Niwemang {Half Moon}

Niwemang {Half Moon}

மனித நேயத்தையும் மனித உறவுகளின் நெகிழ்ச்சியான கவித்துவ வாழ்வியலை கொண்டவை ஈரானிய மற்றும் குர்ஷித் மொழி திரைப்பட‌ங்கள்.

சதாமின் வீழ்ச்சிக்கு பின் இராக் சென்று ஒரு மாபெரும் இசை விருந்தில் பங்கு கொள்ள முயன்ற ஒரு இசை ஆர்வலரின் கதை தான்
Hafl Moon.


இரானில் வசித்த ஒரு குர்திஷ் இசைமேதையின் கதை. அவரை மாமோ என்று அழைக்கிறார்கள்.


மாமோவின் அதி தீவிர ரசிகன் காகோ. அவன் தான் இந்த இசை விருந்துக்கு செல்ல எல்லா ஏற்பாடுகளையும் செய்கிறான்.


எல்லை தாண்டி போக வாகன வசதி இல்லை. காகோவின் நண்பனிடம் ஒரு பேருந்து உள்ளது. அது கிட்டதட்ட "சுந்தரா டிராவல்ஸ்" பஸ் தான்.


நண்பனிடமிருந்து இரண்டு வாரங்களுக்கு வாடகைக்கு தருமாறும் அதற்கு ஈடாக தான் உயிரினும் மேலாக நேசித்த இரண்டு சண்டை கோழிகளை அவனுக்கு பரிசாக அளிப்பதாக கூற நண்பனும் ஒப்பு கொள்கிறான்.


இரண்டு வாரங்களில் நடந்தது என்ன..?


எல்லை தாண்டி போய் சேரும் வழியில் அடைந்த சிரமங்களையும் அவர்களின் இசை பற்றையும் மண்ணின் மணத்தோடும் நகைச்சுவை இழையோடும் அழகாக சித்தரிக்கின்றார் இயக்குநர் Bahman Ghobadi.


இவரும் என் உலக சினிமா ஆர்வத்தை தூண்டிய மஜித் மஜிதி போன்ற இரானிய இயக்குநர்.


மாமோ தனது சீடர்களை ஒவ்வொருவராக ஒவ்வொரு இடத்தில் பிக்கப் செய்து கொண்டு புறப்படுகிறார்.


காகோ வழி நெடுக தான் ஆசையாய வாங்கிய Handy Cam மூலம் அனைத்தையும் படம் எடுத்து தள்ளுகிறான்.


கடைசியாய் வந்து சேர்ந்த மாமோவின் கடைசி மகன் சீவல்புரி சிங்காரம் & காழியூர் நாராயணின் கஸ்டமரோ என்னவோ தந்தைக்கு கண்டம் என்றும் பவுர்ணமி (full moon) நெருங்குவதால் போனால் திரும்புவது கடினம் என்றும் கூறுகிறான்.


எதையும் லட்சியம் செய்யாத மாமோ இராக்கில் இசை விருந்து தனது நீண்ட நாள் கனவு என்றும் பல ஆண்டுகள் இதற்காக காத்திருப்பதாய் கூறி பயணத்தை தொடர தீர்மானிக்கிறார்.



திருவிளையாடல் ""ஹேமநாத பாகவதர்"" போல இத்தனை வாத்திய கோஷ்டிகள் இருந்தாலும் ஒரு Female Singer இல்லையே என குறை பட்டு கொள்கிறார் மாமோ.


தனது ஒரே மகளை அழைத்து செல்ல முற்படுகிறார். ஆனால் மாப்பிள்ளை தான் நடத்தும் இசை பள்ளியில் மாணவிகளுக்கு இசை பயிலுவது தடை படும் என கூறி மறுக்கிறான்.



ஹிஷோ எனற பெண்ணை சந்திக்கிறார். அவளது குரல் தெய்வீகராகம் என்றும் அவளை அழைத்து செல்வதே மிகப்பொருத்தம் எனவும் முடிவெடுக்கிறார்.


ஆனால் ஹிஷோ அவளை போன்ற 1334 இசை ஆர்வமுள்ள பெண்களுடன் வாழ்ந்து வருவதுடன் இசைக்காகவே உயிர் வாழ்பவள்.ஆனால் எல்லை தாண்டி போவதின் அபாயங்களை எண்ணி சற்று கலக்கமடைகிறாள்.

மாமோவோ எல்லா ஏற்பாடுகளும் தயார் என கூறி பேருந்தில் ரகசிய அறைக்குள் அவளை ஒளித்துவைத்து கொண்டு மேற்கொண்டு பயணிக்கின்றனர்.


வந்தது எல்லை.. செக்போஸ்ட்.


இது நம்ப பூந்தமல்லியோ அல்லது ஓசூர் செக்போஸ்ட் போல இருந்தால் ஒரு சின்ன கட்டிங்கில் மேட்டர முடிச்சிடலாம்.


ஆனால் அங்குள்ள அதிகாரியோ கேப்டன் விஜயகாந்தையே மிஞ்சுவது போல பயங்கர கண்டிப்பு. எல்லா ஆவணங்களையும் கறாராக சரிபார்கிறார்.


சரியான பேப்பர்ஸ் இல்லை என்று இரண்டு பேரை துரத்தியும் விடுகிறார்.


பேருந்து முழுவதும் அலச எதுவும் சிக்கவில்லை. ரகசிய அறைக்குள் படுத்திருக்கும் ஹிஷோ போல நமது நெஞ்சும் பட படக்கிறது.


மோப்ப நாய்களை கொண்டு கண்டுபிடித்து விட ஹிஷோவை கைது செய்து அழைத்து சென்றும் விடுகிறார்.


மாமோவும் கோஷ்டியும் மிகுந்த கவலை அடைகிறது. எல்லோரும் இப்படியே திரும்பிவிடலாம் என வற்புறுத்த மாமாவோ எதிர்த்து பேசுபவர்களை சுட்டு தள்ளுவேன் என துப்பாக்கி முனையில் மிரட்டி அடைந்தால் மகாதேவி.. இல்லையேல் மரணதேவி... என சபதமிடுகிறார்.


இந்த வயதிலும் அவரது தீராத இசை ஆர்வத்தை எண்ணி அனைவரும் சம்மதிக்கின்றனர்.


குர்ஷித் கிராமத்தில் தனது நீண்ட நாள் நண்பரும் "பாணபத்திரர்" போல அவரும் பெரிய இசை மேதை என்றும் அவரின் உதவியோடு வேறு ஒரு பெண் பாடகியை ஏற்பாடு செய்யலாம் என கூறி கிராமத்திற்கு பயணிக்கின்றனர்.



அங்கு போய் பார்த்தால் கிராமமே காலியாக கிடக்கிறது. அடிமேல் அடியாக நேற்று தான் அவர் இறந்த்தாக செய்தி வருகிறது.


சரி வந்தது வந்து விட்டோம். அவரது ஈமச்சடங்கிலாவது கலந்து கொள்வோம் என வருத்தபடுகிறார் மாமோ.


அந்த ஈமசடங்கில் ஒப்பாரி பாடல் ஒன்றை கேட்கிறார். இதுவும் தெய்வீக குரலாக இருக்கிறதே என குரலுக்கு உண்டான பெண்ணை தேடுகிறார். கிடைக்கவில்லை.



நண்பரின் மகன்களிடம் பேசி சில வாத்திய உபகரணங்களை மட்டும் பெற்று கொண்டு பயணத்தை தொடருகின்றனர்.


திடிரென தேவதை போல வந்து பேருந்து மீது குதிக்கிறாள்ள் பெண்ணொருத்தி.


அவள்தான் ஈமசடங்கில் பாடியதாகவும் மாமோவின் தீவிர ரசிகை என்றும் அவருக்கு உதவுவதற்காகவே தில்லான மோகனாம்பாளுக்கு உதவ வந்த
S.V. சஹஸ்சரநாமம் போல சில ஆட்களுடன் வந்திருப்பதாகவும் கூறிகிறாள்.

இசைக்கருவிகளை சவப்பெட்டியில் வைத்து
எடுத்து சென்று விடலாம் என்றும் ஆட்கள் மோட்டர் பைக்கில் செல்லவும் ஏற்பாடு செய்கிறாள்.


அங்கு பல வித இடையூறுகள்.


சவப்பெட்டிகள் மாட்டி கொள்ள கோஷ்டிகள் இசை விருந்து நடக்கும் பகுதிக்கு சென்று விட்டதாக தகவல் வருகிறது.


காவலாளிகளிடம் மாட்டிக்கொண்டு மொட்டையடிக்கப்பட்ட தலையோடு வந்து சேருகிறான் காகோ. இதுநாள் வரை தான் எடுத்த கேமிராவில் கேசட் இல்லை என்பதும் அறிந்து விதியை நொந்து கொள்கிறான்.



கடும் குளிரிலும் பனி மழையிலும் மாமோ அந்த பெண்ணுடன்
குதிரையில் பயணமாகிறார்.


இரண்டு வாரம் நெருங்கிவிடுகிறது. பாதி நிலவும் தென்படுகிறது.


தன் உயிர் போனாலும் இசை விருந்து நடக்கும் இடத்தில் கொண்டு போய் சேர்க்குமாறு தாழ்மையுடன் கூறுகிறார்.


தாங்க முடியாத குளிரால் சிறிது சிறிதாக மாமோ உயிரிழக்கும் நிலைக்கு வர ஒரு காலி சவப்பெட்டியில் தானே வலியச் சென்று படுத்தும் கொள்கிறார்.



இசை நிகழ்ச்சி நடைபெறும் இடம் நோக்கி சவப் பெட்டியை அந்த பெண்ணும் மாமோவின் கடைசி மகனும் இழுத்து செல்கின்றனர்.


அத்துடன் முடிகிறது திரைப்படம்.



மண்ணின் மணத்தோடு நகைச்சுவை கலந்த அருமையான திரைப்படம். மொழி புரியாவிட்டாலும் அருமையான இசையும மெல்லிய ரீங்காரமாய் வரும் பாடல்களும் கேட்பதற்கு அவ்வளவு இனிமை. இசைக்கு மொழி தேவையில்லை என்பதை சொல்லவும் வேண்டுமோ.?



தேவதையாக வந்த Golshifteh Farahani. உண்மையாகவே ஒரு அழகு தேவதைதான்.


அண்மையில் வெளிவந்த Body of Lies ஹாலிவுட் திரைப்படத்திலும் நடித்திருக்கிறார்.



இஸ்தான்புல் சர்வதேச திரைப்படவிழாவில் பரிசு பெற்றதுடன் பல பரிசுகளையும் தட்டி சென்றுள்ளது Half Moon.



சந்தர்ப்பம் கிடைத்தால் நிச்சயம் பாருங்கள்.

Posted by butterfly Surya