Sukkar banat { Caramel }

Sukkar banat

Caramel { Lebanese Movie }

பெய்ரூத் நகரில் வாழும் பியூட்டி பார்லர் நடத்தும் பெண்களும் அவர்களை சுற்றியுள்ள பெண்களின் வாழ்க்கை பற்றிய கதை.

ஒவ்வொருவருக்குமுள்ள காதல், நட்பு, ஏக்கம், குடும்பம் மீதுள்ள அக்கறையை கொணட ஒரு அற்புத திரைப்படம்.



நஸ்ரின் & ரீமாவும் அழகு நிலையத்தை நடத்துகிறார்கள். அவர்களின் நெருங்கிய தோழி லயாலே அந்த நிலையத்தில் பணி புரிபவள். அவளுக்கு ஏற்கனவே திருமணமான ஒருவனுடன் தீராக்காதல்.



அவன் தினந்தோறும் பணி முடித்து திரும்பி லயலேவுடன் சுற்றி திரிகிறான். அவளும் தன்னை திருமணம் செய்வான் என்ற நம்பிக்கையுடன் அவனின் கார் ஹார்ன் சத்தம் கேட்டதுமே துள்ளி குதித்து ஒடி சந்தோஷமாக அவனுடன் பொழுதை கழிக்கிறாள். இந்த விஷயம் தனது பெற்றோருக்கு தெரியாமல் இருக்க அவள் செய்யும் பிரயத்தனங்கள் பல.



இவர்கள் அனைவரின் தோழியும் மிகப்பெரிய நடிகையாக வரவேண்டும் என்ற ஆசையும் ஏக்கமும் கொண்ட நடுத்தர வய்து பெண்மணி ஜமாலே.



அழகு சாதன நிலையத்தின் பக்கத்து வீட்டில் குடியிருக்கும் பெண்மணி ரோஸ். வயது முதிர்ந்த கன்னி. அவளின் சகோதரி ஒரு வயதான கிழவி. சற்று மன நிலை பாதிக்கப்ப்ட்ட தனது சகோதரிக்காக திருமணம் செய்து கொள்ளாமல் தன் வாழ்வையே அர்பணிக்கிறாள். அவளை பராமரிப்பதற்காகவும் தன் அன்றாட வாழ்க்கைகாகவும் தையல் தொழில் புரிந்து தன் வயதான சகோதரியை காப்ப்பாற்றுகிறாள்.



லயாலே தவறான இடத்தில் காரை நிறுத்தியதற்காக காவல்துறை அதிகாரியான சிஹாம் என்பவரால் அபராதம் விதிக்கப்படுகிறாள். அவளும் அவசரத்தில் நிறுத்திவிட்டதாகவும் ஒரு முறை மன்னிக்குமாறும் கெஞ்சவே காவலரும் அவளது அழகில் மயங்கி மன்னிக்கிறார். அவளை ஒரு தலையாக காதலிக்கவும் தொடங்குகிறார்.



லயாலேவின் திருமணமான காதலன் மனைவியின் வற்புறுத்தலின் பேரில் லயாலேவை சந்திப்பதை நிறுத்தி எஸ்ஸாகி விடுகிறான். இது அறியாத லயாலே தினந்தோறும் கார் ஹார்ன் சத்ததிற்காக காத்து கிடக்கிறாள். அவனோ வருவதாக காணோம்.



சிஹாமின் ஒருதலை காதல் நாளுக்கு நாள் வளர்ந்து கொண்டே வருகிறது. லயாலேவின் தோழிகள் அனைவரிடத்திலும் நல்ல நட்பையும் பெறுகிறான்.

அதே நேரத்தில் பக்கத்து வீட்டு முதிர் கன்னி ரோஸிடம் துணிகள் தைப்பதற்காக வருகிறார் துணை ஏதுமில்லாத வயதான ஒரு அமெரிக்கர்.
ரோஸை சந்திப்பதற்காகவும் அவளுக்கு உதவிடவேண்டிய நல்லெண்ணத்திலும் நிறைய துணிகளை தைக்க கொடுக்கிறார். அவர்களிடையே நட்பு மலருகிறது.



லயாலேவுக்கு திருமணம் செய்ய பெற்றோர்கள் நிர்பந்திக்கிறார்கள். அவள் மறுக்கிறாள். தோழிகள் இனியும் தன் பழைய காதலுனுக்காக காத்து கிடப்பதை விட்டுவிடும் படியும் புதிய வாழ்க்கையை தொடங்கவும் அறிவுரை கூறுகின்றனர். லயாலேவுக்கும் அவர்களின் அறிவுரை நியாயமாகப்படுகிறது.



அழகு நிலையத்திற்கு வரும் வாடிக்கையாளர்களின் பெண்ணொருத்தி லயாலேவுக்கு விரைவில் திருமணம் நடைபெறுமென்றும் கிழக்கு திசையில் பறக்கும் வெண்புறா அவள் மீது எச்சமிடும் நேரத்தில் அவளது வருங்கால கணவன் கிடைப்பான் என்றும் கூறுகிறாள். இதையெல்லாம் நம்ப மறுக்கிறாள் லயாலே.



நஸரீனுக்கு திருமண ஏற்பாடுகள் நடக்கிறது. . திருமண நாளன்று தோழிகள் அனைவரும் ஒன்று கூடுகின்றனர். ஒரே பாட்டும் ஆட்டமுமாக படு விமரிசையாக திருமணம் நடக்கிறது. காவலர் சிஹாமையும் திருமணத்திற்கு

அழைக்கிறாள் நஸரின். அவனும் திருமண நிகழ்ச்சிக்கு வருகிறான்.

அப்போது வானத்தில் பறக்கும் ஒரு வெண்புறா எச்சமிடுகிறது. எதிரே காவலரான சிஹாம்.....



அந்த காட்சியுடன் திரைப்படம் நிறைவடைகிறது.....




நடிகையாக ஆசைப்பட்டு ஒவ்வொரு முறையும் பல வித மேக்கப்புடன் தன்னை இளமையாக காட்டி கொள்ள ஜமாலே செய்யும் சேட்டைகள் நகைச்சுவை மட்டுமல்ல ஒவ்வொரு பெண்ணின் மனதிற்குள்ளும் எத்தனை விதமான விருப்பங்கள் நிறைவேறாத ஆசைகள்...



அமெரிக்க முதியவர் ரோஸிற்காக காத்திருப்பதும் தனது மனநிலை பாதிக்கப்பட்ட சகோதரிக்காக அவரின் காதலை துறப்பதும் நெகிழ்வான காட்சிகள்.



மொத்தம் பத்திற்கும் குறைவான கதாபாத்திரங்களை மட்டுமே கொண்டு ஒரு திரைப்படத்தை இயக்கியிருகிறார் லயாலேவாக நடித்த Nadine Labaki. இதில் வருபவர்கள் யாரும் நடிப்பதை போன்ற ஒரு உணர்வேயில்லை. நிஜ மனிதர்களை காண்பது போன்ற காட்சியமைப்புகள். அவ்வளவு யதார்த்தம். எந்த வித பிரும்மாண்டமும் இல்லாமலும் சினிமாவின் சாத்தியம் என்ன என்பதை நிரூபித்திருக்கும் ஒரு அரிய முயற்ச்சி என்று தான் சொல்ல தோன்றுகிறது..



Caramel என்ற சாக்லேட் கொண்டு தயாரிக்கப்பட்டு பெண்களின் தேவையற்ற ரோமங்களை பிரித்தெடுக்கும் ஒரு வித அழகு சாதன பொருள்தான் இத்திரைப்பட பெயர்.



பெண்களின் வாழ்க்கை போல அது தித்திக்கும் சாக்லேட்டா அல்லது ஒரு வலியான மருந்தா என்று சொல்லாமல் சொல்லியிருக்கும் இயக்குநரை எத்தனை பாராட்டினாலும் தகும்.



சிறந்த வெளிநாட்டு மொழிக்காக பிரான்ஸ் திரைப்பட விழாவில் பரிசு பெற்ற திரைப்படம். வெளிவந்தது 2007

சந்தர்ப்பம் கிடைத்தால் Don't Miss.

Posted by butterfly Surya