறந்த நடிகைக்கான விருதையும் பெற்றுள்ளார்.

பனிரெண்டு ஸ்பானிஷ் கோயா விருதுகளையும் பல உலக திரைப்பட விழாக்களிலும் பங்கு பெற்றதுடன் சூடான், டோரெண்டோ விருதுகளையும் அள்ளிய திரைப்படம்.

சந்தர்ப்பம் கிடைத்தால் நிச்சயம் பாருங்கள்.

உட்னே பார்க்க டிரைலர் இங்கே

டிஸ்கி: Why Strictly 18 + ..? இங்கே கிளிக்குங்க

The Circle

2009-11-27T13:39:00.000-08:00

வாழ்வை நமக்கு மிக நெருக்கமாகக் காட்டுகின்றது சினிமா. அதனால் தான் அதன் மேல் ஒரு தீரா மோகம் நம்மை எப்போதும் ஆட்டி படைக்கிறது.

நம்மை திரையில் பார்ப்பது போன்ற உணர்வுகளால் அடையும் மகிழ்ச்சிக்கு அளவில்லை. அதனால் தான் ஆனால் உலக சினிமாவிலிருந்து ஈரானிய சினிமா எப்போதும் தனித்தே நிற்கின்றது.

அனைத்து விதமான சினிமா வகை மாதிரிகளை விடவும் ஈரானிய சினிமாவில் வாழ்வும் சமூக பொறுப்பும் எப்போதும் பனித்துளியைப் போல் பதிவு செய்யப்படுகின்றது. அதனால் தான் மிக குறுகிய காலத்தில் உலகம் முழுவது ஒரு சொல்ல முடியாத ஈர்ப்பையும் தன்னகத்தே கொண்டு உயர்ந்து நிற்கிறது.

அப்படி பெண்களின் வாழ்வியலை மையமாக கொண்ட Jafar Panahi யின் மற்றொருமொரு அதி உன்னத படைப்பு The Circle. ஆனால் மிக கடுமையான தணிக்கை முறை உள்ள ஈரானியில் தடை செய்யப்பட்ட இந்த திரைப்படம் 2000ம் ஆண்டு வெளிவந்தது. மொழி பெர்சியன்.

மருத்துவமனையில் பிரசவ வார்டில் சொல்மாஸ் என்ற நடுத்தர வயது பெண்மணியை அழைத்து அவளுடைய மகளுக்கு அழகிய பெண் குழந்தை பிறந்திருபதாக கூறுகிறாள் செவிலி. மனமுடைந்து போகிறாள் சொல்மாஸ். மகன் பிறக்காவிட்டால் தனது மகளை விவாகரத்து செய்ய நேரிடும் என்று மருமகனின் பெற்றோர் சொல்லியிருப்பதை செவிலியிடம் கூறுகிறாள். தனது இன்னொரு மகளை கூப்பிட்டு குழந்தை பிறந்த விஷயத்தை அனைவருக்கும் தெரிவிக்க சொல்கிறாள்.

தொலைபேசியில் தகவல சொல்ல நேரும் போது அங்கு மூன்று பெண்களை காண்கிறாள். அவர்கள் பேசுவதிலிருந்து அவர்கள் மூவரும் சிறையிலிருந்து சில நாட்கள் முன் தான் வெளியே வந்திருப்பதையும் அறிகிறாள். அவர்கள் மீண்டும் ஊருக்கு செல்ல பணம் இல்லாமல் தவிக்கின்றனர். சில நகைகள் விற்று ஊர் செல்லவும் முயலும் போது ஒருத்தி போலிசாரால் கைது செய்யப்படுகிறாள்.

மற்ற இருவரான எரிசோவும் நர்கீஸும் பயந்து ஒடி விடுகின்றனர். ஒரு விபசார புரோக்கர் மூலம் சிறிது பணம் சம்பாதித்து எரிசோவை ஊருக்கு அனுப்ப முயன்று பணத்தையும் தந்து விட்டு ஊருக்குள் போய் விடுகிறாள்.

எரிசோ விற்கு ஊருக்கு செல்ல முற்படும் போது பெண்கள் தனியே பயணிக்க கூடாதென்றும் அப்படி போவதென்றால் தகுந்த பத்திரங்கள் வேண்டுமென்று கூறகிறார் நிலைய அதிகாரி. தான் மீண்டும் கைது செய்யப்படுவோம் என்று அஞ்சி நடுங்குகிறாள் எரிசோ.

சொல்ல முடியாத வேதனையுடன் சுற்றி திரிகிறாள். அப்போது சிறையிலிருந்து அன்று தான் வெளியான பாரி என்பவளை சந்திக்கிறாள். பாரி திருமணமாகாமல் கர்ப்பமானவள். அதற்கு காரணமானவனுக்கு மரண தண்டளை விதிக்கப்ப்ட்டு நிறைவேற்றப்பட்டும் விட்டது. சிறையிலிருந்து விடுதலையானவள் எங்கு போவாள்...??

ஆனால் சிறையிலிருந்து வெளி வந்த அவளை வீட்டின் உள்ளே கூட சேர்க்காமல் அடித்து விரட்டுகிறான் அவளின் தந்தை. அவளது சகோதர்களை பார்க்க கூட அனுமதியளிக்க மறுக்கிறார் அவளின் தந்தை. உயிர் தப்பித்தால் போதும் என்று வீட்டை விட்டு ஒடி வந்து விடுகிறாள்.

தனது சிறைத்தோழியான எல்ஹாம் என்பவளை சந்தித்து கருக்கலைப்பு செய்ய உதவுமாறு கேட்கிறாள். ஆனால் அவளோ தான் சிறையில் இருந்ததும் கடந்த கால வாழ்வும் தனது தனது மருத்துவனான கணவனுக்கு தெரியாதென்றும் அவளால் எந்த உதவியும் செய்ய இயலாத நிலைமையும் விவரிக்கிறாள்.

மீண்டும் வேறு எங்காவது சென்று பிழைக்க வழி தேடும் நேரத்தில் ஒரு பெண்மணி தனது மூன்று வயது குழந்தையை ரோட்டிலே தனியே விட்டு விட்டு ஒட முயற்ச்சி செய்வதை பார்க்கிறாள்.

அவளை விசாரித்த போது அவளது விதவையென்றும் வறுமை அவளை வாட்டுவதால் குழந்தயை விட்டு சென்றால் யாராவது எடுத்து சென்று வளர்ப்பார்கள் என்று நம்புவதாய் கூறுகிறாள்.

ஏற்கனவே மூன்று முறை விட்டு சென்றதும் ஆனால் அது நிறைவேறவில்லை என்றும் வருத்ததுடன் கூறுகிறாள். அந்த நேரம் போலிஸ் வந்து குழந்தையை தூக்கி செல்லவே தெருவிலேயே சுற்றி திரிகிறாள் அந்த பெண். விபச்சாரி என்று கைது செய்யப்பட்டு பின்னர் விடுவிக்கப்படுகிறாள்.

சிறிது நேரத்தில் வேறு ஒரு பெண்ணும் விபச்சாரம் செய்ததற்காக கைது செய்யப்பட்டு சிறையில் அடைக்கப்படுகிறாள். இரும்பு சுவர்களாலான வட்ட வடிவ சிறையில் உள்ளே நுழைநததும் திரையில் முன்னர் பார்த்த பெண்களும் இருக்கிறார்கள்..

கனமான வாயில்களுக்கு வெளியே காவலாளியிடம் சொல்மாஸ் அங்கு இருக்கிறாளா..?? என்று தொலைபேசியில் கேட்கிறார் அதிகாரி. அவள் மற்றொரு பிரிவில் இருப்பதாக கூறுகிறான் காவலாளி. முதல் காட்சியில் ஆரம்பித்த புள்ளியிலிருந்து இத்துடன் வட்டம் நிறைவடைவதாய் திரைப்படமும் நிறைவு பெறுகிறது.

திரைப்படத்தை ஒரு முழுநீள கதையாக சொல்லாமல் தனி தனி காட்சிகளாக சொல்லி ஒரு வட்டமாக முடிக்கிறார் இயக்குநர். மிகவும் குறைந்த கதாபாத்திரங்கள். ஐந்து பெண்களை மையப்படுத்திய சில காட்சிகள் நிறைவு பெறாமலும் நம் எண்ணத்திற்கு விட்டு விடுவதும் சிறப்பு. ஒவ்வொர் கதையும் பெண்களின் வாழ்வியலில் முற்று பெறாத துயங்களை போல முற்று பெற்றதாக இல்லை.

அது தவிர சில காட்சிகள் யூகிக்க தக்க குறீடுகளால் நிரம்பியுள்ளது தனிச்சிறப்பு.

சிறு பெண் குழந்தையை விட்டு விட்டு தாய் ஒட முற்படும் போது மணவிழாவில் ஒரு பெண் சிரித்து மகிழ்வதாய் அமைத்திருப்பதும் பேருந்து நிலையத்திலும் மருத்துவம்னைகளிலும் பெரிய ஹால்களில் வட்ட வடிவ சித்திரங்கள் வரையப்பட்டுள்ளது பெண் ஒரு வட்டத்தில் எப்போதும் அடைக்கப்பட்ட்வள் என்பதை சொல்லாமல் சொல்கிறார் இயக்குநர்.

ஈரானில் பெண்களுக்கு எதிரான கடுமையான சட்டங்களும் வன் கொடுமைகளையும் சித்தரிப்பதால் தானோ அங்கு தடை செய்யப்பட்டுள்ளது..

சிங்கப்பூர், உருகுவே உட்பட பத்திற்கும் மேற்பட்ட உலக திரைப்பட விழாக்களில் பரிசையும் பாராட்டையும் பெற்றதுடன் வெனிஸ் திரைப்பட விழாவில் தங்க சிங்கம் விருதையும் வென்றது.

சந்தர்ப்பம் கிடைத்தால் பார்க்க வேண்டிய திரைப்படம்.

உடனே பார்க்க டிரைலர் இங்கே

இவரது மற்றொரு படைப்பான The White Baloon

சம்சாரா

2009-10-10T23:39:00.001-07:00

மூன்று வருடம் மூன்று மாதம் மூன்று நாட்கள் குகையின் உள்ளேயே கடும் தவம் புரிந்து வரும் தாஷிவை அழைத்து செல்ல மடாலயத்தின் குருமார்கள் வருகின்றனர்.

பாறை மீது எழுதியுள்ள 'ஒரு சொட்டு நீரை காய்ந்து போகாமல் எப்படி தடுக்க முடியும்?' என்ற வாக்கியத்தை படித்து யோசித்து கொண்டே தன் துறவற மடாலயத்திற்கு திரும்புகிறான் தாஷி.. ஐந்து வயது முதல் பெண் பார்வையும் வாசனையும் இல்லாத கடும் துறவறம்.

தாஷிவை லாமாக்க அவனது குருமார்கள் செய்யும் ஏற்பாடுகள் ஒருபுறமிருக்க

தாஷிவுக்கு கடுமையான தடுமாற்றம் மறுபுறம். மீண்டும் துறவறமா..?? என்ன சாதித்தோம் இந்த துறவறத்தில். குழப்பி போகிறான்.

அறுவடை காலத்தில் பயிர்களையும் விவசாயிகளையும் ஆசிர்வதிக்க போன இடத்தில் பேமாவை பார்க்கிறான். சந்திக்கிறான். மனம் இழக்கிறான். மீண்டும் திரும்பி வந்ததும் மடலாயத்தில் அவனுக்கு இருப்பு கொள்ளவில்லை. ஆண்மையையும் அடக்க முடியவில்லை. பேமைவை தேடி செல்ல முடிவும் எடுக்கிறான்.

பேமா ஏற்கனவே குடும்ப முறைப்பையன் ஒருவனுக்கு நிச்சயிக்க பட்டவள். துறவறத்தை துறந்து சாதாரண உடையில் பார்த்ததும் கிராமத்தினருக்கு அதிர்ச்சியும் ஆச்சரியும் கூடுகிறது.

பேமாவும் தாஷியை விரும்புகிறாள். புல் வெளியில் இயற்கையோடு இருவரும் கலக்க முறைப்பையன் பார்த்தும் விட விட்டும் கொடுக்கிறான். பேமா தாஷி திருமணம் இனிதே நடக்கிறது.

மண்வாசனையே அறியாதவனுக்கு திடிரென்று கிடைத்த இல்லறம். அதுவும் அடக்கி வைக்கப்பட்ட ஆண்மை.... கேட்க வேண்டுமா..? காமத்தில் கொக்கேகருக்கே கற்று கொடுக்கும் அளவிற்கு மூழ்கி திளைக்கிறான் தாஷி. ஒரு மகனும் பிறக்க அவனுக்கு கர்மா என்று பெயர் சூட்டுகிறார்கள் தம்பதியர்கள்.

குடும்பஸ்தன் ஆகி விட்டதால் பொருள் ஈட்டும் ஆசையும் வருகிறது. விவசாயத்திலும் நாட்டம் கொள்கிறான். தரகு முதலாளி வேண்டாம், நாமே சந்தையில் போய் விற்றால் நல்ல லாபம் பார்க்கலாம் என்று கிராமத்தினரிடமும் தன் மாமானாரிடம் வாதாடுகிறான். ஆனால் இரவோடு இரவாக பயிர்கள் தீ பிடித்து எறிய தரகன் தான் காரணமென சந்தேகித்து அவனோடு சண்டையிட நகருக்குள் செல்கிறான். தனியாய் வந்து மாட்டி கொண்டவனை தரகனின் ஆட்கள் புரட்டி அடிக்க மீண்டும் கிராமத்திற்கே வந்து சேருகிறான்.

மீச்சம் மீதி இருக்கும் தானியங்களையாவது விற்று நாலு காசு பார்க்கலாம் என மகனுடன் நகரத்துக்கு பயணிக்கிறாள் பேமா. கூலி வேலை செய்யும் கவர்ச்சி பெண்ணொருத்தியான சுஜாதாவின் மேல் வெகு நாட்களாக கண் வைத்து காத்திருக்கிறான் தாஷி.

வீட்டில் மனைவியும் இல்லை எவரும் இல்லை. அந்த நேரத்தில் சுஜாதாவும் அடிக்கடி வந்து செல்கிறாள். ஆசையும் மோகமும் பற்றி எரிய இதுவரை எவருமே செய்யாத புது வித கலவியில் இருவரும் ஈடுபடுகின்றனர்.

தாஷிவைக் காண பழைய மடாலயத்தோழன் வருகிறான். அவனது இல்லறம் பற்றியெல்லாம் விசாரிக்கிறான். மெளனத்துடன் திரும்பி செல்கிறான். மனைவி இருக்க வேறொரு பெண்ணுடன் உறவு கொண்டதை எண்ணி வருந்துகிறான். குற்ற உணர்வால் நிலை கொள்ளது தவிக்கிறான்.

இந்த வாழ்க்கையும் கசந்து விடவே துறவறமே நல்லறம் என்று எண்ணியவனாய் இரவோடு இரவாக துறவற உடையணிந்து மடாலயம் நோக்கி பயணிக்கிறான்.

அதே பாறையின் அருகே சென்று கொண்டிருக்கும் போது பேமா குறுக்கிடுகிறாள். சித்தார்த்தன் கதையில் யசோதாவை தெரியுமா..?? என்று ஆரம்பித்து அவள் பட்ட வேதனைகள், அவமானங்கள். இரவோடு இரவாக விட்டு சென்றபின் யாரறிவார்..??

ஆண்களுக்கு இது வழக்கமாக இருக்கலாம். ஆனால் பெண்ணின் நிலைப்பாடு அவ்வாறு இருக்குமா..?? அதனை செய்ய துணியுமா என்று ஆவேசத்தோடு கேள்வி கணைகளால் தாஷிவை துளைக்கிறாள்.

பதில் பேச முடியாமல் உடைந்து போகிறான் தாஷி. பேமாவின் காலடியில் கண்ணீருடன் விழுகிறான். அவனையும் அவன் துறவறத்தையும் மதிக்காத பேமா குழந்தையை எண்ணிய படி வீட்டை நோக்கி செல்கிறாள்.

பாறையின் இன்னொரு புறத்தில் 'சொட்டு நீர் காய்ந்து போகாமல் இருக்க, அதனை கடலில் எறியுங்கள்!' என்ற வாசகம் காணப்படுகிறது. இந்த காட்சியுடன் நிறைவடைகிறது திரைப்படம்.

திபெத் / லடாக்கி மொழிகளிம் ல் வெளியான இத்திரைப்படம் பல உலக விழாக்களில் பங்கு பெற்றதுடன், உலகம் முழுவதும் முப்பதுக்கு மேற்பட்ட விருதுகளுடன் மெல்போர்ன் பட விழாவில் பரிசையும் தட்டி சென்றது. சுஜாதாவாக நடித்திருப்பது Neelesha BaVora

வசூலிலும் நூறு கோடிகளை வாரி குவித்துள்ளது.

இயற்கை எழில் கொஞ்சும் மலை பிரதேசம், தூய்மையான நீரோடைகள், வெளிர் நீல வானம், என்று இயற்கை காட்சிகள் அனைத்தும் கண்ணுக்கு விருந்து. மலைகளின் உச்சியில் மடாலயம். அங்கு பால்யம் மாறாமல் வாழ்க்கை அறியாமல் சுற்றி திர்யும் குழந்தை துறவிகள் என்று ஒவ்வொன்றையும் ஒரு தவம் போல் இயக்கியுள்ளார் பான் நளின்.

இயக்குநர் பான் நளின் இந்தியர். குஜாராத்தை சேர்ந்தவர். பரோடா பல்கலை கழகத்தில் பயின்றவர். திரைப்பட தாகத்தால் பல வித மனிதர்களையும் அவர்களின் வாழ்வியல்புகளை நேரில் காணவும் இந்தியா முழுவதும் சுற்று பயணம் செய்தவர். இருபது மேற்பட்ட குறும்படங்களை எடுத்துள்ள பான் நளினின் முதல் திரைப்படம் இது.

2006ல் உலக சுற்று விழிப்புணர்வு குறித்தான ஸ்பெயின் நாட்டின் மிக உயரிய விருதினையும் பெற்றுள்ளார்.

பல உலக நாடுகளின் திரைபட விழாக்களிலும் நடுவர் குழுவில் இடம் பெற்றதுடன், ஐக்கிய நாடுகள் சபை உலக அளவில் அடுத்த வருடம் சுற்று சூழல் குறித்தான 30 நாடுகளிலிருந்து 30 இயக்குநர்களை ஆவண படம் எடுப்பதற்காக அழைத்துள்ளதில், அதில் அழைக்கப்பட்ட ஒரே இந்தியர் பான் நளின் ஒருவர் மட்டுமே என்பது கூடுதல் தகவல்.

நம் இந்தியர் ஒருவரின் இந்த உலக சினிமாவையும் பாருங்கள்.

உடனே பார்க்க வழக்கப்படி டிரைலர்.

சில கூடுதல் காட்சிகள் இங்கே

Labor Pains

2009-10-05T02:13:00.001-07:00

தியா புத்தக பதிப்பக கம்பெனியில் முதலாளியின் காரியதரிசியாக வேலை பார்த்து வருகிறாள். அவன் என்னவோ அவள் மீது இருக்கும் கோபத்தில் அவனது செல்ல நாய் குட்டியை குளிப்பாட்டும் வேலையை ஒரு நாள் கொடுக்கவே அவன் மீது கடுப்பாகி தனது அலுவலக தோழியிடம் முதலாளியை கண்டபடி திட்டி தீர்க்கிறாள்.

இதை பக்கத்து பாத்ரூமில் இருந்த படியே ஒட்டு கேட்ட முதலாளி அவளது சீட்டை கிழிக்க அதிர்ந்து போகிறாள் தியா.

தனது தங்கையை படிக்க வைக்கவும் தனது வேலையை பாதுகாக்கவும் தான் கர்ப்பமாக இருப்பதாக சமயோசிதமாக பொய் சொல்கிறாள் தியா. கர்பத்திற்கு காரணம் தனது சீன காதலன் என்று ஒருவனையும் கூறிவிடுகிறாள். அதனால் கர்பிணியாக இருக்கும் போது பெண்களை வேலையை விட்டு தூக்க கூடாது என்ற அமெரிக்காவின் அரசாங்க விதிப்படி வேலையும் தப்பிக்கிறது.

தான் கூறிய பொய்யை காப்பாற்ற எப்படி எல்லாம் நாடகமாடுகிறாள் தனது பொய்யான கர்பத்தை எப்படி காப்பாற்றுகிறாள் என்பதே சற்றும் ஆபாசமில்லாத நகைச்சுவை மிகுந்த LABOR PAINS ஹாலிவுட் திரைப்படம்.

100% காமெடிக்கு நான் கிராண்டி. இந்த ஆண்டு தான் வெளிவந்துள்ளது

அமெரிக்க விதிப்படி வேலையை தக்க வைத்து கொண்ட தியா,
அலுவலக தோழியின் ஆலோசனைப் படி சிறு தலையணையை வயிற்றில் கட்டி கொண்டு தினமும் அலுவலகம் செல்லவும் ஆரம்பிக்கிறாள்.

அவள் மீது கடுப்பான முதலாளியும் தன் செல்ல நாய் குட்டியின் உடல் நிலை குறித்து கவலை பட்டு அதற்கு சிகிச்சையளிக்க வேண்டி, தனது பொறுப்புகளை தனது தம்பியான நிக்கிடம் ஒப்படைத்து விட்டு வெளியூர் செல்கிறான்.

நிக் வசீகர தோற்றம் கொண்ட வாலிபன். தொழிலில் ஏதாவது புதுமை செய்ய வேண்டும் என்ற தீரா தாகம் கொண்டவன்.

கர்ப்பிணி பெண்களின் மன நிலையும் பேறு காலத்தில் கிடைக்கும் சந்தோஷங்களையும் அவர்கள் படும் அவஸ்தைகளையும் குறித்த புத்தகம் ஒன்று வெளியிட்டால் விற்பனை சிறப்பாக இருக்கும் என்று நினைக்கிறான். இந்த நேரத்தில் கர்பிணியாக இருக்கும் தியாவே இதற்கு ஏற்ற ஆளாக நினைத்து அவளுக்கு பதவியுயர்வும் தனி அறையும் அளித்து அவளை இந்த Parenting Division என்று ஒன்று ஏற்படுத்தி அவளை அதற்கு எடிட்டராகவும் நியமிக்கிறான்.

இந்த கர்பிணி நாடகத்தால் அவளுக்கு கிடைத்த மரியாதையும் பதவியுயர்வும் தியாவிற்கு அளவற்ற மகிழ்ச்சியளிக்கிறது. அதை ரசிக்கவும் கொண்டாடவும் செய்கிறாள். எல்லா இடங்களிலும் அவளை தனி மரியாதையுடன் நடத்துவதையும் சலுகைகள் கிடைப்பதையும் நினைத்து நாடகத்தை தொடரவும் விரும்புகிறாள்.

புத்தக பதிப்பகம் நிமித்தமாக நிக்கும் தியாவும் நெருங்கி பழகுகின்றனர். அதுவே காதலாகிறது. ஆனால் தனது சகோதரியின் கர்ப்பிணி நாடகம் தியாவின் தங்கைக்கு சிறிதும் பிடிக்கவில்லை. பொய் சொல்லி தன்னை காப்பாற்ற வேண்டாமென்று கூறி அவளது பாதுகாப்பாய் வைத்திருந்த தலையணைகளையெல்லாம் கிழித்து போடுகிறாள்.

புத்தகம் வெளியாகி வசூலில் சக்கை போடு போடுகிறது. இது சம்மந்தமாக அன்று இரவு ஒரு மீட்டிங். நிக் கண்டிப்பாக வருமாறு தியாவை அழைக்க வயிற்றில் பலூனை கட்டி கொண்டு போக அங்கு ஏறபட்ட ஒரு சிறு சண்டையில் பலூன் வெடித்து தியா கர்ப்பம் இல்லை என்று தெரியவர தியா நொறுங்கி போகிறாள்.

பின்னர் நடந்த டிவி பேட்டியில் தனது அனைத்து தவறுகளுக்கும் தான் வருந்தவதாகவும் நிக்கிடம் மன்னிப்பும் கோருகிறாள் தியா.

தியாவை மன்னித்து ஏற்று கொண்டு அவளை திருமணமும் செய்து கொள்கிறான் நிக்.

இரண்டு வருடம் கழித்து நிஜமாகவே ஒரு நாள் தியா அலுவலகத்தில் பிரவச வலியில் துடிக்க அவளை தூக்கி கொண்டு மருத்துவமனைக்கு ஒடுகிறான் நிக். சுபம்.

தியாவாக நடித்திருப்பது 23 வயதான Lindsay Lohan. கொஞ்சும் இளமை துள்ளல், துறு துறு நடிப்பு என கலக்கியிருக்கிறார். குழந்தை நட்சத்திரமாய் அறிமுகமாகி பல அமெரிக்க தொலைகாட்சிகளில் நடித்தவர் என்பதால் நடிப்பில் அவ்வளவு இயல்பு. நடிப்பு மட்டுமல்ல பாப் பாடகர், மாடலிங், பேஷன் டிசைனர் என்ற பல துறைகளிலும் தனிதிற்மை வாய்ந்தவர். படத்தில் இல்லாத Lindsay Lohan கொடுத்த ஒரு போஸ் இங்கே.

நிக்காக நடித்திருப்பவர் Luke Kirby. இவரும் தொலைகாட்சி நடிகரே. நடிப்பில் சில விருதுகளையும் பெற்றுள்ளார். இயக்கம் Lara Shapiro. கதையென்று சொல்ல முடியாத ஒரு ஒன் லைனரை வைத்து ஒரு அட்டகாச காமெடியை தந்திருக்கிறார். பாராட்டுகள்.

குடும்பத்துடன் கண்டிப்பாக பார்க்கலாம்.

வழக்கப்படி உடனே பார்க்க டிரைலர் இங்கே

டிஸ்கி: தவிர்க்க முடியாத சில காரணங்களால் பல நாட்களாக இங்கு எழுத முடியாமல் போனது. அது பற்றி மின்னஞ்சல் மூலவும் தொலைபேசியிலும் தொடர்பு கொண்ட அனைத்து நண்பர்களுக்கும் உங்கள் அளவற்ற அன்பிற்கும் நன்றிகள் பல. இனி தொடர்ந்து எழுத முயற்சிக்கிறேன்.

The Keys To The House

2009-08-04T13:42:00.001-07:00

தந்தை எவ்வழி..

நடந்த கோணல் பாதை மீதினில்
புதிதாய் சின்னஞ்சிறு பாதங்கள்..
சற்றே நடுங்கி
நிதானித்து
பத்திரமாய் எழுகின்றன கால்கள்
தொடரப்போகும் அடிகளுக்கு…

என்ற விழியனின் கவிதை வரிகளுக்கு ஏற்ற தந்தையில்லை கியானி.

பாலோ பிறந்த அன்றே மனைவி இறக்க காரணமானது இந்த குழந்தைதான் என்று எண்ணி குழந்தையை விட்டு விட்டு ஓடிப்போனவன்.

பதினைந்து வருடங்களாக தனது மகனை போல வளர்ந்து வருபவர்கள் பாலோவின் மாமனும் அவனது மனைவியும். ஆனால் அவனுக்கு ஆறு வயதுக்குள்ள குழந்தையின் மன வளர்ச்சியே உள்ளதென்றும் இப்போது பெற்றோரின் அரவணைப்பு மிக மிக அவசியம் என்கின்றனர் மருத்துவர்கள். அதனால் அவனது மன நிலையில் மாற்றம் வரும என்று சொன்னதால் கியானியை அழைத்து அவனிடம் பாலோவை ஒப்படைகிறான் மாமன்.

மன்னிக்கவே முடியாத தவறை செய்து விட்டதாக வருந்தும் கியானி மன வளர்ச்சி குன்றிய தனது மகனை உள்ளத்தால் நெருங்குகிறானா ? பாலோ கியானியை தந்தையாக ஏற்று கொள்கிறானா என்பதே The Keys to the House இத்தாலிய திரைப்படம்.

துளியும் நஞ்சு கலக்காத பிஞ்சு மனதிற்குள்ளும் கடலளவு குற்ற உணர்வு கொண்ட தந்தை மனதிற்குள்ளும் நடக்கும் பாச போராட்டம்.

பெர்லினில் புகழ்பெற்று விளங்கும் MRC குழந்தைகளுக்கான மருத்துவமனையில் சில நாட்கள் தங்கி நடை பயிற்ச்சியும் மன நல பயிற்ச்சியும் பெறுவதற்காக வருகின்றனர் பாலோவும் கியானியும்.

மருத்துவமனையில் இருக்கும் மற்ற குழந்தைகளை கண்டு அதிர்ச்சியும் பதற்றமும் அடைகிறான் கியானி. அந்த மருத்துவமனையில் தனது மகனை விட கொடுமையான நோயால் பாதிக்கப்ட்டிருக்கும் இருபது வயது பெண்ணையும் அவளது தாய் நிக்கோலாவையும் பார்த்து நிலை கொள்ளாமல் தவிக்கிறான்.

அவனது தந்தை கியானிதான் என்று மாமா சொன்னதாக கூறும் பாலோ தந்தை கியானியை ஆரம்பம் முதலே முற்றாக வெறுக்கிறான். என்னதான் நீ எனக்கு செய்தாலும் என் மாமா ஆல்பிரட்டோ போல் வருமா என்கிறான்? ஆனாலும் தன் குற்ற உணர்ச்சியால் எல்லாவற்றையும் பொறுத்து கொண்டு பாலோவை நெருங்க அனைத்து வழியிலும் முயற்ச்சிகிறான் கியானி.

தினந்தோறும் அவனை நடை பயில பக்கத்தில் உள்ள பூங்காவிற்கும் அழைத்து செல்கிறான். அவன் கேட்ட உணவு பொருட்களையெல்லாம் வாங்கி கொடுக்கிறான். ஆனாலும் பாலோவோ கியானியை வெறுத்து கொண்டே இருகிறான். இவர்கள் இருவரின் அனைத்து செய்கைகளையும் அமைதியாக கவனித்து கொண்டிருக்கிறாள் நிக்கோலா.

ஒரு சமயம் பாலோ செய்கைகளை பொறுத்து கொள்ள முடியாது கோபம் கொள்கிறான் கியானி. என்ன செயவதென்றும் புரியாமல் தவிக்கவே நிக்கோலாவிடம் ஆலோசனை கேட்கிறான். அதற்கு நிக்கோலா இளம் வயதில் அவனுக்கு கிடைக்காத பெற்றோரின் அன்பும் அரவணைப்புமே இதற்கு காரணம். அதனால் "Prepare yourself for suffering if you intend to be close to him." என்று அறிவுரை சொல்கிறாள். அதையே பின் பற்றவும் உறுதி கொள்கிறான்.

ஒரு நாள் கைப்பந்தாட்ட மைதானத்தில் விளையாட்டை பாலோ ரசித்து கொண்டிருக்க சற்று அசட்டையாக வெளியே உலவுகிறான் கியானி. சிறிது நேரம் கழித்து வந்து பார்த்தால் பாலோவை காணவில்லை. எங்கு தேடியும் கிடைக்கவில்லை. துடித்து போகிறான் கியானி. பாலோ தன்னந்தனியே இரயில் ஏறி எங்கோ சென்று விடுகிறான். பிறகு காவலர் அவனை கண்டுபிடித்து கியானியிடம் ஒப்படைகின்றனர். மன நிலை சரியில்லாத மகனை இப்படிதான் கவனிப்பதா என்றும் கேள்வி எழுப்பவே பதில் சொல்ல முடியாமல் தவிக்கிறான் கியானி.

பாலோவை இன்னும் கூடுதல் கவனிப்புடன் பார்த்து கொள்வதாகவும் உறுதியளிக்கிறான். அவன் மீது இப்போது கோபத்திற்கு பதில் கனிவும் அன்புமே கியானிக்கு அதிகரிக்கிறது. தான் செய்யும் செயல்கள் நிலையறியாது செய்யும் குழந்தையை நினைத்து இரவெல்லாம் சோகமே உருவாகி பாலோவின் அருகிலேயே அமர்ந்து கண்ணீர் வடிக்கின்றான்.

கடும் மருத்துவ பயிற்ச்சிக்கு பிறகு சிறிது சிறிதாய் உடல் நலம் தேறும் பாலோவிற்கு மனம் மட்டும் இன்னும் தெளிந்த பாடில்லை. அது உடனடி தீர்வாகதென்றும் தொடர்ந்து செலுத்தும் அன்பும் ஆதரவுமே அவனை சிறிது குணமாகும் என்று மருத்துவர்கள் சொல்ல ஊருக்கு அழைத்து போக ஆயுத்தமாகின்றான்.

நீண்ட கார் பயணத்தில் செல்லும் போது பல்வேறு சேஷ்டைகளே செய்து கொண்டே வருகிறான் பாலோ. முதலில் அவைகளையெல்லாம் ரசித்து வரும் கியானி அவன் காரோட்ட இடையூறாகும் போது சிறிது கோபம் கொள்கிறான் கியானி. உடனே மாமா வீட்டிற்கே திருமவும் போக விரும்புவதாக கூறுகிறான் பாலோ.

காரை ஒரிடத்தில் நிறுத்தி தன் கோபத்தை குழந்தையிடம் காண்பித்தற்காகவும் இன்னும் பாலோ தன்னிடம் நெருங்க வில்லை என்று நினைத்து கண்ணீர் விட்டு கதறுகிறான். அந்த முடியாத கைகால்களுடன் தத்தளித்து காரிலிருந்து இறங்கி பாலோ தந்தையை அணைத்து “நான் இருக்கும் வரை நீ அழவே கூடாது. நான் உன்னை விட்டு என்றும் பிரிய மாட்டேன் என்று கூறுவதுடன் திரைப்படம் நிறைவு பெறுகிறது.

பதினைந்து மகனுக்கு தந்தையாக உணர்ச்சி குவியலாய் நடிப்பை கொட்டியிருப்பவர் நாற்பதே வயதான Kim Rossi Stuart. நடிப்பை விருப்ப பாடமாய் படித்திருக்கும் இவர் ஐந்து வயது முதல் நடித்து வருபவர். இவரது குடும்பமே ஒரு கலை குடும்பம் தான். இவரது தந்தையும் சகோதரியும் நடிகர்களே.

மனதின் பொது மொழி மெளனம். அந்த மெளனத்தின் அடியாழத்தில் இருப்பவை சிரிப்பும் அழுகையும் தான். அந்த சிரிப்பையும் அழுகையையும் தனது அருமையான நடிப்பால் திரையில் மொழி பெயர்த்திருக்கிறார் என்றே சொல்ல வேண்டும்.

இனம், மதம், மொழி என்று அனைத்தையும் கடந்து மானுட உணர்ச்சிகளை பேசுவதே உலக படைப்பு. அப்படியொரு அற்புத படைப்பை தந்திருக்கும் இயக்குநர் Gianni Amelio. தனது பெயரையே தந்தையின் பாத்திர படைப்பிற்கு வைத்து அற்புத ஒளிபதிவோடு கதையை ஒரு கவிதையாக்கியிருக்கிறார்.

ஒரு இரயில் பிராயணத்தில் தொடங்கி ஒர் கார் பிராயணத்தில் முடிவதாய் திரைக்கதை அமைத்திருப்பது வாழ்க்கை பயணத்தின் சந்தோஷம், வலி, அன்பு, சகிப்புதன்மை, தியாகம், என்று அனைத்தையும் சொல்லாமல் சொல்லியிருக்கும் இயக்குநரை எவ்வளவு பாராட்டினாலும் தகும்.

2004ல் வெளிவந்த இத்திரைப்படம் வெனிஸ் திரைப்பட விருதுகள் உட்பட உலக அளவில் பல விருதுகளை வாரி குவித்துள்ளது.

சந்தர்ப்பம் கிடைத்தால் நிச்சயம் பார்க்க வேண்டிய படம்.

உடனே பார்க்க டிரைலர் இங்கே

அற்புத கலைஞன் அப்பாஸ் கிராஸ்தமி

2009-07-22T10:38:00.001-07:00

வாழ்வை நமக்கு நெருக்கமாக காட்டுகிற சினிமாக்கள் ஈரானிய திரைப்படங்கள். இஸ்லாமிய புரட்சிக்கு பின் மிக கடுமையான தணிக்கை முறையிலிருந்து வெற்றி பெறுவது அவ்வளவு லேசான காரியமில்லை என்று கூறினால் அது கண்டிப்பாக மிகையில்லை.

இன்று அதி உன்னத நிலையை ஈரானிய திரைப்படங்கள் அடைந்ததற்கு மிக முக்கியமாக காரணிகளில் ஒருவர் தான் அப்பாஸ் கிராஸ்தமி. உலக சினிமா ரசிகர்களை ஈரானிய சினிமாக்களின் பக்கம் திரும்பி பார்க்க வைத்தவர்களுள் முக்கியமானவர்.

1940ம் வருடம் ஜீன் 22ம் தேதி டெஹ்ரானில் பிறந்தார். சிறுவயது முதலே ஓவியத்திலும் கலையிலும் அவருக்கு ஈடுபாடு அதிகம் இருந்தது. அந்த விருப்பத்தின் பேரில் டெஹ்ரான் பல்கலைகழகத்தில் கலையும் ஓவியமும் பயின்றார்.

தனது 18வயதில் ஒரு ஓவிய போட்டியில் பரிசு பெற்றதுடன் தனது வாழ்க்கை இனி கலை ஓவியம் சார்ந்த்தாக இருக்க வேண்டும் என்று மனதார நம்பிக்கை கொண்டார்.

ஆனால் கல்லூரி படிப்பு முடித்ததும் அவருக்கு கிடைத்ததோ டிராபிக் போலிஸ் வேலை. சில நாட்கள் மனம் லயிக்காமல் கிடைத்த வேலையை செய்தார். பின்னர் நண்பர் ஒருவரின் உதவியால் விளம்பரங்களுக்கு போஸ்டர் டிசைன் செயவதும் ஓவியம் வரைவதுமாக இருந்தார்.

பெரும் வாழ்க்கை போராட்டத்திற்கு பிறகு விளம்பர படங்கள் எடுக்கும் வாய்ப்பும் கிட்டியது. 1962 முதல் 1966 வரை நான்கு ஆண்டுகள் இரானிய தொலைகாட்சிக்காக சுமார் 150க்கும் மேற்பட்ட விளம்பர படங்களை இயக்கினார். 1969ல் கிராஸ்மிக்கு பர்வீன் என்ற பெண்ணுடன் திருமணமானது. அஹ்மத் கிராஸ்மி, பாஹ்மான் கிராஸ்மி என்ற இரு மகன்கள் உள்ளனர்.

1979 புரட்சிக்கு பிறகு பெரும்பாலான கலைஞர்கள் ஈரானை விட்டு வெளியேறி மேற்கத்திய நாடுகளில் குடியேறினர். ஆனால் கிராஸ்தமி தன் சொந்த மண்ணை விட்டு செல்பவன் ஒரு கலைஞனாக இருக்க முடியாது என்ற எண்ணத்தில் ஈரானிலேயே வாழ்ந்து வந்தார்.

தாய் நாட்டு மண்ணின் மணத்தை அறிந்து கொள்ளவும் அனைத்து வகைப்பட்ட கடை நிலை மனிதர்களின் மனதை அறிந்து கொண்டதின் மூலம் மட்டுமே தனது நீண்ட நாள் கலைவாழ்க்கைக்கு பயணிக்கிறது அதற்கு இதுவே முக்கியமான முடிவாக இருந்தது என்று நன்றியுடன் நினைவு கூறுகிறார்.

The Bread and Alley இவர் 1970ம் ஆண்டு இயக்கிய முதல் கறுப்பு வெள்ளை குறும்படம். ஒரு சிறுவன் ரொட்டி துண்டுடன் வீடு செல்லும் போது பசியுடன் துரத்தும் ஒரு நாயை பற்றியது. பத்தே நிமிடங்களில் ஒடகூடிய இக்குறும்படத்தின் மூலம் தான் யார் என்பதை தானே அறிமுகப்படுத்தி கொண்டார்.

அவருக்குள் ஒளிந்திருந்த அந்த கலைஞனின் கலைப்பயணம் ஆரம்பமாகியது.

The Experience { 1973 } என்ற குறும்படத்தையும் இயக்கினார். இதில் அவர் அவ்வளவாக திருப்தியடையவில்லை. இன்னும் கடுமையாக முயற்ச்சி செய்ய வேண்டும் என்ற எண்ணமே அவரின் மனதை உறுத்தி கொண்டு இருந்தது.

1974ல் வெளியான The Traveller திரைபடத்தை குறிப்பிட்டு சொல்ல வேண்டும். ஆனால் இது 71 நிமிடங்களில் ஒரு முழு நீள திரைப்படமாயிற்று. ஈரானிய தேசிய கால்பந்தாட்டத்தை காண ஆவலுடன் துடிக்கும் ஒரு பத்து வயது சிறுவனின் வாழ்வியல் நிகழ்ச்சிகளையும் உள்ளுணர்வுகளையும் சித்தரிக்கும் காவியம். ஒரு விருப்பத்தின் அல்லது அதீத ஆசையின் காரணமாக பதின்ம வயது மனதுக்குள் ஏற்படும் விபரீத எண்ணங்களை சித்தரிக்கும் படமாக அமைந்து அனைவரின் பாராட்டுகளையும் அள்ளியதோடு ஈரானிய சினிமா ரசிகர்களை திரும்பி பார்க்க வைத்த ஒரு அற்புத திரைப்படம்.

So Can I , Two solutions for one problem, A wedding Suit ஆகிய படங்களையும் 1975களில் இயக்கினார்.

அபபாஸ் கிராஸ்தமியின் முதல் திரைப்டம் என்று 1977ல் வெளியான The Report திரைப்படத்தை சொல்லலாம். இத்திரைப்படம் 112 நிமிடங்களில் முடிவடைவதாக எடுக்கப்பட்டது. வரி வசூல் செய்யும் ஒருவன் குடும்ப சூழ்நிலையின் காரணமாக கையூட்டு பெற முற்படுவதும் பின்னர் மன உளைச்சலில் தற்கொலைக்கு முயலுவதின் பின்னணியில் பின்னப்பட்ட ஒர் அற்புத நிகழ்வுகள் நிறைந்த திரைப்படம்.

மற்றும் ஒரு பெருமையும் இத்திரைப்படத்திற்கு உண்டு. இத்திரைப்படத்தில் இருபது வயது இளம் பெண்ணாக இவரால் அறிமுகப்படுத்தப்பட்ட நடிகை Shohreh Aghdashloo. இவர் தனது 54 வயதிலும் இன்று வரை அமெரிக்க தொலைகாட்சிகளிலும் ஹாலிவுட்டில் நடிப்பது மட்டுமல்லாது ஆஸ்கருக்கும் பரிந்துரைக்கப்பட்ட முதல் ஈரானிய நடிகை.

முழுநீள திரைப்படங்களை இயக்கினாலும் குறும்படங்களில் மீதான காதல் இவருக்கு எப்போதும் உண்டு. 1980களிலும் நிறைய குறும்படங்களை இயக்கினார்.

ஈரானை விட்டு வெளியேயும் இவரின் புகழ் பரவ காரணமானது Where Is the Friend's Home? இத்திரைப்படம் 1987ல் வெளியானது.

பள்ளி நண்பனின் நோட்டு புத்தகத்தை அவனிடம் சேர்க்க பாடுபடும் ஒரு சிறுவனின் கதை. அந்த நோட்டு புத்தகம் இல்லையெனில் நண்பன் பள்ளியில் இருந்து வெளியேற்றபடுவான் என்ற பயத்தால் பக்கத்து கிராமத்திற்கு செல்கிறான். வாழ்க்கையின் எளிய நிகழ்வுகளே இந்த திரைப்படத்தின் ஆதாரம். அதுவும் குழந்தைகளின் உலகை இவரை போன்று யதார்த்தமாக காட்சிபடுத்துவதில் இவருக்கு இணை இவரே.

உலக அளவில் பேசப்பட்ட இத்திரைப்படம் ஸ்விஸ் திரைப்பட விழாவில் வெண்கல சிறுத்தை பரிசை பெற்றதோடு டெஹ்ரான் திரைப்பட விழாவில் தங்க பரிசையும் வென்றது.

30,000 மக்களை கொன்று தன் அகோர பசியை தீர்த்து கொண்ட 1990 ஈரானிய கடும் பூகம்பத்தில் பெரிதும் பாதிக்கபட்டார். தன் முந்தைய திரைப்படத்தில் நடித்த மக்களை தேடி புறப்பட்டு அதை ஒரு திரைப்படமாக்கினார். அதுவே 1991ல் வெளியான Life, and Nothing More... இது ஒரு ஆவணப்படம் போன்றும் எடுக்கப்பட்டது. ஆனால் டாக்குமெண்ட்ரிக்குரிய வறட்டுதனம் சிறிதும் இல்லாமல் இருப்பது ஒரு ஆச்சரியமே.

1994ல் Through the Olive Trees என்ற திரைப்படத்தை எழுதி இயக்கினார். கட்டிட வேலை செய்யும் ஒருவனை திரைப்பட நாயகனாக்கும் முயற்ச்சி பற்றிய கதை. இதுவும் கிராமிய பின்னணியில் எடுக்கப்பட்டதுடன் இதில் ஊடே ஒரு காதல் கதையும் உண்டு.

இந்த மூன்று திரைப்படங்களும் ஈரானிய மிகச்சிறிய கிராமமான கோக்கர் என்ற சிற்றூரில் எடுக்கப்ப்ட்டதால் இவை Koker trilogy என்று சினிமா ஆர்வலர்களால் ஆர்பரிக்கப்பட்டது.

அப்பாஸ் கிராஸ்தமியின் மேலே உள்ள மூன்று திரைப்படங்களும் எளிமையான தோற்றத்துடன் ஆழமான உள்ளுணர்வுகளை வெளிப்படுத்துபவை. ஒரு திரைப்ப்டத்திற்கு தகுதியில்லாதவை என்று ஒதுக்கி தள்ளும் எளிய நிகழ்வுகளை கொண்டே கட்டமைக்கபட்ட்வை. ஆனால் வாழ்வோடு இசைந்த ஆதார சுருதியை மனதின் அடியிலிருந்து மீட்டு திரைப்படங்களாக வடிவமைத்து அதை படைப்பதில் பெரும் வெற்றி பெற்றதோடு திரைப்படங்களுக்கு ஒரு புது இலக்கணத்தை எழுதியிருக்கிறார்.

இந்த Koker trilogy என்ற சொல்லபடுகின்ற திரைப்டங்கள் வெற்றி பெறாத இடங்களே இல்லை. பிரான்ஸ், நெதர்லாந்து, ஸ்வீடன் ம்ற்றும் பின்லாந்து ஆகிய அனைத்து நாடுகளின் திரை ஆர்வலர்களை வியப்பில் ஆழ்த்தியது.

வால்ட் டிஸ்னியின் திரைப்பட வெளியீடும் நிறுவனமான Miramax Films நிறுவனம் இத்திரைப்டங்களை அமெரிக்காவில் மட்டுமல்லாது உலகமெங்கும் வெளியிட்டு அப்பாஸ் கிராஸ்தமிக்கு ஒரு மிகப்பெரிய சிவம்பு கம்பளத்தை விரித்து கொடுத்தது.

தான் மட்டும் வரலாற்றில் பதிய வைக்க கூடிய ஒரு இடத்தை அடைந்து விட்டால் போதுமா..?? அதில் மட்டுமே ஒரு நிஜ கலைஞன் திருப்தியடைவதில்லை. தனது வெற்றிக்கு உறுதுணையாய் இருந்தவர்களையும் அரவணைத்து அவர்களுக்கும் முடிந்த வாய்ப்பை ஏற்படுத்தி கொடுப்பதன் மூலம் தான் ஆத்ம திருப்தி கொள்ள இயலும்.

அதனால் தான் தனது துணை இயக்குநர் Jafar Panahi க்காக திரைக்கதை எழுதி அவரை இயக்கவும் வைத்த பெருமையும் உண்டு அப்பாஸ் கிராஸ்மிக்கு.

The Jounery, White Balloon ஆகிய திரைப்படங்களுக்கு திரைக்கதை மட்டும் எழுதினார். குருவின் பெயரையையும் காப்பாற்றினார் Jafar Panahi.

White Balloon திரைப்படம் பல விருதுகளை அள்ளியது. இந்த திரைப்படத்தை பற்றிய எனது முந்தைய பதிவு.

பல திறமையான இயக்குநர்களை கண்டறிந்து அவர்களுக்காக சில திரைபடங்களையும் தயாரித்து சிறந்த திரைப்பட தயாரிபாளருமானார்.

மீண்டும் 1997ல் The Taste of Cherry என்ற திரைபடத்தை தயாரித்து இயக்கவும் செய்தார். இந்த திரைப்படமும் அப்பாஸ் கிராஸ்தமியின் மற்ற படங்கள் போலவே பெரிய கதையம்சம் கொண்டதில்லை.

ஒரு மனிதனின் ஒரு நாள் வாழ்க்கையில் எதிர்பாராமல் நடக்கும் சம்பவங்கள், சந்திப்புகள் என்று சதாரண காட்சியமைப்புகளே. ஆனால் இந்த காட்சியமைப்புகள் உரையாடலில் கிராஸ்தமி உருவாக்கும் அதிர்வலைகள் மிக மிக அழுத்தமானது. திரைப்படம் முடிந்ததும் ஒரு இனம் புரியாத அழுத்தத்தை ஏற்படுத்தி விடும். இந்த திரைப்படம் கேன்ஸ் திரைப்பட விழாவில் தங்க பரிசை தட்டி சென்றது.

1999ல் வெளியானது The Wind Will Carry Us. இந்த திரைப்படத்தை ஏற்கனவே சிலாகித்து எழுதியது இங்கே.

2002ல் இயக்கிய Ten திரைப்படம் முற்றிலும் வேறுபட்ட வகையில் படமாக்கப்பட்ட ஒரு திரைப்படம். ஒரு காரின் பயணத்தில் தொடங்கி காரிலேயே முடிவடையும் திரைப்படம்.

காரில் ஒரு தாயும் மகனும் கடும் விவாதத்தில் ஈடுபடுவதாக தொடங்கி அவள் செல்லும் வழியில் லிப்ட் கொடுப்பவர்களின் வாழ்க்கையை பற்றி அவள் அறிந்து கொள்ளும் போது நடைபெறும் உரையாடலில் பயணித்து அதுனூடே திரைப்படம் பார்ப்பவர்களையும் பயணிக்க வைத்திருப்பார். ஒரு திரைப்படத்தை கார் பயணத்தில் தொடங்கி காரிலேயே முடித்து விடும் தைரியம் இவரை தவிர வேறு எவருக்கும் வருமா என்பது சந்தேகமே..?

இதற்கிடையே 2001ல் ஐக்கிய நாடுகளின் International Fund for Agricultural Development என்ற அமைப்பு உகாண்டா நாடுகளின் ஆதரவற்ற எய்ட்ஸ் நோயால் பாதிக்கப்பட்ட மக்களை பற்றிய ஆவண படமெடுக்க அப்பாஸ் கிராஸ்தமியை தேர்வு செய்தது.

இம்முறை ஈரானுக்கு வெளியே சென்று ABC Africa ஒரு மிகச்சிறந்த ஆவண படத்தை இயக்கி தந்தார். இம்முறையும் குழந்தைகளுடன் பணி புரிய எனக்கு கிடைத்த அரிய சந்தர்பம் என்று நினைவு கூறுகிறார் அப்பாஸ்.

2004ல் மீண்டும் Ten on Ten என்ற ஆவணபடத்தையும் இயக்கினார். இது தனது முந்தைய திரைப்படமான 2002ல் உருவாக்கிய Ten உருவாக்கப்பட்ட விதத்தையும் விவரிக்கிறது.

Tickets 2005ல் வெளியான நகைச்சுவை கலந்த திரைப்படம். நாம் அன்றாட பயணிக்கும் பொது போக்குவரத்தான பேருந்துகளிலும் தினசரி சாலைகளில் சந்திக்கும் முன் பின் தெரியாத நபர்களின் ஊடே நடக்கும் சிறு சிறு சம்பவங்களின் தொகுப்பு.

இவரின் குறும்பட ஆசை தணியாது போலும். 32 நிமிடங்கள் ஒடும் The Roads of Kiarostami என்ற குறும்படத்தை 2006ல் இயக்கியுள்ளார்.

இதுவரை இயக்கிய திரைபடங்களில் எதிலும் இல்லாத ஒரு புதுமையை கையாண்டு 2008ம் ஆண்டு Shirin என்ற திரைப்படத்தை இயக்கியுள்ளார். 114 இரானிய நாடக மற்றும் திரைகலைஞர்களுடன் பிரான்ஸ் நடிகை Juliette Binoche யுடன் இணைத்து இத்திரைப்படம் எடுக்கப்பட்டுள்ளது.

800 ஆண்டுகளுக்கு முந்தைய பெர்சிய காதல் கதையை இவர்கள் பார்ப்பது போலவும் அதனால் அவர்கள் மனதில் ஏற்படும் எண்ணங்களை வெளிப்படும் விதமாக வடிவமைக்கப்பட்டுள்ளது. முழுக்க முழுக்க குளோசப் காட்சிகளை மட்டுமே கொண்ட திரைபப்டமாகும். இதுவரை 65வது கேன்ஸ் திரைப்பட விழாவில் மட்டுமே திரையிடப்பட்டுள்ளது.

இவரின் திரைப்பயணம் இன்னும் தொடர்கிறது.

இத்தனை உலக விருதுகளை வாரி குவித்திருந்தாலும் அப்பாஸ் கிராஸ்தமி தனது திரைப்படங்களில் எந்த கதையும் சொல்வதும் இல்லை என்று மேலோட்டமான குற்றசாட்டும் இவர் மீது உண்டு. இது சரி இது தவறு அவர் எதையும் வகைப்படுத்துவதுமில்லை என்கிறார்கள் சில உலக சினிமா பார்வையாளர்கள்.

ஆனால் இவரோ ஒன்றை மட்டும் முதன்மை படுத்துவதோ சரி தவறு என்று நிர்ணயிப்பதும் வன்முறையின் ஒரு பகுதிதான் என்கிறார். எனது படங்களில் எது இருக்கிறதோ அவையே எனக்கு பிடித்தவை என்றும் உணர்ச்சி வசப்பட வைப்பது தனக்கு பிடிக்காத விஷயம் என்கிறார்.

பல படங்கள் உங்களை மகிழ்வித்து நாற்காலியோடு உட்கார வைக்கும். ஆனால் படம் முடிந்ததும் தியேட்டரை விட்டு வெளியேறும் போது ஏமாற்றப்பட்டது மெள்ள மெள்ள தெரிய வரும். சக்தியை கொடுப்பது போல் எனர்ஜி பூஸ்டர் அல்ல நான் என்கிறார். மேலும் ஒரு நல்ல படம் சக்தியை இழக்க செய்வதாக வாழ்க்கையின் நெருக்கத்தை ஏற்படுத்துவதாதான் இருக்க வேண்டுமே தவிர பார்வையாளனை பிணைக்கைதியாக பிடித்து வைத்திருப்பதாக இருக்க கூடாது என்கிறார். { இது நமக்கு மிகவும் கவனிக்க வேண்டிய செய்தியாக எனக்கு தெரிகிறது }

உலகின் எல்லா இயக்குநர்களுக்கும் எது பிரச்சினையோ அதுதான் ஈரானிய இயக்குநர்களுக்கும் இருக்கிறது. ஒரு திரைப்படம் வெற்றியடையுமா தோல்வியடையுமா என்று யாருக்கும் தெரியாது. ஆனால் ஒரு தயாரிப்பாளனின் நன்மதிப்பை பெறுவதே மிகப்பெரிய சாதனைதான்.

ஆனாலும் வாழ்வியலோடு இணைந்து வாழ்வின் மெய்மையை கண்டடையும் பயணமாகி அதுனூடே திரைப்படத்தை ஒரு கலையாக கருதி தன்னை ஒரு ஓவியனாக, கலைஞனாக, எடிட்டராக, தயாரிப்பாளராக மற்றும் இயக்குநராக வடிவமைத்து கொண்டு அந்த கலை வடிவத்தை அன்பாக, நேசமாக, காதலாக யதார்த்தின் ஒரு பதிவாக அவற்றை வெளிப்படுத்துவதால் அப்பாஸ் கிராஸ்தமி ஒரு அற்புத கலைஞன் என்று சொல்வதில் மிகுந்த ஆனந்தமே...

Tuya de hun shi

2009-07-13T12:29:00.000-07:00

Tuya de hun shi { Tuya's Marriage}

சீன திரைப்படம்.

மங்கோலிய பாலைவன பிரேதசத்தில் வாழும் தூயா என்ற பழங்குடி பெண்ணின் வாழ்க்கை போராட்ட கதைதான் Tuya' Marriage.

தூயாவின் கணவனான Bater விபத்து ஒன்றில் இரு கால்களையும் செயலிழக்கிறான். அதனால் குடும்பம் வருமானமின்றியும் ஆதரவில்லாமல் மிகுந்த அல்லல் படுகின்றனர். அவளோ மன தைரியத்துடன் கணவனையும் இரு குழந்தைகளையும் மிகுந்த சிரமங்களுக்கிடையில் பராமரிக்கிறாள்.

தூயாவிற்கு மறுமணம் புரிதலே இதற்கு தீர்வாகவும் என Bater கூறவே அவனை விவாகரத்து செய்யவும் வேறு ஒருவரை மணக்கவும் இருவரும் ஒரு மனதோடு சம்மதித்து குடும்ப நீதி மன்றதில் மனு இடுகின்றனர்.

ஆனால் தனது கணவனையும் இரு குழந்தைகளையும் அன்போடு வாழ்நாள் முழுவதையும் ஆதரிப்போம் என வாக்குறுதி தருவோரையே தான் மணப்ப்பேன் என் உறுதியோடு கூறுகிறாள் தூயா.

அவளை பெண் பார்க்க பல பேர் வருவதும் அவர்க்ள் சென்றதும் அதை பற்றி இருவரும் விவாதிப்பதும் சோகத்திலும் ஒரு நகைச்ச்சுவை.

தூயாவின் பழைய பள்ளி தோழனும் பெரிய செல்வந்தனுமான ஒருவன் அவளை மணக்க விரும்புகிறான். ஆனால் அவளது கணவனை ஒரு விடுதியில் வைத்து பராமரிக்க மட்டுமே இயலும் என்றும் அனைவரும் சேர்ந்து இருப்பது இயலாது என கூறி கணவனை விடுதியில் சேர்த்து விடுகின்றனர். கணவனும் அரை மனதுடன் சம்மதித்து விடுதியில் தங்குகிறான்.

பின்னர் மன உளச்சலால் குடும்பத்திற்கு தான் பாரமாக இருப்பதை எண்ணி தற்கொலைக்கு முயலுகிறான். இதை அறிந்த தூயா பதறியடித்து துடித்து போய் மருத்துவமனைக்கு ஒடி வருகிறாள்.

தனது உடல் சுகத்திற்க்காக தான் நண்பன திருமணத்திற்கு ஒப்பு கொண்டதாகவும் நினைக்கிறாள். நண்பனின் செயல்களுக்கும் தூயாவிற்கு பிடிக்கவில்லை. எனவே அவனை மணக்கும் எண்ணத்தையே அடியோடு விட்டு விடுகிறாள்.

தூயாவின் அண்டை வீட்டுகாரனான சென்கிக்கு தூயா மீதும் அவளது குடும்பத்தின் மீது அளவு கடந்த அன்பும் பாசமும் உண்டு.

சென்க்கியின் மனைவியோ பணத்திற்கு ஆசைப்பட்டு இவனை விட்டு விட்டு வேறு ஒருவனுடன் ஒடிப் போய் விடுகிறாள். வாழ்க்கையையே வெறுத்த சென்கி தூயாவின் குடும்பத்துடன் அதீத பாசத்துடன் பழகுகிறான்.

அந்த பாலைவன பிரதேசத்தில் தூயா தினமும் தண்ணீருக்காக மிகுந்த தூரம் செல்ல வேண்டி இருப்பதால் அவளுக்காக கிணறு தோண்டும் முய்ற்ச்சியில் சென்கி ஈடுபடுகிறான். எதிர்பாராத விதமாக கிணறு தோண்டும் போது விபத்தில் சிக்குகிறான். தனக்காக சிரம்ப்படும் சென்கிக்காக தூயா வருத்தமும் வேதனையும் அடைகிறாள்.

சென்கியும் தூயாவை மணக்க நினைக்கிறான். அவளுக்கும் அவன் மீது காதல் அரும்புகிறது.

ஆனால் விதி விடாது தூயாவை துரத்துகிறது...

தூயாவின் திருமணம் நடந்ததா..?? அது யாருடன்..??

Wei Lu வின் கதையை மையமாக கொண்டது இத்திரைப்படம்.

கால் நடைகளுடனும் குளிருக்கான மதுவுடனும் அவர்களின் வாழ்வோடு இசைந்து செல்வதை கவிதையாக படைத்திருக்கிறார் இயக்குநர்.
நுண்மையான உணர்திறன், அவதானிப்புத்திறன்தான் படைப்பின் நுண் அம்சங்களையும் காட்சிகளை சிறப்பாக்குகிறது. உணர்வதும் பிறகு அதை மொழிவதும் இந்த நுண் அம்சங்களிலேயே பெரிதும் தங்கியிருக்கிறது. இதை அற்புதமாக செய்திருக்கிறார் இயக்குநர் Quanan Wang

இயற்கை எழில் கொஞ்சும் மலைகளின் மீதும் அந்த பாலைவனத்திலும் ஒளிப்பதிவு அருமை. நம்மை படத்துடன் இயைந்து அழைத்து செல்கிறார் இயக்குநர்.

தூயாவாக நடிக்கும் Nan Yu மிகச்சிறந்த சீன நடிகை. மிக துல்லியமான உணர்ச்சிகளை வெளிகாட்டுவதிலும் நம்மை அதிர வைக்கிறார்.
தாயாக அவர் காட்டும் அன்பும் பரிதவிப்பும் அத்தனை இயல்பு.

உலகமெங்கும் ஒவ்வொரு பெண்ணும் வாழ்க்கைக்காக போராடதான் வேண்டுமா..?? என்ற கேள்வி மனதின் அடிமனதில் ஒரு சுமையாக சித்தரிக்க திரைப்படம் நிறைவு பெறுகிறது. அந்த கடைசி காட்சியில் தூயாவின் மனதில் நிகழும் உள்வலியும் கலந்த வெளிப்பாட்டை காணலாம், உணரலாம்

பெண்ணின் மனதை உணர்த்தும் உமா மகேஸ்வரியின் கவிதை ஒன்று:

எற்றி உடைத்துப் போன

பீங்கான் சிதறல்களைப்

பெருக்கிச் சுத்தப்படுத்துகையில்

கேவலத்தின் நுனியில் நிற்கிறேன்

புறக்கணிப்புகளைத்

தொடுத்துக் கொள்கிறேன்

பூக்களைப்போல மென்மையாக.

முகச்சுழிப்புகளின் கசப்பில்

உப்பும் புளிப்பும் விரவி

உண்ணத்தகுந்ததாகப் பதப்படுத்துகிறேன்.

என் செத்த கோபத்தை மட்டும்

செய்வதறியாது

எறிகிறேன்

கழிவறைக் கோப்பைக்குள் .....

இந்த சீன திரைப்படம் பெர்லின் மற்றும் பல சீன திரைப்பட விருதுகளை வாரிக்குவித்தது. அனைத்து இந்திய திரைவிழாக்களிலும் திரையிடப்பட்டதும் குறிப்பிடதக்கது.

2007 ல் பெர்லின் & சிகாகோ திரைப்பட விழா விருதுகள் மற்றும் நான்கிற்கும் மேற்ப்பட்ட உலக விருதுகளை அள்ளியது.

சந்தர்பம் கிடைத்தால் கண்டிப்பாக பாருங்கள்.

உடனே பார்க்க வழக்கப்படி டிரைலர்

டிஸ்கி: சற்றே விரிவான மீள் பதிவு.